Dwɔhyua
24 Akee Dwɔhyua boɔboale Yizilayɛ mbusua ne mɔ kɔsɔɔti anloa wɔ Hyikɛm na ɔvɛlɛle Yizilayɛ mgbanyima, bɛ mbusua mgbanyinli, bɛ ndɛnebuavolɛma yɛɛ bɛ menli titili+ na bɛragyinlanle nɔhalɛ Nyamenle ne anyunlu. 2 Dwɔhyua zele menli ne amuala kɛ: “Edwɛkɛ mɔɔ Gyihova, Yizilayɛ Nyamenle ne ɛha la ɛne, ‘Bɛ nenyia mɔ+ dɛnlanle Azule ne* anzi lɔ mekɛ tendenle mɔɔ ɛze ɛhɔ la+—Ebileham nee Neehɔ papa Tilaa boka nwo—na ɛnee bɛsonle nyamenle gyɛne.+
3 “‘Nzinlii, menyele bɛ nenyia Ebileham+ menvile Azule ne* anzi lɔ na memaanle ɔluoluale Keena azɛlɛ ne amuala azo na memaanle ɔ bo zo amra yɛle dɔɔnwo.+ Menvale Ayezeke memaanle ye;+ 4 na menvale Gyekɔbo nee Yisɔ memaanle Ayezeke.+ Nzinlii, menvale Siyɛ Boka ne memaanle Yisɔ kɛ ye agyapadeɛ;+ na Gyekɔbo nee ɔ mra ne mɔ hɔle Yigyibiti.+ 5 Nzinlii menzoanle Mosisi nee Aalɔn,+ na menvale ngyegyelɛ membale Yigyibitima anwo zo+ na akee menyele bɛ menvile ɛkɛ. 6 Mekɛ mɔɔ me nee bɛ papa mɔ vi Yigyibiti ɛlɛba+ na bɛradwule nyevile ne anloa la, Yigyibitima vale konle ehwili nee mgbɔnwɔkavoma voanle bɛ papa mɔ too bɛhɔdwule Nyevile Kɔkɔlɛ ne anloa.+ 7 Bɛzunle bɛvɛlɛle Gyihova,+ ɔti ɔmaanle awozinli rale bɛdabɛ nee Yigyibitima avinli na ɔmaanle nyevile ne rahedale bɛ nwo zo,+ na bɛdabɛ bɛnwunle mɔɔ menyɛle ye wɔ Yigyibiti la bɛ nye zo.+ Na bɛdɛnlanle fienemgbole ne anu ɛvolɛ* dɔɔnwo.+
8 “‘Menvale bɛ membale Amɔlema mɔɔ ɛnee bɛde Dwɔdan ne anzi lɔ la azɛlɛ zo, na bɛ nee bɛ honle.+ Noko menvale bɛ menwulale bɛ sa nu na bɛvale bɛ azɛlɛ ne, na menzɛkyele bɛ menvile bɛ nyunlu.+ 9 Akee Zepɔ ara Beelake, Mowabe belemgbunli ne rale kɛ ɔ nee Yizilayɛma baho. Yemɔti ɔvɛlɛle Biyɔ ara Beelam kɛ ɔwa bɛ amonle.+ 10 Noko meandie Beelam.+ Ɔti ɔyilale bɛ fane dɔɔnwo+ na menliele bɛ menvile ɔ sa nu.+
11 “‘Akee bɛpɛle Dwɔdan ne+ bɛrale Gyɛleko.+ Na Gyɛlekoma, Amɔlema, Pɛlɛzema, Keenama, Hɛtema, Gɛgahyema, Havaema yɛɛ Gyibɛsema mgbanyima* nee bɛ honle, noko menvale bɛ menwulale bɛ sa nu.+ 12 Memaanle arɛlebɔlɛ* lile bɛ nyunlu na ɔvoanle bɛ ɔvile bɛ nyunlu+—kɛ Amɔlema arelemgbunli nwiɔ ne la. Tɛ bɛ konle dadeɛ anzɛɛ bɛ ɛda a bɛvale bɛyɛle zɔ a.+ 13 Ɛhye ati menvale azɛlɛ mɔɔ bɛanvɛ nwolɛ nee azuamgbole mɔɔ tɛ bɛdabɛ a bɛkyekyele la memaanle bɛ na bɛdɛnlanle zolɛ.+ Bɛlɛdi vanye egyinli nee ɔlivi mbaka mɔɔ tɛ bɛdabɛ a bɛluale la azo ma.’+
14 “Yemɔti bɛzulo Gyihova na bɛva ahonle mɔɔ di munli la* nee nɔhalɛlilɛ bɛzonle ye,+ na bɛye nyamenle ne mɔ mɔɔ bɛ nenyia mɔ zonlenle bɛ wɔ Azule ne* anzi lɔ nee Yigyibiti+ la bɛgua bɛ lɔ na bɛzonle Gyihova. 15 Saa bɛnea na ɔnle kpalɛ kɛ bɛkɛzonle Gyihova a, ɛnee ɛnɛ, bɛkpa ahenle mɔɔ bɛkɛzonle ye la,+ saa nyamenle ne mɔ mɔɔ bɛ nenyia mɔ zonlenle bɛ wɔ Azule ne* anzi lɔ la o,+ saa Amɔlema mɔɔ bɛde bɛ azɛlɛ zo la nyamenle ne mɔ o.+ Na mame, me nee me sua nu amra, yɛbazonle Gyihova.”
16 Na menli ne buale kɛ: “Ɔnrɛra ye ɛlɛ kɛ yɛkɛkpo Gyihova na yɛkɛzonle nyamenle gyɛne. 17 Gyihova yɛ Nyamenle ne a yele yɛdayɛ nee yɛ papa mɔ vile Yigyibiti azɛlɛ zo,+ wɔ akɛlɛzonlenlɛ sua nu,+ na ɔyɛle nwanwane ninyɛne mgbole wɔ yɛ nye zo+ na ɔbɔle yɛ nwo bane wɔ adenle nu nee menli kɔsɔɔti mɔɔ yɛvale bɛ avinli yɛrale la asa anu a.+ 18 Gyihova voanle menli kɔsɔɔti nee Amɔlema mɔɔ dɛnlanle azɛlɛ ne azo kolaa na yɛara la. Yemɔti yɛdayɛ noko yɛbazonle Gyihova, ɔluakɛ yemɔ a ɔle yɛ Nyamenle a.”
19 Na Dwɔhyua zele menli ne kɛ: “Bɛnrɛhola bɛnrɛzonle Gyihova, ɔluakɛ ɔle Nyamenle nwuanzanwuanza;+ ɔle Nyamenle mɔɔ ɔkulo kɛ bɛsonle ɔ ngomekye.+ Ɔnrɛva bɛ mɛladonlɛ* nee bɛ ɛtane ne mɔ ɔnrɛhyɛ bɛ.+ 20 Saa Gyihova yɛ kpalɛ maa bɛ bɔbɔ, na bɛkpo ye bɛkɔsonle adalɛ nyamenle ne mɔ a, ɔbahakyi ɔ nye yeara bɛ nwo zo na yeazɛkye bɛ.”+
21 Noko menli ne zele Dwɔhyua kɛ: “Kyɛkyɛ, yɛbazonle Gyihova!”+ 22 Ɔti Dwɔhyua zele menli ne kɛ: “Bɛdabɛ bɛdi daselɛ kɛ bɛdabɛ mumua ne a bɛkpa kɛ bɛbazonle Gyihova a.”+ Na bɛhanle kɛ: “Yɛle alasevolɛ.”
23 “Yemɔti bɛye adalɛ nyamenle ne mɔ mɔɔ wɔ bɛ avinli la bɛgua bɛ lɔ na bɛva bɛ ahonle bɛmaa Gyihova, Yizilayɛ Nyamenle ne.” 24 Menli ne zele Dwɔhyua kɛ: “Yɛbazonle Gyihova yɛ Nyamenle ne, yɛɛ yɛbadie ɔ ne!”
25 Ɔti Dwɔhyua nee menli ne yɛle ngyekyeleɛ wɔ kenle zɔhane na ɔmaanle bɛ mɛla nee ngyehyɛleɛ wɔ Hyikɛm. 26 Akee Dwɔhyua hɛlɛle edwɛkɛ ɛhye mɔ wɔ Nyamenle Mɛla buluku+ ne anu na ɔvale bolɛ kpole bie+ ɔkpɔnlanle baka kpole ne mɔɔ gyi Gyihova ɛzonlenlɛsua ne anwo ɛkɛ ne la abo.
27 Dwɔhyua zele menli ne amuala kɛ: “Bɛnlea! Bolɛ ɛhye bayɛ daselɛ amaa yɛ,+ ɔluakɛ yede edwɛkɛ biala mɔɔ Gyihova ɛha ɛhile yɛ la, na ɔbayɛ daselɛ yeamaa bɛ amaa bɛamkpo bɛ Nyamenle ne.” 28 Akee Dwɔhyua maanle menli ne hɔle, na ko biala hɔle ye agyapadeɛ ne azo.+
29 Ɛhye anzi, Gyihova sonvolɛ Dwɔhyua, Nɛn ara ne wule wɔ mekɛ mɔɔ ɛnee yeli ɛvolɛ 110 la.+ 30 Yemɔti bɛziele ye wɔ ye azɛlɛ ne mɔɔ wɔ Temenate-silaa+ la azo wɔ Yifelaem awoka zo, wɔ Geeyahye Boka ne sɔlɔ. 31 Yizilayɛma hɔle zo zonlenle Gyihova wɔ Dwɔhyua ngoane mekɛ kɔsɔɔti anu nee mgbanyima mɔɔ Dwɔhyua wule la ɛnee bɛde aze na bɛnwunle ninyɛne kɔsɔɔti mɔɔ Gyihova yɛle maanle Yizilayɛma la mekɛ zo.+
32 Bɛziele Dwosefi mbowule+ ne mɔɔ Yizilayɛma nee ye vi Yigyibiti rale la wɔ Hyikɛm, wɔ azɛlɛ ne mɔɔ Gyekɔbo dɔle ye dwɛtɛ fufule 100+ vile Hyikɛm papa Heemɔ amra ne mɔ ɛkɛ la azo;+ na ɔyɛle Dwosefi abozoamra ne mɔ agyapadeɛ.+
33 Aalɔn ara Ɛlieza noko wule.+ Yemɔti bɛziele ye wɔ ɔ ra Fenɛhaze+ Boka ne mɔɔ bɛvale bɛmaanle ye wɔ Yifelaem awoka zo la azo.