Ditilɔnomi
19 “Saa Gyihova bɛ Nyamenle ne sɛkye maanle maanle ne mɔ mɔɔ Gyihova bɛ Nyamenle ne ɛlɛfa bɛ azɛlɛ ne amaa bɛ la, na bɛfoa bɛ na bɛtɛnla bɛ azuamgbole ne mɔ azo nee bɛ azua ne mɔ anu a,+ 2 ɔwɔ kɛ bɛye azuamgbole nsa bɛsie ɛkɛ wɔ bɛ azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo.+ 3 Ɔwɔ kɛ bɛkyɛ azɛlɛ ne mɔɔ Gyihova bɛ Nyamenle ne ɛva ɛmaa bɛ kɛ bɛdɛnla zolɛ la anu nsa, na bɛsiezie ndenle ne mɔ mɔɔ kɔ zɔhane azuamgbole ne mɔ azo la amaa awie mɔɔ kɛhu sonla la ahola anriandi ahɔ ɛkɛ.
4 “Mɔɔ ɔwɔ kɛ bɛyɛ ye wɔ awie mɔɔ kɛhu sonla na ɔkɛnriandi ɔkɛhɔ ɛkɛ amaa yeadɛnla ngoane nu la anwo la ɛne: Saa tɛ ɔ nye fuu a ɔbɔle ɔ gɔnwo ne yɛɛ ɔmkpɔ ye dɛba;+ 5 emomu ɔ nee ɔ gɔnwo ne hɔle ɛbɔ nu kɛ bɛkapepɛ ɛyɛne na mɔɔ ɔmaanle ɔ sa zo kɛ ɔfa akuma ne yeapɛ baka ne la yɛɛ akuma ne ati ne dule vile ye baka ne azo hɔbɔle ɔ gɔnwo ne hunle ye a, ɔwɔ kɛ ahenle mɔɔ ɛhu sonla ne la nriandi kɔ azuamgbole ɛhye mɔ ko azo amaa yeadɛnla ngoane nu.+ 6 Saa tɛ ye zɔ a, kɛmɔ adenle ne mɔɔ kɔ suakpole ne azo la wale la ati, bie a ahenle mɔɔ di mogya nwo nzenralɛ+ ne la bava ɛya* avoa ahenle mɔɔ ɛhu sonla ne la yeahɔdo ye na yeahu ye. Noko, anrɛɛ ɛnee ɔnle kɛ ɔwu ɔluakɛ ɛnee ɔmkpɔ ɔ gɔnwo ne dɛba.+ 7 Ɛhye ati a melɛka meahile bɛ kɛ: ‘Bɛye azuamgbole nsa bɛzie ɛkɛ ne la.’
8 “Saa Gyihova bɛ Nyamenle ne maa bɛ azɛlɛ ne yɛ kpole,+ kɛ mɔɔ ɔhanle nwolɛ ndane ɔhilele bɛ nenyia mɔ la na ɔfa azɛlɛ ne mɔɔ ɔbɔle nwolɛ ɛwɔkɛ kɛ ɔbava yeamaa bɛ nenyia mɔ+ la amuala ɔmaa bɛ a 9 —saa bɛdi mɛla ɛhye mɔɔ melɛfa meamaa bɛ ɛnɛ la amuala azo nɔhalɛ nu, bɛkulo Gyihova bɛ Nyamenle ne na bɛdua ye ndenle ne mɔ+ anu dahuu a—bɛbava azuamgbole nsa bɛaboka nsa ne anwo.+ 10 Ɛhye ɛnrɛmaa bɛnrɛha tenlenenli mogya bɛnrɛgua+ wɔ bɛ azɛlɛ ne mɔɔ Gyihova bɛ Nyamenle ne bava amaa bɛ la azo, yɛɛ bɛnrɛli mogya nwo fɔlɛ.+
11 “Noko saa awie kpɔ ɔ gɔnwo+ na ɔsia ye adenle nu ɔteta ye na ɔboda ye* kpole na ɔwu, na ahenle nriandi kɔ azuamgbole ɛhye mɔ ko azo a, 12 ɔwɔ kɛ mgbanyima mɔɔ wɔ ye suakpole ne azo la soa maa bɛkɔfa ye bɛfi nehane na bɛfa ye bɛwula ahenle mɔɔ di mogya nwo nzenralɛ ne la asa anu na ɔku ye.+ 13 Ɔnle kɛ bɛse* ye anwunvɔne, na ɔwɔ kɛ bɛye tenlenenli mogya nwo fɔlɛlilɛ bɛfi Yizilayɛ+ amaa yeawie bɛ boɛ.
14 “Saa bɛnyia bɛ agyapadeɛ ne wɔ azɛlɛ ne mɔɔ Gyihova bɛ Nyamenle ne ɛlɛfa amaa bɛ la azo a, ɔnle kɛ bɛtu bɛ gɔnwo ɛweɛne+ bɛfi ɛleka mɔɔ ye nenyia mɔ vale ziele la.
15 “Dasevolɛ ko edwɛkɛ ɛnrɛhola ɛnrɛbua awie fɔlɛ* wɔ nvonleɛ anzɛɛ ɛtane bie mɔɔ yeyɛ la anwo.+ Ɔwɔ kɛ edwɛkɛ ne gyinla alasevolɛ nwiɔ anzɛɛ nsa daselɛlilɛ* zo.+ 16 Saa dasevolɛ mɔɔ lɛ adwenle ɛtane la di daselɛ tia awie na ɔka kɛ yeyɛ ɛtane bie a,+ 17 menli nwiɔ ne mɔɔ edwɛkɛ ne ɛdɔ bɛ avinli la baragyinla Gyihova anyunlu, ɛsɔfo ne mɔ yɛɛ ndɛnebuavolɛma mɔɔ ɛlɛsonle wɔ zɔhane mekɛ ne anu la anyunlu.+ 18 Ndɛnebuavolɛma ne banleɛnlea edwɛkɛ ne anu kpalɛ,+ na saa ahenle mɔɔ lile daselɛ ne la lile dasewia yɛɛ yeha adalɛ edwɛkɛ yedo ɔ diema ne anwo zo a, 19 ɔwɔ kɛ bɛfa debie mɔɔ ɔbɔle kpɔkɛ kɛ ɔfa yeayɛ ɔ diema ne la bɛyɛ ye,+ na ɔwɔ kɛ bɛye debie mɔɔ ɛnle kpalɛ la bɛfi bɛ avinli.+ 20 Menli mɔɔ ɛha la bade na bɛazulo, na bɛnrɛyɛ debie ɛtane zɛhae bie ɛlɛ wɔ bɛ avinli.+ 21 Ɔnle kɛ bɛse* anwunvɔne:+ Ngoane* ɛzie ngoane* bo zo, ɛnyelɛ ɛzie ɛnyelɛ bo zo, egyele ɛzie egyele bo zo, ɛsalɛ ɛzie ɛsalɛ bo zo, egyakɛ ɛzie egyakɛ bo zo.+