Kpo Adalɛ Ɛzonlenlɛ!

Seetan nee ye sunsum ɛtane ne mɔ ɛngulo kɛ ɛsonle Nyamenle. Bɛkpondɛ kɛ saa bɛkɛhola a bɛtwe awie biala bɛfi Nyamenle anwo. Kɛzi bɛbɔ mɔdenle bɛyɛ ɛhye ɛ? Adenle ko mɔɔ bɛdua zo la a le adalɛ ɛzonlenlɛ. (2 Kɔlentema 11:13-15) Saa ɛzonlenlɛ bie ɛngilehile Baebolo ne anu nɔhalɛ ne a ɛnee ɔle adalɛ ɛzonlenlɛ. Adalɛ ɛzonlenlɛ le kɛ ezukoa ɛtane la​—ɔbahola yeazɔho kpalɛ ne, noko nvasoɛ ɛnle zo. Ɔbahola yeamaa ɛ nwo ahyele wɔ kpalɛ.

Ɛzonlenlɛ nu adalɛbɔlɛ ɛnrɛhola ɛnrɛzɔ Gyihova, nɔhalɛ Nyamenle ne anye ɛlɛ. Mekɛ mɔɔ Gyisɛse wɔ azɛlɛ ye azo la, ɛnee ɛzonlenlɛ ekpunli bie wɔ ɛkɛ ne mɔɔ bɛkpondɛ kɛ bɛku ye a. Ɛnee bɛdwenle kɛ bɛlɛsonle Nyamenle wɔ adenle kpalɛ zo. Bɛhanle kɛ: “Yɛ Ze kokye, yemɔ a le Nyamenle.” Asoo Gyisɛse liele dole nu? Kyɛkyɛ! Ɔhanle ɔhilele bɛ kɛ: “Bɛ vi bɛ ze Abɔnsam ɛkɛ.” (Dwɔn 8:41, 44) Ɛnɛ menli dɔɔnwo dwenle kɛ bɛlɛsonle Nyamenle, noko nɔhalɛ nu Seetan nee ye sunsum ɛtane ne mɔ a bɛlɛsonle bɛ a!​—1 Kɔlentema 10:20.

Kɛ mɔɔ baka ɛtane so ma ɛtane la, zɔhane ala a adalɛ ɛzonlenlɛ maa menli yɛ nyɛleɛ ɛtane a. Ngyegyelɛ ɛyi ewiade ye tɛkɛɛ ɔlua ninyɛndane mɔɔ menli yɛ la ati. Ɛbɛlatane, konle, awule, nzisi, menli ɛhunlɛ, yɛɛ bɔnadolɛ ɛbu zo. Menli mɔɔ yɛ nyɛleɛ ɛtane ɛhye mɔ la wɔ ɛzonlenlɛ nu, noko bɛ ɛzonlenlɛ ne ɛnga bɛ ɛmmaa bɛnyɛ debie kpalɛ. Bɛnrɛhola bɛnrɛyɛ Nyamenle agɔnwo kyesɛ bɛgyakyi nyɛleɛ ɛtane ne mɔ ɛyɛlɛ.​—Mateyu 7:17, 18.

Adalɛ ɛzonlenlɛ kilehile menli kɛ bɛyɛ asɔne bɛmaa ananze. Nyamenle se ɔnle kɛ yɛyɛ asɔne yɛmaa ananze. Ndelebɛbo wɔ ɛhye anu. Saa awie nee wɔ ɛtɛtendɛle ɛlɛ noko ɔtendɛ ɔkile wɔ nvoninli ala a asoo ɛbahulo ɔ? Asoo ahenle zɔhane bahola ayɛ ɛ gɔnwo kpalɛ ɔ? Kyɛkyɛ, ɔnrɛhola. Gyihova kpondɛ kɛ menli tendɛ kile ye na tɛ ananze anzɛɛ nvoninli bie mɔɔ ngoane ɛnle nu la ɔ.​—Adendulɛ 20:4, 5.

Adalɛ ɛzonlenlɛ kilehile kɛ ɔfɛta kɛ bɛku menli wɔ konle mekɛ nu. Gyisɛse hanle kɛ Nyamenle agɔnwo mɔ bahulo bɛ nwo ngoko. Yɛngu menli mɔɔ yɛkulo bɛ la. (Dwɔn 13:35) Ɔnle kpalɛ bɔbɔ kɛ yɛkɛhu ɛtanevolɛma. Mekɛ mɔɔ Gyisɛse agbɔvolɛ rale kɛ bɛbahye ye la, yeammaa ye ɛdoavolɛma ne ango ambɔ ɔ nwo bane.​—Mateyu 26:51, 52.

Adalɛ ɛzonlenlɛ kilehile kɛ ɛtanevolɛma banwu amaneɛ wɔ abɔnsam senle nu. Noko, Baebolo ne kilehile kɛ ɛtane a fa ewule ba a. (Wulomuma 6:23) Gyihova le Nyamenle mɔɔ lɛ ɛlɔlɛ a. Asoo Nyamenle mɔɔ lɛ ɛlɔlɛ la bamaa menli anwu amaneɛ dahuu? Ɔnle zɔ fee! Wɔ Paladaese, ɛzonlenlɛ kokye ala a badɛnla ɛkɛ a, mɔɔ Gyihova die to nu la. (Yekile 15:4) Ɛzonlenlɛ kɔsɔɔti mɔɔ gyi Seetan adalɛ ne azo la bavi ɛkɛ ne.