Nahum
2 Mɔɔ bɔ menli asande la ɛra ɛ* nwo zo.+
Sinza bane ne mɔ.
Kɔ zo sinza adenle ne.
Bɛziezie bɛ nwo,* bɛva bɛ anwosesebɛ muala.
2 Ɔluakɛ Gyihova bamaa Gyekɔbo azia anyia ye anyunlunyia,
Nee Yizilayɛ anyunlunyia ne bieko,
Ɔluakɛ sɛkyevolɛma ɛzɛkye bɛ;+
Yɛɛ bɛzɛkye bɛ vanye asa ngane ne mɔ.
3 Ye katakyiema enyinlike ne mɔ anwo le kɔkɔlɛ,
Ye ɛlɔnema wulowula adɛladeɛ ngɔkɔlɛ.
Kenle mɔɔ ɔkɛziezie ɔ nwo ɔkɛmaa konle la,
Mbulalɛ mɔɔ wɔ ye konle ehwili ne mɔ anwo la ta kɛ senle,
Yɛɛ bɛdende mbaka atwɛ.
4 Konle ehwili ne mɔ nriandi anyebolo zo wɔ awɔdenle ne mɔ azo.
Bɛdi akɔneaba wɔ gua ne mɔ azo.
Bɛsɔ kɛ tɛkɛ yɛɛ bɛkpakye kɛ ɛsɛlɛmanye.
5 Ɔbavɛlɛ ye mgbanyima yeamaa bɛarayia.
Bɛlɛkɔ a bɛ gyakɛ bakpulokpula.
Bɛnriandi ndɛndɛ bɛkɔ ye bane ne anwo;
Bɛtua adenle ne.
6 Bɛbadukue nzule ne mɔ nlenkɛ mgbole ne,
Na belemgbunli sua ne babubu.*
7 Bɛbɔ edwɛkɛ ɛhye anwo kpɔkɛ: Bɛkpa ɔ nwo ɛdanlɛ,
Bɛva ye bɛhɔ, na ye sonvolɛ mraalɛ ɛlɛsu kɛ abubule;
Na bɛbilebila bɛ kɛnra azo.
8 Ɛnee Nenɛvɛ+ le kɛ nzubula la wɔ ye mekɛ kɔsɔɔti anu,
Noko kɛkala bɛlɛnriandi.
“Bɛgyinla! Bɛgyinla!”
Noko awie biala ɛndo ɔ nye ɔ nzi.+
9 Bɛve dwɛtɛ fufule, bɛve nvutuke!
Bɛnze anwonyia ne anloa.
Bɛva bɛboka ninyɛne ngakyile kɔsɔɔti mɔɔ sonle bolɛ la anwo bɛzie.
10 Suakpole ne ɛdɔ mgbane, yeyɛ suadu, bɛzɛkye ye!+
Bɛ ahonle ɛdu, bɛ gyakɛ kpɔkɛ keha bɔ nwo, bɛ ɛzɔlɛ* woso;
Ɛzulolɛ ɛmaa bɛ muala bɛ nyunlu ɛhakyi.
11 Nienwu a awenade feabelɛ ne,+ ɛleka mɔɔ awenade ngyikyi* didi,
Ɛleka mɔɔ awenade nee ɔ mra kɔ,
Mɔɔ awie ɛnga bɛ ɛzulolɛ la wɔ a?
12 Awenade tete nane dɔɔnwo anu ɔmaa ɔ mra
Na ɔdofo bie ɔmaa awenade mbelɛ ne mɔ.
Nane mɔɔ yehu bɛ la ɛyi ye tunli ne anu,
Ye feabelɛ ne le nane mɔɔ yetete bɛ nu la ngome.