Mɔɔ Tɔ Zo Nwiɔ Kɔmaa Kɔlentema

3 Yɛlɛbɔ ɔ bo yɛahanvo yɛ nwo bieko ɔ? Anzɛɛ ɔhyia kɛ yɛfa nganvolɛ ngɛlata yɛbɛlɛ bɛ anzɛɛ yɛdie bie yɛfi bɛ ɛkɛ ne, kɛ mɔɔ bie mɔ yɛ la ɔ? 2 Bɛdabɛ a bɛle yɛ kɛlata+ mɔɔ bɛhɛlɛ ye wɔ yɛ ahonle zo mɔɔ menli kɔsɔɔti nwu ye na bɛkenga a. 3 Ɔluakɛ ɔda ali kɛ bɛle Kelaese kɛlata mɔɔ yɛhɛlɛ kɛ azonvolɛ a,+ tɛ ɛnke a yɛvale yɛhɛlɛle a, emomu tease Nyamenle ne sunsum ne a yɛvale yɛhɛlɛle a, yɛangɛlɛ ye wɔ awolɛ ndɛbandɛba zo+ emomu ahonle mɔɔ le kɛ awolɛ ndɛbandɛba mɔɔ bɛva nwonane bɛyɛ la azo.+

4 Yɛlɛ anwodozo ɛhye wɔ Nyamenle anu ɔlua Kelaese anwo zo. 5 Yɛnga kɛ yɛdayɛ mumua ne yɛfɛta bɔkɔɔ kɛ yɛyɛ gyima ɛhye, emomu Nyamenle a ɛmaa yɛfɛta bɔkɔɔ a,+ 6 yemɔ a yemaa yɛfɛta bɔkɔɔ kɛ ngyekyeleɛ fofolɛ bie anwo sonvolɛma a,+ ɔnvi mɛla ne mɔɔ bɛhɛlɛ la,+ emomu ɔvi sunsum ne; ɔluakɛ mɛla ne mɔɔ bɛhɛlɛ la fa ewule fɔlɛbualɛ ba,+ na sunsum ne maa ngoane.+

7 Na saa mɛla ne mɔɔ fa ewule ba mɔɔ bɛhɛlɛle ye wɔ awolɛ zo la+ vale anyunlunyia zɛhae rale na Yizilayɛma angola annea Mosisi anyunlu ɔlua anyunlunyia ne mɔɔ wɔ ɔ nyunlu,+ anyunlunyia mɔɔ ɛnee bapɛ nu la ati a, 8 ɛnee kɛ ɔkɛyɛ mɔɔ sunsum ne mɔɔ bɛfa bɛmaa la+ ɛnrɛnyia anyunlunyia kpole ɛnrɛdɛla ɛhye ɛ?+ 9 Na saa mɛla ne mɔɔ fa fɔlɛbualɛ ba la+ lɛ anyunlunyia a,+ ɛnee mɔɔ fa tenleneyɛlɛ ba la lɛ anyunlunyia kpole mɔɔ bo zo a!+ 10 Nɔhalɛ nu, mɔɔ bɛwulale ye anyunlunyia bɔbɔ la, bɛye ye anyunlunyia ne, ɔlua anyunlunyia ne mɔɔ bo zo la ati.+ 11 Na saa mɔɔ ɛnee ɛlɛpɛ nu la rale anyunlunyia nu a,+ ɛnee nea kɛzi mɔɔ badɛnla ɛkɛ ne dahuu la anyunlunyia ne bayɛ kpole a!+

12 Kɛmɔ yɛlɛ anyelazo ɛhye la ati,+ yɛtendɛ mɔɔ yɛnzulo,* 13 na yɛanyɛ mɔɔ Mosisi yɛle la bie wɔ mekɛ mɔɔ ɔvale ɛdanlɛ ɔhedale ɔ nyunlu+ amaa Yizilayɛma anvede bɛ nye annea mɔɔ bɛbaye bɛavi ɛkɛ ne la awieleɛ. 14 Emomu bɛ adwenle angola ande ɔ bo.+ Badwu ɛnɛ, bɛ adwenle ne azo ɛheda kɛ asɛɛ bɛva debie bɛheda zo la, na bɛngola bɛnde ngyekyeleɛ dɛba ne abo,+ ɔluakɛ Kelaese angome a bahola aye deɛ ɛhye avi ɛkɛ a.+ 15 Nɔhalɛ nu, badwu ɛnɛ, mekɛ biala mɔɔ bɛkɛgenga Mosisi edwɛkɛ ne la,+ ɛnee ɔle kɛ asɛɛ debie tɛkeda bɛ ahonle ne mɔ azo la.+ 16 Noko saa awie kakyi ba Gyihova* ɛkɛ a, ɛnee bɛye mɔɔ heda ɔ nyunlu la.+ 17 Na Gyihova* a le Sunsum ne a,+ na ɛleka mɔɔ Gyihova* sunsum ne wɔ la, fanwodi wɔ ɛkɛ.+ 18 Na mekɛ mɔɔ yɛ muala yɛfa yɛ nyunlu mɔɔ yɛtɛkedale la yɛda Gyihova* anyunlunyia ne ali kɛ neanleɛ la, bɛkakyi yɛ bɛkɔ ye ɛsaso ko ne ala anu ɔvi anyunlunyia nu ɔkɔ anyunlunyia nu, kɛ mɔɔ Gyihova* mɔɔ le Sunsum ne* yɛ ye pɛpɛɛpɛ la.+