Ditilɔnomi
16 “Bɛhakye siane Ebebe* ne na bɛli Gyihova bɛ Nyamenle ne Akpabɛnwo ne,+ ɔluakɛ Gyihova bɛ Nyamenle ne yele bɛ vile Yigyibiti nɔɔzo wɔ siane Ebebe ne anu.+ 2 Ɔwɔ kɛ bɛfa boane nee ɛnlankɛ+ bɛbɔ Akpabɛnwo afɔle bɛmaa Gyihova bɛ Nyamenle ne+ wɔ ɛleka mɔɔ Gyihova kɛkpa kɛva ye duma kɛdo zolɛ la.+ 3 Ɔnle kɛ bɛfa debie biala mɔɔ mgbɔvonle wɔ nu la bɛboka nwo bɛdi;+ ɔluakɛ ɔwɔ kɛ bɛdi paano mɔɔ mgbɔvonle ɛnle nu la, amaneɛnwunlɛ paano ne, kenle nsuu, ɔluakɛ bɛvile Yigyibiti azɛlɛ zo ndɛndɛ.+ Bɛyɛ ɛhye amaa bɛahakye kenle mɔɔ bɛvile Yigyibiti azɛlɛ zo la wɔ mekɛ ala mɔɔ bɛde ngoane nu la.+ 4 Ɔnle kɛ bɛnwu ɛdɔkɛ mɔɔ nyinyia la wɔ bɛ azɛlɛ ne amuala azo too kenle nsuu,+ yɛɛ ɔnle kɛ nane mɔɔ bɛbava bɛabɔ afɔle wɔ kenle mɔɔ limoa la nɔsolɛ nu la bie ka ɛkɛ ne nɔe ne too aleɛ kye zo.+ 5 Bɛnrɛmaa bɛnrɛhu nane ne mɔɔ bɛbava bɛabɔ Akpabɛnwo afɔle ne la wɔ sua gyɛne biala mɔɔ Gyihova bɛ Nyamenle ne ɛlɛfa amaa bɛ la azo. 6 Emomu ɔwɔ kɛ bɛku ye wɔ ɛleka mɔɔ Gyihova bɛ Nyamenle ne kɛkpa kɛva ye duma kɛdo zolɛ la. Ɔwɔ kɛ bɛku Akpabɛnwo nane ne* nɔsolɛ nu wɔ mekɛ mɔɔ sɛnzɛne ne kɛdɔ ala la,+ kɛ mekɛ mɔɔ bɛvile Yigyibiti la. 7 Ɔwɔ kɛ bɛto na bɛdi ye+ wɔ ɛleka mɔɔ Gyihova bɛ Nyamenle ne kɛhile la,+ na saa aleɛ kye a, bɛazia bɛahɔ bɛ ɛdanlɛ azua ne mɔ anu. 8 Ɔwɔ kɛ bɛdi paano mɔɔ mgbɔvonle ɛnle nu la kenle nsia, na kenle nsuu ne azo, bɛbayɛ nyianu nwuanzanwuanza bɛamaa Gyihova bɛ Nyamenle ne. Ɔnle kɛ bɛyɛ gyima biala.+
9 “Ɔwɔ kɛ bɛtia dapɛne nsuu. Ɔwɔ kɛ bɛbɔ ɔ bo bɛtia dapɛne nsuu ne bɛfi kenle mɔɔ bɛkɛlimoa bɛkɛva ɛdedadeɛ bɛkɛha bɛ ma kɛ bɛte la.+ 10 Akee bɛnlea kɛzi Gyihova bɛ Nyamenle ne ɛyila bɛ la anwo+ na bɛvi bɛ ɛhulolɛ nu bɛva bɛ sa nu afɔlebɔdeɛ bɛrali Gyihova bɛ Nyamenle ne Dapɛne Dapɛne Ɛvoyia ne.+ 11 Na die ɛ nye wɔ Gyihova wɔ Nyamenle ne anyunlu, ɛ nee ɛ ra nrenyia, ɛ ra raalɛ, wɔ akɛlɛ nrenyia, wɔ akɛlɛ raalɛ, Livaenli mɔɔ wɔ bɛ azuamgbole ne mɔ azo,* ɛyɛvolɛ, arisa* yɛɛ kunlavolɛ mɔɔ wɔ bɛ avinli la, wɔ ɛleka mɔɔ Gyihova wɔ Nyamenle ne kɛkpa kɛva ye duma kɛdo zolɛ la.+ 12 Bɛhakye kɛ ɛnee bɛle ngɛkɛlɛ wɔ Yigyibiti+ na bɛdie na bɛli mɛla ɛhye mɔ azo.
13 “Ɔwɔ kɛ bɛdi Kpɔda Bo Ɛdɛnlanlɛ* Ɛvoyia ne+ too kenle nsuu wɔ mekɛ mɔɔ bɛlɛboɔboa bɛ ma, bɛ nwole nee bɛ nwanye nloa la. 14 Die ɛ nye wɔ bɛ ɛvoyialilɛ ne anu,+ ɛ nee ɛ ra nrenyia, ɛ ra raalɛ, wɔ akɛlɛ nrenyia, wɔ akɛlɛ raalɛ, Livaenli, ɛyɛvolɛ, arisa yɛɛ kunlavolɛ mɔɔ wɔ bɛ azuamgbole ne mɔ azo la. 15 Bɛbali Gyihova bɛ Nyamenle ne ɛvoyia ne kenle nsuu+ wɔ ɛleka mɔɔ Gyihova kɛhile la ɔluakɛ Gyihova bɛ Nyamenle ne bayila bɛ aleɛ kɔsɔɔti nee debie biala mɔɔ bɛkɛyɛ la azo,+ na fɛlɛko ala a bɛbali a.+
16 “Ɔwɔ kɛ bɛ mrenyia ne mɔ amuala kɔ Gyihova bɛ Nyamenle ne anyunlu fane nsa wɔ ɛvolɛ ne anu wɔ ɛleka mɔɔ ɔkɛhile la; wɔ Paano Mɔɔ Mgbɔvonle Ɛnle Nu Ɛvoyia ne,+ Dapɛne Dapɛne Ɛvoyia ne,+ nee Kpɔda Bo Ɛdɛnlanlɛ* Ɛvoyia ne+ abo, na ɔnle kɛ bɛ nuhua biala fa ɔ sa mgbane ba Gyihova anyunlu. 17 Ɔwɔ kɛ awie ko biala nea kɛzi Gyihova bɛ Nyamenle ne ɛyila ye la na ɔfa nwolɛ ahyɛlɛdeɛ ɔkɔ.+
18 “Ɔwɔ kɛ bɛkpa ndɛnebuavolɛma+ nee menli titili bɛmaa abusua biala wɔ azua* kɔsɔɔti mɔɔ Gyihova bɛ Nyamenle ne ɛlɛfa amaa bɛ la azo, na ɔwɔ kɛ bɛbua menli ne ndɛne fɔɔnwo. 19 Ɔnle kɛ bɛdi mɔguazo,+ bɛnea sonla nyunlu,+ anzɛɛ bɛdie belaebo, ɔluakɛ belaebo si nrɛlɛbɛvolɛ nye+ yɛɛ ɔsɛkye tenlenenli edwɛkɛ. 20 Pɛlepɛlelilɛ—pɛlepɛlelilɛ ala a bɛli ɔ nzi a,+ amaa bɛahɔ zo bɛadɛnla ngoane nu na bɛahɔva azɛlɛ ne mɔɔ Gyihova bɛ Nyamenle ne ɛlɛfa amaa bɛ la.
21 “Ɔnle kɛ bɛdua baka biala bɛfa bɛyɛ ɛzonlenlɛ baka*+ wɔ Gyihova bɛ Nyamenle ne afɔlemokyea ne mɔɔ bɛbazi la anwo.
22 “Ɔnle kɛ bɛkpɔnla ɛzonlenlɛ pila bɛmaa bɛ nwo,+ ɔle debie mɔɔ Gyihova bɛ Nyamenle ne kyi a.