Ndɛnebuavolɛma
14 Akee Samesɛn hɔle Temenaa, na ɔdwule Temenaa la ɔnwunle Filisitianli raalɛ bie.* 2 Ɔti ɔhɔhanle ɔhilele ye papa nee ye mame kɛ: “Menwu Filisitianli raalɛ bie mɔɔ me nye die ɔ nwo la wɔ Temenaa, na mekulo kɛ bɛkɔgya ye bɛmaa me.” 3 Noko ye papa nee ye mame zele ye kɛ: “Wɔannwu raalɛ biala wɔ wɔ mbusuafoɔ nee yɛ menli ne mɔ amuala avinli ɔ?+ Asoo ɔwɔ kɛ ɛkɔgya raalɛ wɔ Filisitiama mɔɔ bɛmpɛ bɛ mrenyiazo la avinli ɔ?” Noko Samesɛn zele ye papa kɛ: “Bɛgya ye bɛmaa me, ɔluakɛ ɔdaye ala a ɔfɛta me a.”* 4 Ye papa nee ye mame annwu kɛ Gyihova a ɛlɛyɛ ɛhye a, ɔluakɛ ɛnee Nyamenle ɛlɛkpondɛ adenle alua zo aho atia Filisitiama. Zɔhane mekɛ ne, ɛnee Filisitiama a ɛlɛdi Yizilayɛma anwo zo tumi a.+
5 Yemɔti Samesɛn nee ye papa yɛɛ ye mame hɔle Temenaa. Mɔɔ ɔdwule Temenaa vanye egyinli ne mɔ anu la, nea! ɛnee awenade* bie ɛlɛkpo arayia ye. 6 Akee Gyihova sunsum ne maanle ye anwosesebɛ,+ na ɔdele ye nuhua nwiɔ kɛ mɔɔ awie fa ɔ sa mgbane te abɔnkye ralɛ nu nwiɔ la. Noko yeanga mɔɔ ɔyɛle la yeangile ye papa nee ye mame. 7 Akee ɔhɔle na ɔ nee raalɛ ne hɔdendɛle, na ɛnee ɔdaye ala a ɔfɛta wɔ Samesɛn anye zo a.+
8 Nzinlii mɔɔ ɔziale ɔhɔle kɛ ɔkava raalɛ ne yeara sua nu la,+ ɔdole ɔ nye ɔnleanle awenade funli ne, na ɔnwunle kɛ wolɛ ngɛkɛba dɔɔnwo wɔ awenade funli ne anu na yelɔ wolɛ. 9 Ɔti ɔvale wolɛ ne bie ɔguale ɔ sa nu, na mɔɔ ɔlua adenle nu la ɛnee ɔlɛdi. Mɔɔ ɔhɔdole ye papa nee ye mame la, ɔmaanle bɛ bie kɛ bɛli. Noko yeanga yeangile bɛ kɛ ɔyele wolɛ ne ɔvile awenade funli ne anu.
10 Ye papa hɔle raalɛ ne ɛkɛ, na Samesɛn dole ɛkponle wɔ ɛkɛ ɔluakɛ ɛnee zɔhane a mgbavolɛ ne mɔ ta yɛ a. 11 Mɔɔ bɛnwunle ye la, bɛvale mgbavolɛ 30 bɛrale kɛ bɛ nee ye ɛlua. 12 Akee Samesɛn zele bɛ kɛ: “Mesɛlɛ bɛ, bɛmaa mendo bɛ agyebɛ bie. Saa kenle nsuu ɛkponledolɛ ne anu bɛkola bɛye ɔ nloa bɛkile me a, mebamaa bɛ lenen adɛladeɛ 30 yɛɛ adɛladeɛ gyɛne 30. 13 Na saa bɛangola bɛanye ɔ nloa a, ɔwɔ kɛ bɛmaa me lenen adɛladeɛ 30 yɛɛ adɛladeɛ gyɛne 30.” Bɛhanle kɛ: “Ka wɔ agyebɛ ne kile yɛ; yɛkulo kɛ yɛtie.” 14 Yemɔti ɔzele bɛ kɛ:
“Debie mɔɔ bɛdi la vi mɔɔ di debie la anu rale,
Yɛɛ debie menlemenle vi mɔɔ anwo yɛ se la anu rale.”+
Bɛangola bɛanye agyebɛ ne anloa too kenle nsa. 15 Kenle nna ne azo, bɛzele Samesɛn aye ne kɛ: “Bɛlɛbɛla ɛ hu+ maa ɔha agyebɛ ne mualɛ ne ɔhile yɛ. Saa tɛ ye zɔ a, yɛbayela ɛdawɔ nee wɔ papa sua nu amra. Ɛvɛlɛle yɛ ɛke kɛ ɛbalie yɛ agyapadeɛ ɔ?” 16 Ɔti Samesɛn aye ne zunle guale ɔ nwo zo na ɔhanle kɛ: “Ɛkpɔ me, ɛngulo me.+ Wɔdo me menli ne agyebɛ noko wɔanga ye mualɛ ne wɔangile me.” Na ɔzele ye kɛ: “Nea, metɛkanle metɛkilele me papa nee me mame bɔbɔ! Ɔwɔ kɛ meka mekile wɔ ɔ?” 17 Noko ɔhɔle zo ɔzunle wɔ kenle nsuu ɛkponledolɛ ne mɔɔ ɛha la amuala anu. Akee ɔhanle ɔhilele ye wɔ kenle ne mɔɔ tɔ zo nsuu la azo, ɔluakɛ ɔgyinlanle ɔ kɔme zo. Na ɔhanle agyebɛ ne mualɛ ne ɔhilele ye menli ne.+ 18 Ɔti kenle nsuu ne azo, kolaa na sɛnzɛne ne ahɔdɔ* la, mrenyia mɔɔ wɔ sua ne azo la zele ye kɛ:
“Duzu a le menlemenle tɛla wolɛ,
Yɛɛ duzu a anwo yɛ se tɛla awenade a?”+
Ɔbuale bɛ kɛ:
“Saa bɛanva me ɛnlankɛ ralɛ ne bɛanvundu azɛlɛ a,+
Anrɛɛ bɛnrɛhola bɛnrɛye me agyebɛ ne anloa.”
19 Akee Gyihova sunsum ne maanle ye anwosesebɛ,+ na ɔhɔle Ahyekɛlɔn+ ɔhɔhunle bɛ mrenyia ne mɔ anu 30 na ɔvale bɛ adɛladeɛ ne mɔ ɔmaanle menli mɔɔ yele agyebɛ ne anloa la.+ Ɔvale ɛya kpole wɔ mekɛ mɔɔ ɔlɛsia yeahɔ ye papa sua nu la.
20 Akee bɛvale Samesɛn aye ne+ bɛmaanle mgbavolɛ ne mɔ mɔɔ nee ye luale la anu ko.+