Fɛlɛnra Ahyebizalɛ, Ɛradolɛ, Yɛɛ Maanlezonlenlɛ

Fɛlɛnra ahyebizalɛ. Gyihova Alasevolɛ die di kɛ saa bɛbɔ bɛ ati aze bɛmaa fɛlɛnra anzɛɛ bɛbiza ye ahye fane dɔɔnwo ne ala wɔ mekɛ mɔɔ bɛlɛbɔ maanle nu edwɛne bɛaboka ye la a, ɔle ɛzonlenlɛ nu debie mɔɔ kile kɛ ngoanelielɛ ɛnvi Nyamenle, na emomu ɔvi Maanle anzɛɛ maanle kpanyinli ne. (Ayezaya 43:11; 1 Kɔlentema 10:14; 1 Dwɔn 5:21) Maanle kpanyinli zɛhae mɔ ko a le Belemgbunli Nɛbukadenɛza mɔɔ ɛnee wɔ tete Babelɔn la. Amaa ye menli ne anwu kɛ ɔlɛ tumi kpole na ɔbɔ Nyamenlezonlenlɛ nwo mɔdenle la, Belemgbunli ɛhye mɔɔ lɛ tumi la manle bɛyɛle ananze kpole bie na ɔhanle ɔhilele ye maanlema kɛ, saa bɛte kɛ bɛlɛbɔ edwɛne, mɔɔ le kɛ maanle nu edwɛne la a, awie biala ɛdu ɛdɔ ɛzonle ananze ne. Noko akee Hibuluma nsa​—Hyeedelake, Mihyake, nee Abɛdenɛgo​—kpole kɛ bɛkɛbɔ bɛ ti aze bɛkɛmaa ananze ne, bɔbɔ wɔ mekɛ mɔɔ bɛhanle kɛ bɛanyɛ zɔ a bɛkɛhu bɛ la.​—Daneɛle, tile 3.

Yɛ mekɛ ye anu, tetedwɛkɛ kɛlɛvolɛ Carlton Hayes hɛlɛle kɛ: “Maanlehulolɛ nwo diedi sɛkɛlɛneɛ titile nee debie titile mɔɔ bɛsonle ye la a le fɛlɛnra ne.” Ɔdoale zolɛ kɛ, “Mrenya tu bɛ kyɛlɛ wɔ mekɛ mɔɔ bɛlɛfa fɛlɛnra ne bɛapɛ nu la; na menli kɛlɛ nwolɛ edwɛne yɛɛ ngakula to nwolɛ edwɛne bɛfa bɛyeyɛ ye.” Eza ɔhanle kɛ, maanlehulolɛ lɛ ye “kenle nwuanzanwuanza” mɔɔ le kɛ July 4 wɔ United States yɛɛ ɔlɛ ye “menli mɔɔ ɛlie duma mɔɔ ɔbu bɛ kɛ anwodelɛma,” yɛɛ ye awozonle azua mɔɔ ɔbu bɛ kɛ “asɔnesua” la. Sogya kpanyinli bie hanle ye bagua nu gyimalilɛ bie abo wɔ Brazil kɛ: “Bɛdi fɛlɛnra ne eni na bɛsonle ye . . . kɛmɔ bɛsonle Nenya mɔ azɛlɛ ne la.” Ɛhɛe, The Encyclopedia Americana ne hanle ye mekɛ bie kɛ, “Fɛlɛnra ne le nwuanzanwuanza kɛ meanubaka ne la.”

Encyclopedia ne mɔɔ yɛbɔ ye duma la hanle ye kenlensa ye ala kɛ, maanle nu edwɛne “da maanle nwo ɛhulolɛ nganeɛdelɛ mɔɔ bɛlɛ ye la ali, na fane dɔɔnwo ne ala ɔmaa bɛsɛlɛ Nyamenle ɛkɛ ne adehilelɛ nee banebɔlɛ bɛmaa menli ne anzɛɛ bɛ mgbanyima ne mɔ.” Ɛhye ati, saa Gyihova azonvolɛ bu maanle ne anu ɛvoyialilɛ mɔɔ fɛlɛnra ahyebizalɛ nee maanle nwo edwɛne wɔ nu la kɛ ɔle ɛzonlenlɛ a, ɔngile kɛ bɛnde edwɛkɛ bo. Nɔhalɛ nu, mekɛ mɔɔ Gyihova Alasevolɛ ngakula kpole kɛ bɛkɛzonle fɛlɛnra anzɛɛ bɛkɛha maanle nwo ndane wɔ U.S. sukulu ne mɔ anu la, The American Character buluku ne hanle nwolɛ edwɛkɛ kɛ: “Debie mɔɔ kile kɛ ninyɛne ɛhye mɔ mɔɔ bɛyɛ bɛ alehyenlɛ biala le ɛzonlenlɛ nu debie la ɛyɛ nɔhalɛ bɔkɔɔ wɔ nwolɛ edwɛkɛ dɔɔnwo mɔɔ Kɔɔto Kpole ne ɛli la anu.”

Gyihova menli ɛnva bɛ nwo ɛnwula ɛvoyialilɛ mɔɔ bɛbu ye kɛ ɔngyi Ngɛlɛlera ne azo la anu ɛdeɛ, noko bɛbu adenle mɔɔ menli lɛ yɛ zɔ la. Eza bɛbu maanle biala anu fɛlɛnra kɛ ɔgyi ɛkɛ ɔmaa maanle ne, na bɛbu menli mɔɔ bɛlua adenle kpalɛ zo bɛkpa bɛ la kɛ ‘maanle mgbanyima’ mɔɔ “Nyamenle ɛva bɛ ɛzie ɛkɛ a.” (Wulomuma 13:1-4) Ɛhye ati, Gyihova Alasevolɛ tie folɛdulɛ ne mɔɔ se bɛyɛ nzɛlɛlɛ ne bie bɛmaa “arelemgbunli nee menli mɔɔ tumi wɔ bɛ sa nu la amuala” la. Emomu, yɛ bodane a le kɛ ‘amaa yɛ nwo adɔ yɛ na yɛanyia [anzondwolɛ] yɛazonle yɛ Nyamenle ne na yɛali ye eni kɛmɔ ɔfɛta la.’​—1 Temɔte 2:2.

Maanyɛlɛ nu ɛradolɛ. Nɔhalɛ Keleseɛnema bu adenle mɔɔ menli lɛ to ɛra la. Bɛndwazo bɛntia ɛradolɛ na bɛtie menli mɔɔ bɛdo ɛra bɛye bɛ la. Noko akee, bɛngyinla afoa biala wɔ maanle ne maanyɛlɛ edwɛkɛ nu. (Mateyu 22:21; 1 Pita 3:16) Duzu a ɔwɔ kɛ Keleseɛnenli yɛ wɔ maanle mɔɔ bɛyɛ ye kyengye kɛ ɔwɔ kɛ awie biala to ɛra, anzɛɛ awie angɔ ɛleka mɔɔ bɛlɛto ɛra ne la a bɛmaa ɔ nwo kyele ye la anu a? Saa ɔkakye kɛ Hyeedelake, Mihyake, yɛɛ Abɛdenɛgo hɔle Dula azɛlɛ fɛɛnye ne azo, na saa ɔngyegye ye adwenle a, ɔbahola yeazi kpɔkɛ na yeahɔ ɛleka mɔɔ bɛlɛto ɛra ne la. Noko akee, ɔbanlea boɛ kɛ ɔnrɛdo ɛra ne bie. Ɔwɔ kɛ ɔsuzu ngyinlazo nsia ɛhye mɔ anwo:

1. Gyisɛse ɛdoavolɛma ɛnle “ewiade ɛdeɛ.”​—Dwɔn 15:19.

2. Keleseɛnema gyi Kelaese nee ye Belemgbunlililɛ ne agyakɛ anu.​—Dwɔn 18:36; 2 Kɔlentema 5:20.

3. Keleseɛne asafo ne diedi le ko, na ɛlɔlɛ mɔɔ le kɛ Kelaese ɛdeɛ ne la ka nuhua menli bɔ nu.​—1 Kɔlentema 1:10; Kɔlɔsaema 3:14.

4. Menli mɔɔ to ɛra kpa awie la di mɔɔ ɔkɛyɛ la anwo ɛzonle.​—Yɛ ngyinlazo mɔɔ wɔ 1 Samoɛle 8:5, 10-18 yɛɛ 1 Temɔte 5:22 la nzonlɛ.

5. Gyihova bule ɛhulolɛ mɔɔ Yizilayɛma nyianle kɛ bɛkpondɛ sonla bɛamaa yeanlea bɛ nwo zo la kɛ ɔle sɛkɛlɛneɛ mɔɔ kile kɛ bɛkpo Ye.​—1 Samoɛle 8:7.

6. Ɔwɔ kɛ Keleseɛnema kola ka Nyamenle Belemgbunlililɛ ne anwo edwɛkɛ kile maanyɛlɛ nu menli kɔsɔɔti mɔɔ bɛnzulo a.​—Mateyu 24:14; 28:19, 20; Hibuluma 10:35.

Maanlezonlenlɛ. Wɔ ɛleka ne bie mɔ, maanle ne maa menli mɔɔ kpo kɛ bɛkɛyɛ sogya gyima la yɛ maanle gyima wɔ mekɛ bie anu. Saa edwɛkɛ ɛhye bie to yɛ na ɔwɔ kɛ yɛsi nwolɛ kpɔkɛ a, ɔwɔ kɛ yɛyɛ nwolɛ asɔne, yɛ nee yɛ gɔnwo Keleseɛnenli mɔɔ ɛnyi wɔ sunsum nu la suzu nwolɛ na yɛdua mɔɔ yɛzukoa la azo yɛfa yɛ adwenle yɛsi nwolɛ kpɔkɛ.​—Mrɛlɛbulɛ 2:1-5; Felepaema 4:5.

Nyamenle Edwɛkɛ ne ka kile yɛ kɛ ‘bɛha bɛ nwo aze bɛmaa arelemgbunli nee bɛdabɛ mɔɔ tumi wɔ bɛ sa nu la, bɛdie bɛ edwɛkɛ na bɛbɔ ɛbɛla kpalɛ wɔ adenle biala anu . . . na bɛva anzondwolɛ nee agɔnwolɛvalɛ bɛdɛnla.’ (Taetɛse 3:1, 2) Mekɛ mɔɔ zɔhane edwɛkɛ ne wɔ yɛ adwenle nu la, yɛbahola yɛabiza yɛ nwo kpuyia ɛhye mɔ kɛ: ‘Saa medie zɔhane maanle gyima ne meto nu a, asoo ɔbaha afoa biala mɔɔ mengyi kɛ Keleseɛnenli anzɛɛ ɔbamaa meava me nwo meawula adalɛ ɛzonlenlɛ nu ɔ?’ (Maeka 4:3, 5; 2 Kɔlentema 6:16, 17) ‘Asoo gyima ɛhye ɛyɛlɛ bamaa yeayɛ se yeamaa me kɛ mekɛli me Keleseɛne ɛzonlelilɛ nwo gyima anzɛɛ ɔnrɛmaa menrɛhola ye yɛ bɔbɔ?’ (Mateyu 28:19, 20; Ɛfɛsɛsema 6:4; Hibuluma 10:24, 25) ‘Wɔ adenle fofolɛ zo, saa mefa me nwo mewula gyima ɛhye anu a, asoo ɔbamaa meanyia adenle meayɛ dɔɔnwo wɔ ɛzonlenlɛ gyima ne anu na bie a meava me nwo meawula dahuu ɛzonlenlɛ gyima ne anu ɔ?’​—Hibuluma 6:11, 12.

Saa Keleseɛnenli bie suzu edwɛkɛ ne anwo na ye adwenle yɛ ye kɛ ɔbahola yeayɛ maanle gyima tɛla kɛ ɔkɛmaa bɛkɛdo ye efiade a, ɔwɔ kɛ ɔ gɔnwo mɔ Keleseɛnema die ye kpɔkɛzilɛ ne to nu. (Wulomuma 14:10) Saa ɔte nganeɛ noko kɛ ɔnrɛhola gyima zɛhae yɛ a, ɔwɔ kɛ bɛdie ye kpɔkɛzilɛ ne noko bɛto nu.​—1 Kɔlentema 10:29; 2 Kɔlentema 1:24.