Maa Ma Mɔɔ Wɔ Nu La Ɛla Ali

SAA ɛlɛtendɛ wɔahile sonla ko anzɛɛ menli dɔɔnwo a, mmanyia adwenle kɛ kɛmɔ ɛ nye die wɔ edwɛkɛ ne anwo la ati wɔ tievolɛma noko anye balie nwo. Wɔ edwɛkɛ ne hyia, noko saa wɔammaa ma mɔɔ wɔ nu la anla ali a, ɛnrɛhola ɛnrɛmaa tievolɛma ɛnrɛdie wɔ ɛnrɛhyɛ.

Ɛhye le nɔhalɛ wɔ tievolɛma mɔɔ bɛwɔ Belemgbunlililɛ Asalo bɔbɔ la afoa nu. Bie a bɛbadie wɔ saa ɛka anwubielɛ anzɛɛ ɛyɛ ndonwo bie mɔɔ bɛtɛtele ye ɛlɛ la a. Saa ɛka ninyɛne mɔɔ bɛze ye la anwo edwɛkɛ na wɔangilehile nu kpalɛ a, bie a bɛbaye bɛ adwenle bɛavi wɔ edwɛkɛ ne azo. Ɔwɔ kɛ ɛboa bɛ ɛmaa bɛnwu deɛmɔti nee kɛzi deɛ ne mɔɔ ɛlɛka nwolɛ edwɛkɛ la hyia kpalɛ maa bɛ la.

Baebolo ne maa yɛ anwosesebɛ kɛ yɛzuzu ninyɛne nwo kpalɛ anzɛɛ yɛla nrɛlɛbɛ ali. (Mrɛ. 3:21) Gyihova vale Dwɔn Sɔnevolɛ ne lile gyima hilele menli adenle hɔle “[nrɛlɛbɛ] adenle fɔɔnwo ne azo.” (Luku 1:17) Ɛhye a le nrɛlɛbɛ ne mɔɔ vi Gyihova anwo ɛzulolɛ kpalɛ nu ba la. (Edw. 111:10) Bɛboa bɛdabɛ mɔɔ bɛkile zɔhane nrɛlɛbɛ ne anwo anyezɔlɛ la bɛmaa bɛkola bɛgyinla asetɛnla nu ngyegyelɛ nloa ɛnɛ amaa bɛ sa aha dahuu ngoane ne mɔɔ ɔbara la.​—1 Tem. 4:8; 6:19.

Maa Ma Ɛrɛla Ɛdendɛlɛ Ne Anu. Saa ma bara wɔ ɛdendɛlɛ ne anu a, ɔwɔ kɛ ɛsuzu wɔ edwɛkɛ ne nee tievolɛma ne anwo kpalɛ. Mmabu bɛ kɛ bɛle ekpunli bie ala. Mbusua nee menli ngakyile a wɔ zɔhane ekpunli ne anu a. Bie a ngakula ngyikyi, ngakula mɔɔ bɛ nye ɛvi ekyi, mgbavolɛ nee mbɛlɛra nee mgbanyinli a wɔ nu a. Bie a anyelielɛma mɔɔ bɛle fofolɛ nee menli mɔɔ bɛbɔle ɔ bo kɛ bɛsonle Gyihova la ɛnee bɛtɛwole wɔ la a wɔ nu a. Bie a wɔ tievolɛma ne bie mɔ ɛnyi sunsum nu; bie noko a ewiade ne subane nee ye nyɛleɛ ɛnyia bie mɔ anwo zo tumi. Biza ɛ nwo kɛ: ‘Kɛzi edwɛkɛ ne mɔɔ mekaha la baboa me tievolɛma ɛ? Kɛzi mebaboa bɛ meamaa bɛade ɔ bo ɛ?’ Ɛbahola wɔava wɔ adwenle wɔazie ekpunli mɔɔ yɛha bɛ nwo edwɛkɛ wɔ ɛke la anu ko anzɛɛ nwiɔ azo titile. Noko mmamaa ɛ rɛle fi menli mɔɔ ɛha la.

Na saa bɛmaa wɔ Baebolo mɔlebɛbo ngilehilelɛ bie kɛ ɛli nwolɛ gyima noko ɛ? Kɛzi ɛbamaa ɛdendɛlɛ zɛhae aboa tievolɛma mɔɔ bɛdie zɔhane ngilehilelɛ ne bɛdi dɛba la ɛ? Bɔ mɔdenle kɛ ɛbamia anwodozo mɔɔ bɛlɛ ye wɔ nu la anu. Adenle boni azo? Ɔlua Ngɛlɛlera mɔɔ ɔkilehile nu mɔɔ ɛ nee bɛ bazuzu nwolɛ la azo. Eza ɛbahola wɔamaa anyezɔlɛ mɔɔ bɛlɛ bɛmaa zɔhane Baebolo ngilehilelɛ ne la anu amia. Ɛbahola wɔayɛ ɛhye ɔlua kɛzi ɛbamaa bɛanwu kɛ ngilehilelɛ ne nee Baebolo nu nɔhalɛ fofolɛ nee Gyihova mumua ne subane yia la azo. Saa ɔbayɛ boɛ a, fa neazo nee ɛbɛlabɔlɛ nu anwubielɛ ngakyile di gyima maa bɛde kɛzi ngilehilelɛ ɛhye ɛboa menli na yemaa bɛnyia kenlebie nwo anyelazo la abo.

Mmaka edwɛkɛ mɔɔ ma wɔ nu mɔɔ ɔwɔ kɛ bɛfa bɛdi gyima la sikalɛ wɔ wɔ ɛdendɛlɛ ne awieleɛ ala. Ɛbɔ edwɛkɛ ne abo ala a, ɔwɔ kɛ awie biala mɔɔ wɔ wɔ tievolɛma ne anu la te nganeɛ kɛ “ɛhye fane me nwo.” Saa ɛto zɔhane adiabo ne ɛwie a, kɔ zo maa ma mɔɔ wɔ nu la ɛla ali wɔ edwɛkɛ titile ko biala mɔɔ ɛlɛkilehile nu la anu wɔ wɔ ɛdendɛlɛ ne nee adwulaleɛ ne anu.

Saa ɛlɛmaa bɛanwu kɛzi bɛbava bɛali gyima la a, nea kɛ ɛbayɛ ye wɔ adenle mɔɔ ɔ nee Baebolo ngyinlazo le ko la azo. Boni a ɛhye kile a? Ɔkile kɛ ɛbala ɛlɔlɛ nee anwunvɔnezelɛ ali. (1 Pita 3:8; 1 Dwɔn 4:8) Mekɛ mɔɔ Pɔɔlo wɔ Tɛsalonaeka na ɔlɛyia tɛnlabelɛ mɔɔ anu yɛ se bɔbɔ la, ɔbɔle mɔdenle kɛ ɔbazi sunsum nu anyuhɔlɛ mɔɔ ɔ mediema Keleseɛnema mɔɔ bɛwɔ ɛkɛ ɛlɛnyia la azo. Eza ɔnyianle anwodozo wɔ bɛ nu kɛ, bɛbali nɔhalɛ wɔ edwɛkɛ ne mɔɔ bɛlɛsuzu nwolɛ la anu. (1 Tɛs. 4:1-12) Ɛhye le neazo kɛnlɛma mɔɔ ɔwɔ kɛ yɛsukoa a!

Asoo wɔ ɛdendɛlɛ ne bodane a le kɛ ɛbamaa daselɛlilɛ nee edwɛkpa ne mɔɔ yɛkilehile menli la anwo anwosesebɛ? Maa bɛnyia nwolɛ adenle zɔhane anwo anyelielɛ nee anyezɔlɛ. Noko, saa ɛlɛyɛ zɔhane a, kakye kɛ asolo awie biala nee ye mɔdenlebɔlɛ wɔ gyima ɛhye anwo, na Baebolo ne ka ɛhye anwo edwɛkɛ. (Mat.13:23) Mmamaa ɛ mediema ne mɔ adwenle bua bɛ fɔlɛ. Hibuluma 10:24 tu yɛ folɛ kɛ ‘yɛhulo yɛ nwo ngoko na yɛyɛ gyima kpalɛ.’ Saa yɛkulo yɛ nwo ngoko a, gyimayɛlɛ mɔɔ gyi adwenle kpalɛ zo la badoa zo. Kɛ anrɛɛ ɛbayɛ kyengye wɔ mɔɔ ɛkulo kɛ bɛyɛ anwo la, kakye kɛ Gyihova kulo kɛ yɛboa menli yɛmaa bɛdua “diedi zo bɛyɛ tieyɛ.” (Wulo.16:26, NW) Saa ɛhye wɔ yɛ adwenle nu a, yɛbabɔ mɔdenle kɛ yɛbamaa yɛ nee yɛ mediema diedi nu amia.

Boa Awie Mɔ Maa Bɛnwu Ma Mɔɔ Wɔ Nu La. Saa ɛlɛdi menli daselɛ a, maa ma mɔɔ wɔ edwɛkpa ne mɔɔ ɛlɛka la anu la ɛla ali. Ɛhye ɛyɛlɛ bahile kɛ ɛbazuzu mɔɔ menli mɔɔ bɛwɔ wɔ azɛlɛsinli ne anu la ze ye la anwo. Kɛzi ɛbanwu ɛhye ɛ? Tie riledio anzɛɛ tɛlevihyɛne zo edwɛkɛ. Nea edwɛkɛ mɔɔ ɔba adwelie ngɛlata ne mɔ anyunlu la. Eza bɔ mɔdenle kɛ ɛ nee menli bali adwelie, na tie mɔɔ bɛka la. Ɛbanwu kɛ bɛlɛpele bɛali ngyegyelɛ mɔɔ ba ndɛndɛ​—gyima mɔɔ fi bɛ sa, sua kakɛ ɛdualɛ, anwodolɛ, busuanli bie ewule, ɛtanelilɛ nwo ɛzulolɛ, tumima mɔɔ bɛle nzisi, agyalɛ mɔɔ sɛkye, ngakula mɔɔ ɔwɔ kɛ bɛtete bɛ kpalɛ, nee dɔɔnwo mɔɔ boka nwo la anwo gyima. Asoo Baebolo ne bahola aboa bɛ? Ɛhɛe.

Wɔannea a edwɛkɛ bie mɔɔ wɔ ɛ ti anu la a ɛbava wɔabɔ adawubɔlɛ bo a. Noko saa ahenle ka kɛ ɔlɛ edwɛkɛ bie mɔɔ hyia ye na ɛbahola wɔabua a, ɛ nee ye ɛzuzu nwolɛ ndɛndɛ, anzɛɛ ka kile ye kɛ ɛbazia wɔava nwolɛ edwɛkɛ dɔɔnwo wɔarɛlɛ ye. Nɔhalɛ nu, yɛkpo kɛ yɛbayɛ ‘nwotonlonwontonlo wɔ edwɛkɛ mɔɔ ɔnvane yɛ nwo’ la anu, noko yɛfa anyelielɛ yɛ nee awie mɔ suzu folɛdulɛ kpalɛ mɔɔ Baebolo ne fa maa la anwo. (2 Tɛs. 3:11) Ɔda ali kɛ, mɔɔ menli anye balie nwolɛ la a le Baebolo nu folɛdulɛ mɔɔ ka bɛ ɛbɛlabɔlɛ la.

Saa menli ɛnnwu kɛzi yɛ edwɛkɛ ne ka bɛ la a, bie a bɛbapɛ adawubɔlɛ ne azo ndɛndɛ. Saa bɛmaa yɛkɔ zo yɛtendɛ bɔbɔ na yɛammaa ma mɔɔ wɔ edwɛkɛ ne anu la anla ali a, yɛ edwɛkɛ ne ɛnrɛnyia bɛ ɛbɛlabɔlɛ zo tumi. Wɔ adenle fofolɛ zo, saa yɛmaa ma mɔɔ wɔ yɛ edwɛkɛ ne anu la da ali a, yɛ edwɛkɛ ne bahola ahakyi menli ne ɛbɛlabɔlɛ.

Saa ɛlɛyɛ Baebolo ɛzukoalɛ a, kɔ zo si kɛzi bɛbava bɛayɛ gyima la azo. (Mrɛ. 4:7) Boa sukoavoma maa bɛde folɛdulɛ, ngyinlazo nee neazo mɔɔ wɔ Ngɛlɛlera ne anu mɔɔ kile kɛzi ɔwɔ kɛ bɛdua Gyihova ndenle zo la abo. Si nvasoɛ mɔɔ saa bɛyɛ ye zɔ a, bɛbanyia la azo. (Aye. 48:17, 18) Ɛhye bamaa sukoavoma ayɛ nzenzaleɛ mɔɔ hyia la wɔ bɛ ɛbɛlabɔlɛ nu. Maa bɛnyia ɛlɔlɛ bɛmaa Gyihova, bɛnyia ɛhulolɛ kɛ bɛbayɛ mɔɔ sɔ ɔ nye la, na bɛvi ahonle nu bɛli folɛdulɛ mɔɔ wɔ Nyamenle Edwɛkɛ ne anu la azo.