Malakae
4 Ɛlɔne Gyihova se: “Bɛnlea! kenle ne ɛlɛba, na ɔlɛsɔ kɛ fonlomo,+ na bɛdabɛ mɔɔ bɛmemaa bɛ nwo zo* nee bɛdabɛ mɔɔ bɛyɛ amumuyɛ la kɔsɔɔti bayɛ kɛ ndile. Kenle ne mɔɔ ɛlɛba la bayela bɛ bɔkɔɔ, na bɛ ndinli anzɛɛ bɛ ngane bɔbɔ ɛnrɛha. 2 Noko bɛmɛ mɔɔ bɛdi me duma ne eni* la ɛdeɛ, tenlene sɛnzɛne bada bɛ nwo zo, ye wienyi* ne bayɛ bɛ ayile; na bɛbawuluwulu kɛ nlankɛ mralɛ mɔɔ bɛwie dɔ la.”
3 “Na bɛbatietia amumuyɛma anwo zo, ɔluakɛ bɛbayɛ kɛ munlutu wɔ bɛ gyakɛ abo wɔ kenle mɔɔ mebaha me nwo la,” ɛlɔne Gyihova a se a.
4 “Bɛhakye me sonvolɛ Mosisi Mɛla ne, ngyehyɛleɛ nee ndɛnebualɛ mɔɔ menvale memaanle ye wɔ Hɔlɛbe kɛ Yizilayɛma kɔsɔɔti ɛli zo la.+
5 “Bɛnlea! melɛsoa ngapezonli Yilaegya wɔ bɛ nwo lɔ+ kolaa na Gyihova kenle kpole ne mɔɔ yɛ ɛzulolɛ la ara.+ 6 Na ɔbamaa papa mɔ ahonle ahakyi ara bɛ mra nwo zo,+ na mralɛ ahonle ahakyi ara bɛ papa mɔ anwo zo; amaa meamba meangyegye azɛlɛ ne na meanzɛkye ye.”
(Hibulu nee Elam Ngɛlɛlera ne ngilebɛbo awieleɛ, Kilisiene Giliki Ngɛlɛlera ne doa zo)