Ngɛlɛlera Ne Mɔɔ Bɛsi Zo Kpalɛ

SAA ɛlɛka Nyamenle bodane ne mɔ anwo edwɛkɛ wɔahile awie mɔ wɔ sua nu anzɛɛ ɛgyi bama zo a, ɔwɔ kɛ wɔ adawubɔlɛ ne gyinla edwɛkɛ mɔɔ wɔ Nyamenle Edwɛkɛ ne anu la azo. Fane dɔɔnwo ne ala ɛhye kile kɛ ɛbagenga ngɛlɛlera ne wɔavi Baebolo ne anu, na ɔwɔ kɛ ɛyɛ ye kpalɛ.

Nganeɛdelɛ Mɔɔ Bɛfa Bɛsi Edwɛkɛ Zo Kpalɛ. Ɔwɔ kɛ ɛfa nganeɛdelɛ ɛkenga ngɛlɛlera ne. Suzu neazo bie mɔ anwo nea. Saa ɛlɛkenga Edwɛndolɛ 37:11 kpole a, ɔwɔ kɛ ɛ ne maa bɛfa anyelielɛ bɛnea anzondwolɛ ne mɔɔ bɛbɔ nwolɛ ɛwɔkɛ wɔ ɛkɛ ne la ade. Saa ɛlɛkenga Yekile 21:4 mɔɔ fane amaneɛnwunlɛ nee ewule mɔɔ bavi ɛkɛ la anwo a, ɔwɔ kɛ ɛ ne maa ɔda ali kɛ ɛ nye die anwondɔlɛ mɔɔ yɛbanyia ye mɔɔ bɛha nwolɛ edwɛkɛ la anwo. Ɔwɔ kɛ ɛfa ɛnelɛ mɔɔ kile kɛ ɔhyia ndɛndɛ la ɛkenga Yekile 18:2, 4, 5, mɔɔ se yɛye yɛ nwo yɛvi ‘Babelɔn Kpole’ ne mɔɔ ɛtane ɛyi ye tɛkɛɛ azo la. Noko ɔwɔ kɛ nganeɛdelɛ ne fi ahonle nu na ɔnle mɔɔ ɔbo zo a. Edwɛkɛ mumua ne nee kɛzi bɛva bɛli gyima la a bahile nganeɛdelɛ mɔɔ fɛta la.

Si Edwɛkɛ Agbɔkɛ Mɔɔ Fɛta La Azo. Saa edwɛkɛ ne mɔɔ ɛkenga la foa bie ala a fane wɔ edwɛkɛ ne anwo a, ɔwɔ kɛ ɛtwe adwenle ɛkɔ yemɔ azo. Kɛ neazo la, saa ɛlɛkenga Mateyu 6:33 (NW), na ɛkpondɛ kɛ ɛkilehile “bɛlumua bɛkpondɛ belemgbunlililɛ ne” anu a, tɛ “Nyamenle tenleneyɛlɛ” ne anzɛɛ “ninyɛne ɛhye mɔ mɔɔ ɛha la” a ɔhyia kɛ ɛsi zolɛ a.

Bie a ɛkpondɛ kɛ ɛkenga Mateyu 28:19 wɔ Ɛzonlenlɛ Nyianu ɛdendɛlɛ bie anu. Edwɛkɛ agbɔkɛ boni mɔ a ɔwɔ kɛ ɛsi zolɛ a? Saa ɛkpondɛ kɛ ɛmaa bɛ anwosesebɛ ɛmaa bɛyɛ sua nu Baebolo ɛzukoalɛ dɔɔnwo a, si “bɛmaa menli ɛrayɛ me ɛdoavolɛma” azo. Eza saa ɛkpondɛ kɛ ɛkilehile ɛzonlelilɛ mɔɔ Keleseɛnenli lɛ kɛ ɔbaha Baebolo ne anu nɔhalɛ ne yeahile menli mɔɔ ɛdu ɛra maanle ne anu anzɛɛ ɛkpondɛ kɛ ɛmaa nolobɔlɛma bie mɔ anwosesebɛ ɛmaa bɛkɔsonle wɔ ɛleka mɔɔ bɛhyia moalɛ kpole la a, ɛbahola wɔazi “maanle ti nee maanle bo” azo.

Fane dɔɔnwo ne ala, yɛkenga ngɛlɛlera yɛbua edwɛkɛ anzɛɛ yɛfoa edwɛkɛ mɔɔ awie mɔ suzu kɛ ɔkye adwenle la azo. Saa ɛsi edwɛkɛ ne amuala azo wɔ adenle ko ne ala azo a, bie a wɔ tievolɛma ɛnrɛnwu mɔɔ ɛkpondɛ wɔahile la. Bie a wɔmɔ ɛze mɔɔ ɛlɛka a, noko bɛmɛ bɛnrɛnwu ye.

Kɛ neazo la, saa ɛlɛkenga Edwɛndolɛ 83:18 wɔavi Baebolo mɔɔ Nyamenle duma ne wɔ nu la anu na ɛsi “Anwuma Anwumanli” ne azo a, wɔannea a suamenle ne ɛnrɛnwu ye kɛ Nyamenle lɛ duma. Ɔwɔ kɛ ɛsi duma “Gyihova” ne azo. Noko saa ɛlɛfa ngɛlɛlera ko ne ala wɔahilehile Gyihova tumililɛ ne anu a, ɔwɔ kɛ ɛsi “Anwuma Anwumanli” ne azo. Zɔhane ala a saa ɛlɛfa Gyemise 2:24 wɔahile deɛmɔti ɔhyia kɛ yɛfa diedi yɛboka gyima nwo la anu na ɛsi “maa ɔsɔ Nyamenle anye” azo ɛgyakyi “gyimayɛlɛ” a, bie a ɔnrɛmaa menli mɔɔ ɛlɛtie wɔ la bie mɔ ɛnrɛnwu edwɛkɛ titile mɔɔ wɔ nu la a.

Yɛbahola yɛanwu neazo bieko mɔɔ baboa yɛ la wɔ Wulomuma 15:7-13. Ɛhye le kɛlata mɔɔ ɛzoanvolɛ Pɔɔlo hɛlɛle hɔmanle asafo mɔɔ menli mɔɔ bɛnle Dwuuma nee Dwuuma wɔ nu la foa. Ɛnee ɛzoanvolɛ ne ɛlɛkilehile nuhua wɔ ɛke kɛ tɛ Dwuuma mɔɔ bɛyɛ bɛ mrenya nu nzonlɛ la angome a gyima mɔɔ Kelaese yɛle la boa bɛ a, emomu eza ɔboa maanle maanle ne anu amra amaa “bɛdabɛ mɔɔ bɛnle Dwuuma la aye Nyamenle ayɛlɛ wɔ ye anwunvɔnezelɛ ne ati.” Akee Pɔɔlo hanle ngɛlɛlera nna anwo edwɛkɛ na ɔhwenle adwenle ɔhɔle adenle zɔhane mɔɔ maanle maanle ne mɔ lɛ la azo. Kɛzi ɔwɔ kɛ ɛkenga zɔhane edwɛkɛ ne mɔ amaa wɔazi edwɛkɛ mɔɔ wɔ Pɔɔlo adwenle nu la azo ɛ? Saa ɛlɛnea edwɛkɛ mɔɔ ɛbazi zolɛ la a, ɛbahola wɔahwe adwenle wɔahɔ “bɛdabɛ mɔɔ bɛnle Dwuuma” mɔɔ wɔ ngyɛnu 9, “maanle maanlema mɔɔ ɛnle Dwuuma” mɔɔ wɔ ngyɛnu 10, “bɛmɛ mɔɔ bɛnle Dwuuma” nee “menli kɔsɔɔti” mɔɔ wɔ ngyɛnu 11, yɛɛ “bɛdabɛ mɔɔ bɛnle Dwuuma” mɔɔ wɔ ngyɛnu 12 la azo. Bɔ mɔdenle kɛ ɛbagenga Wulomuma 15:7-13 na wɔazi zolɛ zɔhane. Mekɛ mɔɔ ɛlɛyɛ ye zɔ la, ɛbanwu edwɛkɛ mɔɔ Pɔɔlo ɛlɛkilehile nu la anye zo kpalɛ na wɔade ɔ bo.

Ndenle Mɔɔ Bɛdua Zo Bɛsi Edwɛkɛ Zo. Ɛbahola wɔalua ndenle ngakyile zo wɔamaa adwenle mɔɔ wɔ edwɛkɛ agbɔkɛ bie anu la ala ali. Ɔwɔ kɛ adenle mɔɔ ɛdua zo wɔava wɔali gyima la nee ngɛlɛlera ne nee kɛzi ɛbamaa wɔ ɛdendɛlɛ ne la yɛ ko. Nwolɛ nzuzulɛ ekyi a wɔ ɛke la.

Ɛnelɛ mɔɔ bɛfa bɛsi edwɛkɛ zo. Ɛhye kile ɛnelɛ mɔɔ bɛkakyi ye bɛmaa adwenle mɔɔ wɔ edwɛkɛ bie anu da ali fi ɛdendɛmunli mɔɔ ɛha anwo la. Bie a saa ɛsi edwɛkɛ zo a ɔbahyia kɛ ɛmaa ɛ ne zo anzɛɛ ɛka ye aze. Wɔ aneɛ dɔɔnwo anu, bɛkakyi bɛ ne bɛfa bɛsi edwɛkɛ zo. Noko wɔ aneɛ bie mɔ anu, saa ɛyɛ ye zɔ a ɔbamaa ndelebɛbo ne ahakyi bɔkɔɔ. Saa ɛto ɛ rɛle aze ɛka edwɛkɛ titile bie mɔ a, ɔmaa tumi ba nuhua. Wɔ aneɛ mɔɔ bɛnva bɛ ne bɛnzi edwɛkɛ agbɔkɛ bie mɔ azo la anu, ɔbayɛ kpalɛ kɛ ɛbayɛ mɔɔ ɔbaboa biala wɔ aneɛ ne anu la amaa wɔadwu wɔ bodane nwo.

Ɛgyinlanlɛ. Ɛbahola wɔagyinla na wɔagenga ngɛlɛlera ne foa titile bie anzɛɛ ɛkenga ɛwie a ɛbahola wɔagyinla​—anzɛɛ ɔ mu nwiɔ. Saa ɛgyinla kolaa na wɔagenga edwɛkɛ titile bie a, ɔmaa bɛ nye da debie ade; ɛwie na ɛgyinla a ɔmaa bɛte ɔ bo kpalɛ. Noko saa ɛgyinlegyinla fane dɔɔnwo a, edwɛkɛ titile biala ɛnrɛla ali.

Edwɛkɛ mɔɔ bɛti nu. Ɛbahola wɔazi edwɛkɛ titile bie azo ɔlua ɛgyinlanlɛ mɔɔ ɛbagyinla na wɔaha anzɛɛ wɔagenga ɛdendɛfoa ne bieko la azo. Adenle kpalɛ ko mɔɔ ta boa la a le kɛ ɛbagenga edwɛkɛ ne wɔawie na wɔadi edwɛkɛ titile mɔɔ wɔ nu la anu.

Bɛnwohehanlɛ. Bɛnwohehanlɛ nee bɛ nyunlu maanle ne kola maa nganeɛdelɛ ba edwɛkɛkpɔkɛ anzɛɛ ɛdendɛsinli bie anu.

Kɛzi ɛnelɛ de. Wɔ aneɛ bie mɔ anu, ɔdwu mekɛ ne bie a, bɛkenga edwɛkɛ agbɔkɛ wɔ adenle mɔɔ ɔmaa bɛ ndelebɛbo ne kakyi na ɔmaa bɛyɛ ngakyile la azo. Wɔ ɛke noko, ɔwɔ kɛ ɛfa nwunu ɛdi gyima, titile saa ɔbayɛ safulewɔlɛ a.

Mekɛ Mɔɔ Awie Mɔ Ɛlɛkenga Ngɛlɛlera. Saa suamenle bie ɛlɛkenga ngɛlɛlera a, wɔannea a ɔbazi edwɛkɛ agbɔkɛ mɔɔ ɔngyia la azo anzɛɛ ɔnrɛzi bie azo fee. Duzu a ɛbahola wɔayɛ a? Fane dɔɔnwo ne ala, saa ɛlɛkile kɛzi ɔbava edwɛkɛ ne yeali gyima la anu a, ɛbahola wɔamaa ndelebɛbo ne ala ali. Saa ɛkile kɛzi ɔbava yeali gyima la ɛwie a, ɛbahola wɔahwe adwenle wɔahɔ Baebolo ne anu edwɛkɛ agbɔkɛ ne mɔɔ ndelebɛbo ne wɔ nu la azo titile.