Mokanwo
Gyisɛse Kelaese—Mɛzaya ne Mɔɔ Bɛbɔle Ɔ Nwo Ɛwɔkɛ La
AMAA yɛanwu Mɛzaya ne la, Gyihova Nyamenle boale ngapezoma mɔɔ hɛlɛle Baebolo ne la manle bɛhanle Ngoanedievolɛ ne mɔɔ bɛbɔle ɔ nwo ɛwɔkɛ la awolɛ, ye ɛzonlenlɛ gyima nee ye ewule nwo edwɛkɛ. Gyisɛse Kelaese manle Baebolo ngapezo ɛhye mɔ amuala rale nu. Ngapezo ɛhye mɔ anu la ɛkɛ ne wienyi na bɛrale nu pɛpɛɛpɛ. Kɛ neazo la, maa yɛzuzu ngapezo ɛhye mɔ bie mɔɔ hanle Mɛzaya ne awolɛ nwo nee ye ngakula nu edwɛkɛ dole ɛkɛ ne la anwo.
Ngapezonli Ayezaya hanle dole ɛkɛ ne kɛ Mɛzaya ne bavi Belemgbunli Devidi abusua nu. (Ayezaya 9:7) Amgba bɛwole Gyisɛse wɔ Devidi abusua nu.—Mateyu 1:1, 6-17.
Nyamenle ngapezonli Maeka noko hanle dole ɛkɛ ne kɛ, kakula ɛhye bayɛ belemgbunli na bɛbawo ye wɔ “Bɛtelɛhɛm Ɛfelata.” (Maeka 5:2) Mekɛ mɔɔ bɛwole Gyisɛse la ɛnee azua nwiɔ a wɔ Yizilayɛ mɔɔ bɛfɛlɛ bɛ Bɛtelɛhɛm a. Ɛnee ko bikye Nazalɛte mɔɔ wɔ maanle ne sɔlɔ la, yɛɛ ko noko bikye Gyɛlusalɛm mɔɔ wɔ Dwuda la. Ɛnee bɛfɛlɛ Bɛtelɛhɛm mɔɔ bikye Gyɛlusalɛm la Ɛfelata. Ɛkɛ ne a bɛwole Gyisɛse a, kɛmɔ ngapezo ne hanle dole ɛkɛ ne la pɛpɛɛpɛ!—Mateyu 2:1.
Baebolo ngapezo bieko hanle dole ɛkɛ ne kɛ bɛbavɛlɛ Nyamenle Ra ne ‘bɛavi Yigyibiti.’ Mɔɔ ɛnee Gyisɛse le kakula la bɛvale ye bɛhɔle Yigyibiti. Bɛyele ye bɛvile Yigyibiti wɔ mekɛ mɔɔ Hɛlɔdo wule la na ɛhye manle ngapezo ne rale nuhua.—Hozia 11:1; Mateyu 2:15.
Wɔ ɛlɛka ne mɔɔ wɔ mukelɛ 200 la anu, ngɛlɛlera ne mɔ mɔɔ bɛhɛlɛ bɛ wɔ edwɛkɛtile “Ngapezo” abo la le edwɛkɛ mɔɔ fane Mɛzaya ne anwo a. Yɛsɛlɛ wɔ, fa toto ngɛlɛlera ne mɔ mɔɔ bɛhɛlɛ bɛ wɔ “Kɛzi Ɔrale Nu” abo la anwo. Saa ɛyɛ zɔ a ɔbamaa diedi mɔɔ ɛlɛ ye kɛ Nyamenle Edwɛkɛ ne le nɔhalɛ la anu amia kpalɛ.
Mekɛ mɔɔ ɛlɛsuzu ngɛlɛlera ɛhye mɔ anwo la, maa ɔdɛnla wɔ adwenle nu kɛ bɛhɛlɛle nuhua ne mɔɔ le ngapezo la ɛvolɛ ɛya ɛya dɔɔnwo na bawo Gyisɛse. Gyisɛse hanle kɛ: “Debie biala mɔɔ bɛhɛlɛ ye wɔ Mosisi mɛla ne anu nee mɔɔ wɔ Nyamenle [ngapezoma, NW], nee Edwɛndolɛ mbuluku ne mɔ anu mɔɔ fane me nwo la kpokpoti ɔwɔ kɛ yɛ nɔhalɛ.” (Luku 24:44) Kɛmɔ ɛdawɔ mumua ne ɛkola ɛnwu ye wɔ wɔ Baebolo ne anu la, amgba bɛ muala bɛrale nu bɔkɔɔ!