Duzu Menli A Le Gyihova Alasevolɛ?

Gyihova Alasevolɛ nyɛ a ɛze bɛ a? Bie a yɛ nuhua bie mɔ le wɔ kpalɛzoamra, ɛ gɔnwo mɔ gyimayɛvoma, anzɛɛ sukuluma. Bie noko a ɛnee yɛ nee wɔ ɛbɔ Baebolo ne anu adawu ɛlɛ. Duzu menli a amgba yɛle a, na kɛmɔti a yɛka yɛ diedi ne anwo edwɛkɛ yɛkile awie mɔ ɛ?

Yɛle kɛ menli kɔsɔɔti la. Yɛvi ɛleka ngakyile nee mbusua ngakyile nu. Dɛba ne ɛnee yɛ nuhua bie mɔ kɔ asɔne gyɛne, yɛɛ ɛnee bie mɔ noko ɛnlie Nyamenle ɛnli. Noko, kolaa na yɛarayɛ Alasevolɛ la, yɛ kɔsɔɔti yɛnyianle mekɛ yɛzukoale Baebolo ne anu ngilehilelɛ ne kpalɛ. (Gyima ne 17:11) Yɛliele mɔɔ yɛzukoale la yɛdole nu na yɛzile kpɔkɛ kɛ yɛbazonle Gyihova Nyamenle.

Baebolo ne mɔɔ yɛsukoa la boa yɛ. Ɔwɔ kɛ yɛdi ngyegyelɛ nee yɛ sinlidɔlɛ nwo gyima kɛ mɔɔ awie biala yɛ la. Noko, kɛmɔ yɛbɔ mɔdenle yɛfa Baebolo nu ngyinlazo yɛdi gyima la ati, yɛkpazi wɔ ɛbɛlabɔlɛ nu. (Edwɛne 128:1, 2) Ɛhye a le adwenle ko mɔɔ ɔti yɛka ninyɛne mgbalɛ mɔɔ yɛzukoa yɛvi Baebolo ne anu la yɛkile awie mɔ a.

Yɛfa ngyinlazo kpalɛ yɛbɔ yɛ ɛbɛla. Ngyinlazo kpalɛ ɛhye mɔ mɔɔ wɔ Baebolo ne anu la maa yɛ nzo nu dwo yɛ na yɛbu awie mɔ, eza bɛmaa yɛda subane le kɛ nɔhalɛlilɛ nee atiakunlukɛnlɛma ali. Bɛmaa yɛnyia kpɔkɛdelɛ kpalɛ na yɛyɛ maanlema kpalɛ, yɛɛ bɛmaa koyɛlɛ ba abusua nu na yɛbɔ ɛbɛla kpalɛ. Kɛmɔ yɛnwu kɛ “Nyamenle ɛnnea sonla nyunlu” la ati, yɛboka sunsum nu mediemayɛlɛ bie mɔɔ wɔ ewiade amuala la anwo amgba, kɛzi awie anwo nane de yɛɛ maanyɛlɛsɛm ɛngola ɛnzɛkye ye. Yɛle menli ɛdeɛ, noko yɛle ngakyile.​—Gyima ne 4:13; 10:34, 35.

• Kɛzi Gyihova Alasevolɛ le kɛ menli mɔɔ ɛha la ɛ?

• Ngyinlazo boni mɔ a Alasevolɛ ne mɔ ɛzukoa ɛvi Baebolo ne anu a?