Ditilɔnomi
29 Ɛhye mɔ a le edwɛkɛ mɔɔ wɔ ngyekyeleɛ ne mɔɔ Gyihova hanle hilele Mosisi kɛ ɔ nee Yizilayɛma ɛyɛ wɔ Mowabe azɛlɛ zo la anu a. Ɔyɛle ngyekyeleɛ ɛhye ɔvale ɔbokale mɔɔ ɔ nee bɛ yɛle ye wɔ Hɔlɛbe la anwo.+
2 Akee Mosisi vɛlɛle Yizilayɛma kɔsɔɔti na ɔhanle ɔhilele bɛ kɛ: “Bɛdabɛ bɛnwunle mɔɔ Gyihova vale yɛle Falo nee ye azonvolɛ yɛɛ ye azɛlɛ ne amuala wɔ Yigyibiti azɛlɛ zo la wɔ bɛ nye zo,+ 3 ndɛnebualɛ* mgbole mɔɔ bɛ nye nwunle ye, sɛkɛlɛneɛ mgbole nee nwanwane ninyɛne ne mɔ.+ 4 Noko Gyihova ɛtɛmaanle bɛ ahonle mɔɔ bɛbava bɛade ɔ bo nee ɛnyelɛ mɔɔ bɛbava bɛanwu ye yɛɛ ɛnzolɛ mɔɔ bɛbava bɛade la too badwu ɛnɛ kenle ye.+ 5 ‘Mekɛ mɔɔ ɛnee melɛkile bɛ adenle ɛvolɛ 40 wɔ fienemgbole ne anu+ la, bɛ adɛladeɛ antete yɛɛ bɛ gyakɛ abo mgbɔlaboa antete.+ 6 Bɛanli paano yɛɛ bɛanno nwanye anzɛɛ nza gyɛne biala, amaa bɛanwu kɛ medame a mele Gyihova bɛ Nyamenle ne a.’ 7 Ɛhye anzi bɛradwule ɛke, na Hɛhyebɔn+ Belemgbunli Saehɔn nee Beehyan+ Belemgbunli Ɔɔgo vale konle radoale yɛ noko yɛlile bɛ nwo zo konim.+ 8 Akee yɛvale bɛ azɛlɛ ne yɛmaanle Wulubɛnema, Gaadema yɛɛ Manasɛ abusua foa ko ne kɛ bɛ agyapadeɛ.+ 9 Ɔti, bɛnlea bɛli edwɛkɛ ɛhye mɔɔ wɔ ngyekyeleɛ ne anu la azo, amaa debie biala mɔɔ bɛbayɛ la ayɛ boɛ.+
10 “Bɛ muala bɛgyi Gyihova bɛ Nyamenle ne anyunlu ɛnɛ, mbusua mgbanyima, bɛ mgbanyima, bɛ menli titili, Yizilayɛ nrenyia biala, 11 bɛ mra, bɛ ye mɔ+ yɛɛ ɛyɛvolɛ+ mɔɔ wɔ bɛ avinli wɔ bɛ azokoɛleɛ ɛkɛ ne la, ɔvi sonla mɔɔ kɔ ayɛne maa bɛ kɔdwu mɔɔ sesa nzule maa bɛ la anwo zo. 12 Bɛra ɛke ɛnɛ kɛ bɛ nee Gyihova bɛ Nyamenle ne bayɛ ngyekyeleɛ na bɛali ndane ne mɔɔ Gyihova bɛ Nyamenle ne baha la azo+ 13 amaa yeava bɛ yeayɛ ye menli ɛnɛ+ na yeayɛ bɛ Nyamenle,+ kɛ mɔɔ ɔbɔle bɛ ɛwɔkɛ na ɔhanle nwolɛ ndane ɔhilele bɛ nenyia mɔ, Ebileham,+ Ayezeke+ nee Gyekɔbo+ la.
14 “Kɛkala tɛ bɛ ngome a me nee bɛ ɛlɛyɛ ngyekyeleɛ ɛhye na meaha ndane ɛhye a, 15 emomu, me nee bɛdabɛ mɔɔ bɛgyi yɛ nwo ɛke ɛnɛ wɔ Gyihova yɛ Nyamenle ne anyunlu yɛɛ bɛdabɛ mɔɔ bɛnle yɛ nwo ɛke ɛnɛ la. 16 (Ɔluakɛ bɛdabɛ bɛze kɛzi yɛdɛnlanle Yigyibiti azɛlɛ zo nee kɛzi yɛluale maanle ngakyile azɛlɛ zo wɔ yɛ adendulɛ ne anu la kpalɛ.+ 17 Na bɛnwunle bɛ ninyɛndane nee bɛ bɛkyi ananze*+ ne mɔ mɔɔ bɛva mbaka nee awolɛ, dwɛtɛ fufule yɛɛ nvutuke bɛyɛ la wɔ bɛ ɛkɛ.) 18 Bɛnlea boɛ na nrenyia anzɛɛ raalɛ, abusua anzɛɛ ekpunli bie mɔɔ wɔ bɛ avinli ɛnɛ la ahonle angakyi anvi Gyihova bɛ Nyamenle ne anwo angɔnzonle maanle maanle zɔhane mɔ nyamenle ne bie,+ amaa bɛannwu ndinli mɔɔ so ma mɔɔ le pɔezen nee ɛnwonle la wɔ bɛ avinli.+
19 “Na saa awie te edwɛkɛ mɔɔ wɔ ndane ɛhye anu la na ɔmemaa ɔ nwo zo ɔka kɛ, ‘Medi me ahonle nzi bɔbɔ a mebanyia anzodwolɛ,’ na ɔfa ɔsɛkye debie biala* mɔɔ wɔ ye adenle nu la a, 20 Gyihova ɛnrɛva ɛnrɛhyɛ ye.+ Emomu, Gyihova ɛya kpole ne bara sonla zɔhane anwo zo, na munzule mɔɔ bɛhɛlɛ ye wɔ buluku ɛhye anu la bara ɔ nwo zo,+ na Gyihova bakyikyi ye duma avi ewiade ye. 21 Akee Gyihova baye ɔ ngome yeavi Yizilayɛ mbusua ne mɔ avinli yeamaa munzule ado ye kɛ mɔɔ amowa ne mɔɔ wɔ ngyekyeleɛ ne mɔɔ bɛhɛlɛ ye wɔ Mɛla buluku ɛhye anu kɔsɔɔti kile la.
22 “Saa bɛ mra awolɛndoazo mɔɔ bara kenle bie la nee ɛyɛvolɛ mɔɔ vi azɛlɛ mɔɔ wɔ moamoa la azo nwu ngyegyelɛ mɔɔ wɔ azɛlɛ ne azo, munzule mɔɔ Gyihova ɛva ɛra zo la— 23 sɔlefa nee ngyenle yɛɛ senle mɔɔ ɔvale ɔyelale ye, amaa bɛanlua debie wɔ azɛlɛ ne azo anzɛɛ debie gyɛne biala anfifi zo kɛ Sodɔm nee Gomɔla,+ Ademaa nee Zebɔyem,+ mɔɔ Gyihova vale ɛya kpole zɛkyele bɛ la a— 24 bɛ nee maanle maanle kɔsɔɔti baha kɛ, ‘Duzu ati a Gyihova yɛle ɛhye wɔ azɛlɛ ne azo a?+ Duzu a maanle ɔvale ɛya wuluwulu kpole zɛhae a?’ 25 Akee bɛbaha kɛ, ‘Kɛmɔ bɛkpole Gyihova, bɛ nenyia mɔ Nyamenle ne ngyekyeleɛ ne+ mɔɔ ɔ nee bɛ yɛle wɔ mekɛ mɔɔ ɔyele bɛ ɔvile Yigyibiti azɛlɛ zo la ati ɔ.+ 26 Bɛhɔzonlenle nyamenle gyɛne na bɛbɔle bɛ ti aze bɛmaanle bɛ, nyamenle mɔɔ bɛnze bɛ na ɔtɛmaanle bɛ adenle kɛ bɛzonle bɛ la.*+ 27 Akee Gyihova ɛya wuluwulu ne rale azɛlɛ zɔhane azo na ɔmaanle munzule kɔsɔɔti mɔɔ bɛhɛlɛ ye wɔ buluku ɛhye anu la rale zolɛ.+ 28 Ɔti Gyihova vale ɛya, ye ahonle futule na ɔvale ɛya kpole ɔdule bɛ ɔvile bɛ azɛlɛ ne azo,+ na ɔmaanle bɛhɔle azɛlɛ gyɛne zo, ɛleka mɔɔ bɛtɛbɔ ye ɛnɛ la.’+
29 “Ninyɛne mɔɔ vea la le Gyihova yɛ Nyamenle ne ɛdeɛ,+ yɛɛ ninyɛne mɔɔ bɛla ye ali la le yɛdayɛ nee yɛ bo zo amra ɛdeɛ dahuu, amaa yɛali edwɛkɛ mɔɔ wɔ Mɛla ɛhye anu la kɔsɔɔti azo.+