Ditilɔnomi
24 “Saa nrenyia gya raalɛ na akee ɔ nye ɛnlie raalɛ ne anwo ɔluakɛ yenwu debie ɛtane wɔ ɔ nwo a, ɔwɔ kɛ ɔkɛlɛ ewolebɔlɛ kɛlata ɔwula ɔ sa nu+ na ɔmaa ɔfi ye sua nu ɛkɛ.+ 2 Saa ɔfi ye sua nu ɛkɛ a, nrenyia gyɛne bahola agya ye.+ 3 Saa ɔ hu ne mɔɔ tɔ zolɛ nwiɔ la kpɔ* ye na ɔkɛlɛ ewolebɔlɛ kɛlata ɔwula ɔ sa nu na ɔmaa ɔfi ye sua nu ɛkɛ anzɛɛ saa nrenyia ne mɔɔ ɛgya ye la wu a, 4 ɔ hu ne mɔɔ limoale voanle ye la ɛnrɛhola ɛnrɛgya ye bieko wɔ mekɛ mɔɔ raalɛ ne anwo ɛgua evinli la, ɔluakɛ ɛhye le Gyihova kyibadeɛ. Ɔnle kɛ bɛfa ɛtane bɛkɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ kɛ bɛ agyapadeɛ la azo.
5 “Saa nrenyia gya raalɛ ɛkɛ ne ala a, ɔnle kɛ bɛmaa ɔkɔ konle anzɛɛ bɛmaa ye gyima gyɛne biala. Ɔwɔ kɛ bɛmaa ɔtɛnla sua nu ɛvolɛ ko na ɔmaa ɔ ye anye die.+
6 “Ɔnle kɛ awie biala die awie ɛdibolɛ anzɛɛ ye bolɛ ralɛ fa di agyinlanu bɔ ye bosea,+ ɔluakɛ ɛhye bayɛ kɛ ɔlɛye ɔ nloa anu aleɛ* yeali agyinlanu la.
7 “Saa bɛnwu kɛ awie ɛhye ɔ mediema Yizilayɛma ne mɔ bie ɛvea na yehile ye nyane na yedɔne ye a,+ ɔwɔ kɛ ahenle mɔɔ hyele ɔ diema ne veale la wu.+ Ɔwɔ kɛ bɛye debie mɔɔ le ɛtane la bɛfi bɛ avinli.+
8 “Saa kokobɛ* tɔ bɛ avinli a, bɛnlea bɛyɛ debie biala mɔɔ Livae ɛsɔfo ne mɔ baha ahile bɛ la.+ Bɛnlea bɛyɛ mɔɔ menganle mengilele ɛsɔfo ne mɔ la pɛpɛɛpɛ. 9 Bɛhakye mɔɔ Gyihova bɛ Nyamenle ne vale yɛle Meleam wɔ adenle nu wɔ mekɛ mɔɔ bɛvi Yigyibiti bɛlɛba la.+
10 “Saa ɛbɔ ɛ gɔnwo bosea bie a,+ ɔnle kɛ ɛwolo ye sua nu kɛ ɛkalie deɛ ne mɔɔ ɔfa yeali agyinlanu la. 11 Ɔwɔ kɛ ɛgyinla alienwo ɛmaa ahenle mɔɔ liele bosea ne la fa deɛ ne mɔɔ ɔfa yeali agyinlanu la bɛlɛ wɔ wɔ alienwo ɛkɛ ne. 12 Na saa ahenle le ehyianli a, ɔnle kɛ ɛfa deɛ ne mɔɔ ɔvale ɔlile agyinlanu la ɛsie ɛ nwo too ɛkɔda.+ 13 Saa sɛnzɛne ne kɔtɔ ala a, ɔwɔ kɛ ɛfa ɛdanlɛ ne mɔɔ ɔvale ɔlile agyinlanu la ɛkɔmaa ye na ɔfa ye ɛdanlɛ ne ɔkɔda,+ na ɔbayila wɔ; na Gyihova wɔ Nyamenle ne babu ye kɛ ɔle nyɛleɛ mɔɔ le tenlene.
14 “Ɔnle kɛ ɛsisi ɛkpanli mɔɔ ɔ nwo ɛhyele ye na ɔlɛdi ehyia la, saa ɔle ɛ mediema ne mɔ bie o anzɛɛ ɛyɛvolɛ mɔɔ de bɛ azuamgbole ne mɔ bie azo*+ wɔ bɛ azɛlɛ ne azo la o. 15 Ɔwɔ kɛ ɛfa ye ahatualɛ ɛmaa ye kenle ko zɔhane ala+ kolaa na sɛnzɛne ne ahɔdɔ, ɔluakɛ ɔ nwo ɛhyele ye yɛɛ ye ngoane* gyi ye ahatualɛ ne azo. Tɛ ye zɔ a, ɛdawɔ ti ɔbazu yeavɛlɛ Gyihova na ɛbali ɛtane nwo fɔlɛ.+
16 “Ɔnle kɛ bɛku selɛma wɔ mɔɔ bɛ mra kɛyɛ la anwo, yɛɛ ɔnle kɛ bɛku ngakula wɔ mɔɔ bɛ papa mɔ kɛyɛ la anwo.+ Ɔwɔ kɛ bɛku awie wɔ ɔdaye mumua ne ye ɛtane ti.+
17 “Saa ɛlɛdi ɛyɛvolɛ anzɛɛ arisa* edwɛkɛ a, mmadi mɔguazo,+ yɛɛ mmadie kunlavolɛ ɛdanlɛ ɛdi agyinlanu ɛbɔ ye bosea.+ 18 Kakye kɛ ɛnee ɛle akɛlɛ wɔ Yigyibiti yɛɛ Gyihova wɔ Nyamenle ne liele wɔ vile ɛkɛ a.+ Ɔti a melɛka meahile wɔ kɛ ɛli mɛla ɛhye azo la.
19 “Saa ɛte wɔ ɛya nu ma na ɛ rɛle fi bie mɔɔ wɔkyekye ye file la wɔ ɛya ne anu a, mmasia ɛkɔfa. Gyakyi maa ɛyɛvolɛ, arisa nee kunlavolɛ,+ amaa Gyihova wɔ Nyamenle ne ayila wɔ wɔ debie biala mɔɔ ɛkɛyɛ la anu.+
20 “Saa ɛtete wɔ ɔlivi baka zo ma a, mmasia ɛkɔtete mɔɔ ɛha ye ngane ne mɔ azo la. Ɔwɔ kɛ ɛgyakyi mɔɔ ɛha la ɛmaa ɛyɛvolɛ, arisa nee kunlavolɛ.+
21 “Saa ɛtete wɔ vanye egyinli nu ma a, ɔnle kɛ ɛsia ɛkɔtete mɔɔ ɛha la. Ɔwɔ kɛ ɛgyakyi mɔɔ ɛha la ɛmaa ɛyɛvolɛ, arisa nee kunlavolɛ. 22 Kakye kɛ ɛnee ɛle akɛlɛ wɔ Yigyibiti azɛlɛ zo. Ɔti a melɛka meahile wɔ kɛ ɛyɛ ɛhye la.