Ndɛnebuavolɛma

17 Ɛnee nrenyia bie mɔɔ bɛfɛlɛ ye Maeka la de Yifelaem+ awoka ne mɔ azo. 2 Ɔhanle ɔhilele ye mame kɛ: “Dwɛtɛ fufule 1,100 ne mɔɔ bɛwuale bɛvile wɔ ɛkɛ ne mɔɔ ɛwale nwolɛ amonle mɔɔ mendele la—nea! dwɛtɛ fufule ne wɔ me ɛkɛ. Medame a menvale a.” Ɔti ye mame hanle kɛ: “Gyihova ɛyila me ra nrenyia ne.” 3 Yemɔti ɔvale dwɛtɛ fufule 1,100 ne ɔziale ɔmaanle ye mame, noko ye mame hanle kɛ: “Mebade dwɛtɛ fufule ne anwo meamaa Gyihova amaa me ra ne ava aze ananze na eza yɛagua bulalɛ ananze.+ Mesia meava meamaa wɔ.”

4 Mɔɔ ɔvale dwɛtɛ fufule ne ɔmaanle ye mame la, ye mame yele dwɛtɛ fufule 200 maanle dwɛtɛ fufule dwinvolɛ ne. Ɔzele ananze na eza ɔguale bulalɛ ananze; na bɛvale bɛziele Maeka sua nu. 5 Ɛnee Maeka ɛhye lɛ sua mɔɔ ye nyamenle ne mɔ wɔ nu, na ɔyɛle yifɔdo+ nee tɛlafem ananze*+ na ɔkpale ɔ mra mrenyia ne mɔ ko* kɛ ye ɛsɔfo.+ 6 Mekɛ zɔhane, ɛnee belemgbunli biala ɛnle Yizilayɛ.+ Ɛnee awie biala yɛ mɔɔ le kpalɛ wɔ ɔdaye ɔ nye zo la.*+

7 Ɛnee kpavolɛ bie mɔɔ vi Dwuda abusua nu la wɔ Bɛtelɛhɛm+ mɔɔ wɔ Dwuda la. Ɔle Livaenli+ mɔɔ radɛnlanle ɛkɛ ne mekɛ bie. 8 Nrenyia ne vile Bɛtelɛhɛm mɔɔ wɔ Dwuda la azo kɛ ɔkakpondɛ ɛleka yeadɛnla. Mɔɔ ɔwɔ ye adendulɛ ne anu la, ɔhɔvindele Yifelaem awoka ne mɔ azo, na ɔhɔle Maeka+ sua nu. 9 Na Maeka bizale ye kɛ: “Nienwu a ɛvi a?” Ɔbuale kɛ: “Mele Livaenli, mevi Bɛtelɛhɛm mɔɔ wɔ Dwuda la, na melɛkɔ meahɔkpondɛ ɛleka meadɛnla.” 10 Ɔti Maeka zele ye kɛ: “Tɛnla me nwo ɛke na yɛ me papa* nee me ɛsɔfo. Mebamaa wɔ dwɛtɛ fufule bulu ɛvolɛ biala nee adɛladeɛ yɛɛ aleɛ.” Yemɔti Livaenli ne wolole ɛkɛ. 11 Ɔti Livaenli ne liele dole nu kɛ ɔ nee nrenyia ne badɛnla, na kpavolɛ ne yɛle kɛ ɔ mra mrenyia ne mɔ ko ala la. 12 Eza Maeka kpale Livaenli ne* kɛ ɔyɛ ye ɛsɔfo,+ na ɔdɛnlanle Maeka sua nu. 13 Akee Maeka hanle kɛ: “Kɛkala meze kɛ Gyihova bayɛ me boɛ, ɔluakɛ Livaenli ɛrayɛ me ɛsɔfo.”