Nyamenle Ɛhulolɛdeɛ A Le Duzu?

Nyamenle kulo kɛ yɛfa anzodwolɛ nee anyelielɛ yɛtɛnla paladaese azɛlɛ zo dahuu!

Noko bie a ɛbabiza kɛ, ‘Kɛzi ɛhye bahola ayɛ zɔ ɛ?’ Baebolo ne ka kɛ Nyamenle Belemgbunlililɛ ne bamaa yeayɛ zɔ, na Nyamenle kulo kɛ awie biala sukoa Belemgbunlililɛ zɔhane nee ye bodane ne anwo debie.​—Edwɛne 37:11, 29; Ayezaya 9:7.

Nyamenle kulo kɛ yɛ nye die.

Kɛ mɔɔ selɛ kpalɛ kulo kɛ ɔ mra yɛ boɛ la, zɔhane ala a yɛ anwuma Selɛ ne kulo kɛ yɛ nye die dahuu a. (Ayezaya 48:17, 18) Yebɔ ɛwɔkɛ kɛ “awie mɔɔ yɛ Nyamenle ɛhulolɛdeɛ la de aze dahuu.”​—1 Dwɔn 2:17.

Nyamenle kulo kɛ yɛdua ye ndenle ne mɔ anu.

Baebolo ne ka kɛ yɛ Bɔvolɛ ne kulo kɛ ɔkilehile “yɛ ye ndenle ne mɔ” amaa yɛahola yɛalua “ye ndenle ne mɔ anu.” (Ayezaya 2:2, 3) Yeyɛ ngyehyɛleɛ ‘yeye menli bie yemaa ye duma ne’ kɛ bɛmaa bɛnwu ye ɛhulolɛdeɛ wɔ ewiade amuala.​—Gyima ne 15:14.

Nyamenle kulo kɛ yɛbɔ nu yɛsonle ye.

Gyihova nɔhalɛ ɛzonlenlɛ ne ɛnzɛkye menli avinli, emomu, ɔka menli ɔbɔ nu wɔ nɔhalɛ ɛlɔlɛ nu. (Dwɔn 13:35) Nwane mɔ a ɛlɛkilehile menli mɔɔ wɔ ɛleka biala ɛnɛ la kɛzi bɛfa koyɛlɛ bɛsonle Nyamenle a? Yɛkulo kɛ ɛdua brohyua ɛhye azo ɛnwu bɛ.