Yɛ Nee Mediema Kilisienema Tu A, Kɛzi Ɔboa Yɛ Ɛ?

Saa ɔwɔ kɛ yɛdua kpɔkɛmile nu anzɛɛ yɛfinde wɔ mekɛ mɔɔ maanle nu ɛnle kpalɛ fee la bɔbɔ a, dahuu yɛkɔ yɛ Kilisiene ayia ne mɔ. Ɔnva nwo kɛ bɛyia ɛbɛlabɔlɛ nu ngyegyelɛ na bɛfɛ wɔ gyima nu la, duzu ati a Gyihova Alasevolɛ bɔ mɔdenle nee bɛ mediema yia nu a?

Ɔboa yɛdayɛ mumua ne. Mekɛ mɔɔ Pɔɔlo ɛlɛka menli mɔɔ yɛ nee bɛ yia wɔ asafo ne anu anwo edwɛkɛ la, ɔhɛlɛle kɛ: “Bɛmaa yɛzuzu yɛ nwo ngoko.” (Hibuluma 10:24) Edwɛkɛ ɛhye kile kɛ “ɛdwenle debie nwo kpalɛ,” kile kɛ yɛnwu yɛ nwo kpalɛ. Ɔti ye edwɛkɛ ne maa yɛnwu kɛ ɔwɔ kɛ yɛdwenle awie mɔ anwo. Saa yɛnwu Kilisiene mbusua ngakyile a, ɔmaa yɛnwu kɛ bie mɔ ɛhola ɛgyinla ngyegyelɛ mɔɔ yɛlɛyia la bie anloa na bɛli konim, na bɛbahola bɛaboa yɛ bɛamaa yɛdayɛ noko yɛagyinla ɔ nloa.

Ɔmaa yɛnyia agɔnwolɛma kpalɛ. Tɛ menli mɔɔ yɛze bɛ la ala a yɛ nee bɛ yia wɔ yɛ nyianu ne mɔ abo a, emomu yɛ nee menli ekpunli mɔɔ bɛle yɛ gɔnwo mɔ kpalɛ la a yia nu a. Ɔdwu mekɛ ne bie a, yɛyia nu na yɛdie yɛ nye kɛ mɔɔ ɔfɛta la. Nvasoɛ boni a yɛnyia yɛfi ɛhye mɔɔ yɛyɛ la anu a? Ɔmaa yɛbu yɛ gɔnwo mɔ kɛ bɛsonle bolɛ na ɛlɔlɛ mɔɔ wɔ yɛ avinli la yɛ kpole. Akee saa yɛ gɔnwo mɔ ɛlɛyia ngyegyelɛ a, yɛyɛ ye ndɛ yɛboa bɛ ɔluakɛ bɛle yɛ gɔnwo mɔ. (Mrɛlɛbulɛ 17:17) Saa yɛ nee asafo ne anu amra amuala fa agɔnwolɛ a, ɔkile kɛ ‘yɛdwenle yɛ nwo ngoko ngoko.’​—1 Kɔlentema 12:25, 26.

Yɛmaa wɔ anwosesebɛ kɛ ɛva menli mɔɔ ɛlɛyɛ Nyamenle ɛhulolɛdeɛ la agɔnwolɛ. Ɛbanyia agɔnwolɛ zɛhae mɔ wɔ Gyihova Alasevolɛ avinli. Mmamaa debie biala si wɔ adenle kɛ ɛ nee yɛ kɛdu.

• Duzu ati a ɔle kpalɛ kɛ yɛyia nu wɔ debiezukoalɛ bo a?

• Kenlenzu a ɛbara yɛ asafo debiezukoalɛ ne bie a?