BAEBOLO KPUYIA MƆƆ BƐBUA

Duzu ati a bɛfɛlɛ Gyisɛse Nyamenle Ra ɛ?

Nyamenle ɛnlɛ ɔ ye mɔɔ ɔ nee ye wole mralɛ a. Yemɔ a le ninyɛne kɔsɔɔti Bɔvolɛ a. Bɛbɔle alesama wɔ adenle mɔɔ bɛbahola bɛazukoa Nyamenle subane la azo. Ɛhye ati a bɛfɛlɛ dasanli mɔɔ lumua mɔɔ Nyamenle bɔle ye, Adam, la kɛ “Nyamenle ara” la. Zɔhane ala a bɛfɛlɛ Gyisɛse “Nyamenle Ara” a, ɔluakɛ bɛvale subane mɔɔ ɔ Ze lɛ la bie a bɛbɔle ye a.—Kenga Luku 3:38; Dwɔn 1:14, 49.

Mekɛ boni a bɛbɔle Gyisɛse a?

Nyamenle bɔle Gyisɛse kolaa na yeabɔ Adam. Nɔhalɛ nu, Nyamenle bɔle Gyisɛse na ɔluale ɔ nwo zo ɔbɔle debie gyɛne biala, mɔɔ anwumabɔvolɛma boka nwo la. Ɛhye ati a Baebolo ne fɛlɛ Gyisɛse Nyamenle ‘abɔdeɛ muala anu belamunli ralɛ a.’—Kenga Kɔlɔsaema 1:15, 16.

Kolaa na bɛawo Gyisɛse wɔ Bɛtelɛhɛm la, ɔdɛnlanle anwuma kɛ sunsum nu abɔdeɛ. Mekɛ dwule la, Nyamenle yele Gyisɛse ngoane tumi ne vile anwuma na ɔvale ɔwulale Mɛle awodeɛ nu amaa bɛahola bɛawo ye kɛ dasanli la.—Kenga Luku 1:30-32; Dwɔn 6:38; 8:23.

Duzu ati a Nyamenle manle bɛwole Gyisɛse wɔ azɛlɛ ye azo kɛ dasanli ɛ? Debie titile boni a Gyisɛse yɛle a? Ɛbahola wɔanwu kpuyia ɛhye mɔ mualɛ wɔ Baebolo ne anu, na bɛbamaa wɔade mɔɔ Nyamenle nee Gyisɛse ɛyɛ ɛmaa wɔ la abo kpalɛ na wɔahile nwolɛ anyezɔlɛ kpole.