Ndɛnebuavolɛma
1 Mekɛ mɔɔ Dwɔhyua wule la,+ Yizilayɛma* bizale Gyihova+ kɛ: “Yɛ nuhua boni a balimoa nee Keenama ahɔho a?” 2 Gyihova buale kɛ: “Dwuda+ a bahɔ a. Bɛnlea! Melɛfa* azɛlɛ ne meawula ɔ sa nu.” 3 Akee Dwuda hanle hilele ɔ diema Semɛyɔn kɛ: “Bɛla maa yɛhɔ me azɛlɛ ne mɔɔ* bɛva bɛmaa me la azo+ na yɛ nee Keenama ɛhɔho. Na medame noko me nee wɔ bahɔ wɔ azɛlɛ ne mɔɔ bɛva bɛmaa wɔ la azo.” Ɔti Semɛyɔn nee ye hɔle.
4 Mekɛ mɔɔ Dwudama hɔle la, Gyihova vale Keenama nee Pilɛzema wulale bɛ sa nu,+ na bɛlile menli 10,000 anwo zo konim wɔ Bizɛke. 5 Bɛnwunle Adonae-bizɛke wɔ Bizɛke, na ɛkɛ ne a bɛ nee ye honle na bɛlile Keenama+ nee Pɛlɛzema+ anwo zo konim a. 6 Mɔɔ Adonae-bizɛke ɛlɛnriandi la, bɛdoale ye bɛhɔhyele ye na bɛpepɛle ɔ sa nee ɔ gyakɛ ahohotile ne mɔ. 7 Akee Adonae-bizɛke hanle kɛ: “Arelemgbunli 70 wɔ ɛkɛ mɔɔ bɛpepɛ bɛ sa nee bɛ gyakɛ ahohotile ne mɔ na bɛsesa aleɛ mgbokpoloka wɔ me ɛkponle bo a. Mɔɔ menyɛle la a Nyamenle ɛyɛ me bie ɛzie ɔ bo zo a.” Ɛhye anzi, bɛ nee ye rale Gyɛlusalɛm,+ na ɛkɛ ne a ɔwule a.
8 Akee Dwudama nee Gyɛlusalɛmma hɔhonle+ na bɛvale sua ne; bɛvale konle dadeɛ bɛhunle bɛ na bɛdole senle wɔ suakpole ne azo. 9 Ɛhye anzi, Dwudama nee Keenama mɔɔ bɛde awoka ne mɔ azo nee Nɛgɛbe yɛɛ Hyifɛla la hɔhonle.+ 10 Ɔti Dwudama hɔle Keenama mɔɔ bɛde Hibulɔn la anwo zo (ɛnee bɛfɛlɛ Hibulɔn Keleate-aaba), na bɛhunle Hyihyae, Ahaeman yɛɛ Talimae.+
11 Bɛvi ɛkɛ ne la, bɛhɔle bɛdabɛ mɔɔ bɛde Dibɛ+ la anwo zo. (Dɛba ne ɛnee bɛfɛlɛ Dibɛ Keleate-sifɛ.)+ 12 Akee Keelɛbe+ hanle kɛ: “Awie biala mɔɔ bahola aho ava Keleate-sifɛ la mebava me ra raalɛ Akesa meamaa yeagya ye.”+ 13 Na Kinaze+ mɔɔ le Keelɛbe adiema kakula la ara Ɔteneɛle+ hɔhonle vale. Ɔti ɔvale ɔ ra raalɛ Akesa ɔmaanle ɔgyale ye. 14 Mɔɔ Akesa ɛlɛkɔ sua nu la, ɔhanle ɔhilele ɔ hu kɛ ɔzɛlɛ ye papa ɔlie azɛlɛ. Akee Akesa vi ye asoaso ne azo dwule aze.* Keelɛbe bizale ye kɛ: “Duzu a ɛkpondɛ a?” 15 Ɔzele ye kɛ: “Mesɛlɛ wɔ yila me, ɔluakɛ wɔmaa me azɛlɛ wɔ nyiakɛ; fa Gulɔto-meeyem* noko maa me.” Ɔti Keelɛbe vale Sɔlɔ Gulɔto nee Nyiakɛ Gulɔto maanle ye.
16 Mosisi ase*+ Kinanli ne abozoamra+ vi mrɛlɛ suakpole ne+ azo rale na bɛ nee Dwudama hɔle Dwuda fienemgbole ne mɔɔ wɔ Elade+ nyiakɛ la anu. Bɛhɔle ɛkɛ na bɛ nee menli mɔɔ de ɛkɛ ne la hɔdɛnlanle.+ 17 Noko Dwuda nee ɔ diema Semɛyɔn doale zo na bɛhɔle Keenama mɔɔ bɛde Zifate la anwo zo na bɛzɛkyele bɛ.+ Ɔti bɛdonle suakpole ne Hɔɔma.*+ 18 Akee Dwuda honle vale Gaza+ nee nwolɛ azɛlɛ ne, Ahyekɛlɔn+ nee nwolɛ azɛlɛ ne yɛɛ Ɛkelɔn+ nee nwolɛ azɛlɛ ne. 19 Ɛnee Gyihova nee Dwudama lua, na bɛvale awoka ne mɔ azo azɛlɛ ne, noko bɛangola bɛandu menli mɔɔ wɔ bɔnza ne anu la ɔluakɛ ɛnee bɛdedɛ konle ehwili mɔɔ dadeɛ wɔ nwolɛ la.*+ 20 Bɛvale Hibulɔn bɛmaanle Keelɛbe kɛ mɔɔ Mosisi bɔle nwolɛ ɛwɔkɛ la,+ na ɔvoanle Enake amra mrenyia nsa ne ɔvile ɛkɛ.+
21 Noko Bɛngyamanema anvoa Gyibɛsema mɔɔ de Gyɛlusalɛm la, ɔti Gyibɛsema nee Bɛngyamanema tɛte Gyɛlusalɛm badwu ɛnɛ.+
22 Dwosefi abozoamra+ hɔle Bɛtɛlema anwo zo, na ɛnee Gyihova li bɛ nzi.+ 23 Dwosefi abozoamra hɔlile busia nleɛnleanle Bɛtɛle sua ne azo (dɛba ne ɛnee bɛfɛlɛ suakpole ne Lɛɛze),+ 24 na busiama ne nwunle kɛ nrenyia bie vi sua ne azo ɛlɛfinde. Ɔti bɛzele ye kɛ: “Yɛsɛlɛ wɔ, kile yɛ sua ne azo adenle ne na yɛ nee wɔ bali ye kɛnlɛma.”* 25 Ɔti nrenyia ne hilele bɛ sua ne azo adenle ne na bɛvale konle dadeɛ bɛhunle bɛ, noko bɛgyakyile nrenyia ne nee ye abusua ne bɛmaanle bɛhɔle.+ 26 Nrenyia ne hɔle Hɛtema azɛlɛ zo na ɔkyekyele suakpole na ɔdonle ye Lɛɛze, ɛhye a le ye duma too badwu ɛnɛ a.
27 Manasɛ ango anva Bɛte-hyian nee azua mɔɔ zuozua ye, Teeyanake+ nee azua mɔɔ zuozua ye, menli mɔɔ wɔ Dɔɔ nee azua mɔɔ zuozua ye, menli mɔɔ wɔ Yebelɛyam nee azua mɔɔ zuozua ye, menli mɔɔ wɔ Mɛgido nee azua mɔɔ zuozua ye la.+ Keenama kpole kɛ bɛkɛvi azɛlɛ ne azo. 28 Mekɛ mɔɔ Yizilayɛma anwo yɛle se la, bɛmaanle Keenama yɛle akɛlɛ gyima,+ noko bɛanvoa bɛ bɛanvi ɛkɛ ne bɔkɔɔ.+
29 Yifelaemma noko anvoa Keenama mɔɔ bɛde Gizɛ la anvi ɛkɛ. Keenama hɔle zo nee bɛ dɛnlanle wɔ Gizɛ.+
30 Zɛbulɛn anvoa menli mɔɔ de Ketelɔn nee Neehalɔlo la.+ Keenama hɔle zo nee bɛ dɛnlanle na bɛmaanle bɛyɛle akɛlɛ gyima.+
31 Ahya anvoa menli mɔɔ de Ako nee Saedɛn,+ Ahelabe, Akezebe,+ Hɛleba, Efike+ yɛɛ Rilihɔbo la.+ 32 Ɔti Ahyama hɔle zo nee Keenama mɔɔ bɛde azɛlɛ ne azo la dɛnlanle, ɔluakɛ bɛanvoa bɛ bɛanvi ɛkɛ.
33 Nafetalae anvoa menli mɔɔ de Bɛte-hyimɛhye nee Bɛte-enate+ la anvi ɛkɛ, na bɛhɔle zo bɛ nee Keenama mɔɔ de azɛlɛ ne azo+ la dɛnlanle. Menli mɔɔ de Bɛte-hyimɛhye nee Bɛte-enate la yɛle akɛlɛ gyima maanle bɛ.
34 Amɔlema maanle Danema hale awoka ne mɔ azo, ɔluakɛ bɛammaa bɛ adenle bɛammaa bɛamba bɔnza ne anu.+ 35 Ɔti Amɔlema kpole kɛ bɛkɛvi Hilɛse Boka ne azo, Ayegyalɔn+ yɛɛ Hyeeyalebem.+ Noko mekɛ mɔɔ Dwosefi abozoamra nyianle tumi* kpole* la, bɛmaanle bɛyɛle akɛlɛ gyima. 36 Amɔlema azɛlɛ ne vi Akelabem boka ne azo,+ ɔvi Sela ɔfo ɔkɔ anwuma.