Ngyehyɛleɛ Mɔɔ Bamaa Wɔanyia Anyuhɔlɛ Kɛ Tendɛvolɛ Nee Kilehilevolɛ
SAA ɛle kakula anzɛɛ kpanyinli, nrenya anzɛɛ raalɛ a, ndetelɛ ɛhye baboa wɔ yeamaa wɔanwu tendɛ kpalɛ na wɔafɛta bɔkɔɔ kɛ Nyamenle Edwɛkɛ ne kilehilevolɛ.
Sukulu zo neavolɛ ne a ɔbahyɛ Teokelase Ɛzonlenlɛ Sukulu ne anu gyimalilɛ ne a. Wɔ mukelɛ nsa mɔɔ doa zo la anu, ɛbanwu ɛdawɔ mumua ne wɔ folɛdulɛ kɛlata ne. Nɔma ne mɔ mɔɔ li edwɛkɛ ne mɔ anyunlu la kile debie ɛzukoalɛ ne mɔ mɔɔ wɔ mukelɛ mɔɔ doɔdoa zolɛ la anu la. Wɔ debie ɛzukoalɛ zɔhane mɔ anu, ɛbanwu ngilehilenu mɔɔ ɔbamaa wɔanwu kɛzi bɛtendɛ na bɛkilehile la anye zo kpalɛ yɛɛ deɛmɔti biala hyia la. Eza ɛbanwu kɛzi ɛbali mɔɔ bɛkpondɛ kɛ ɛyɛ anwo gyima kpalɛ la anwo adehilelɛ mɔɔ fɛta.
Kɔla ngakyile ne mɔɔ wɔ folɛdulɛ kɛlata ne azo la kile edwɛkɛ mɔɔ fane gyimalilɛ mɔɔ le (1) ɛgengalɛ, (2) yɛkile mɔɔ menli nwiɔ anzɛɛ dɔɔnwo boka nwo, anzɛɛ (3) ɛdendɛlɛ mɔɔ bɛmaa bɛkile asafo ne la anwo. Sukulu zo neavolɛ ne bahile wɔ mɔɔ ɔwɔ kɛ ɛdi nwolɛ gyima la. Ɔle kpalɛ kɛ ɛbayɛ ko anwo gyima wɔawie na wɔahɔ fofolɛ zo. Saa ɛyɛ gyimalilɛ ne mɔɔ wɔ foa ne mɔɔ bɛva bɛmaa wɔ kɛ ɛzukoa la abo la a, ɔbaboa wɔ kpalɛ. Saa ɛda ye ali kɛ wɔva folɛdulɛ ne mɔɔ wɔ debiezukoalɛ ne anu la wɔli gyima bɔkɔɔ a, wɔ folɛtuvolɛ ne bamaa wɔ fofolɛ.
Saa ɔwɔ kɛ ɛyɛ wɔ gyimalilɛ ne kɛ yɛkile a, ɔbahyia kɛ ɛbanwu kɛzi ɛbayɛ ye la. Bɛhyehyɛ adenle mɔɔ ɛbalua zo wɔayɛ la bie mɔ wɔ mukelɛ 82, noko tɛ yemɔ angome ala a ɔwɔ kɛ ɛfa ɛyɛ gyima a. Bie a wɔ folɛtuvolɛ ne bahwe wɔ adwenle azie zo kɛ ɛzɔ adenle fofolɛ mɔɔ bɛdua zo bɛdi daselɛ la ɛnlea amaa wɔanyia anwubielɛ, anzɛɛ bie a ɔbagyakyi yeamaa ɛdawɔ mumua ne na wɔakpa bie.
Saa ɛnlɛ sukulu gyimalilɛ bɔbɔ na ɛkenga buluku ɛhye na ɛyɛ gyima ne mɔ mɔɔ wɔ nu la a, ɔbahola yeamaa wɔanyia anyuhɔlɛ dɔɔnwo. Bie a yeanyɛ boɛ fee la, ɛbahola wɔava dapɛne ko wɔazukoa tile fofolɛ wɔawie.
Ɔnva nwo mekɛ tendenle mɔɔ wɔva ɛ nwo wɔwula sukulu ne anzɛɛ daselɛlilɛ nu la, wɔ anyuhɔlɛ ɛnyianlɛ ne abo ɛtɛpɛle. Ɔrɛla ye kɛ ɛbanyia ndetelɛ mɔɔ bɛfa bɛmaa wɔ Teokelase Ɛzonlenlɛ Sukulu ne anu la azo nvasoɛ.