Gyisɛse A Le Nwane?

Gyihova zoanle Gyisɛse wɔ azɛlɛ ye azo. 1 Dwɔn 4:9

Saa yɛkulo kɛ yɛsɔ Gyihova anye a, ɛnee ɔwɔ kɛ yɛtie awie bieko mɔɔ anwo hyia la. Gyihova bɔle sunsum nu sonla bie mɔɔ lɛ tumi kpole la wɔ anwuma mekɛ tendenle kolaa na yeabɔ Adam.

Nzinlii, Gyihova maanle bɛlɛra bie mɔɔ ɛnze nrenyia mɔɔ bɛfɛlɛ ye Mɛle la wole ye wɔ Bɛtelɛhɛm. Bɛdonle kakula ne duma Gyisɛse.​—Dwɔn 6:38.

Gyisɛse rale azɛlɛ ye azo la, ɔlale Nyamenle subane ne mɔ ali pɛpɛɛpɛ. Ɛnee ɔ ti akunlu le kɛnlɛma, ɔlɛ ɛlɔlɛ, na bɛkola bɛbikye ye. Ɔvale akɛnrasesebɛ ɔhilehilele awie mɔ Gyihova anwo nɔhalɛ ne.

Gyisɛse bɔle ɛbɛla kpalɛ noko bɛkpɔle ye. 1 Pita 2:21-24

Gyisɛse eza yɛle wuliravolɛma ayile na ɔdwazole menli bie mɔɔ wule la.

Asɔne mgbanyima ne mɔ kpɔle Gyisɛse, ɔluakɛ ɔmaanle menli nwunle bɛ adalɛ ngilehilelɛ nee bɛ nyɛleɛ ɛtane ne mɔ.

Asɔne mgbanyima ne mɔ maanle Wulomuma bole Gyisɛse na bɛhunle ye.