Lɛvitikɔso

26 “‘Bɛmmayɛ nyamenle mɔɔ nvasoɛ ɛnle bɛ nwo zo,+ yɛɛ bɛmmayɛ ananze+ anzɛɛ ɛzonlenlɛ mpila, yɛɛ bɛmmase bolɛ biala+ bɛsie bɛ azɛlɛ ne azo na bɛbɔ bɛ ti aze bɛmaa ye;+ ɔluakɛ medame a mele Gyihova bɛ Nyamenle ne a. 2 Ɔwɔ kɛ bɛdi me ɛnwomenlelielɛ ne mɔ na bɛdi me ɛleka nwuanzanwuanza ne eni.* Medame a mele Gyihova a.

3 “‘Saa bɛkɔ zo bɛdi me ngyehyɛleɛ nee me mɛla ne mɔ azo na bɛfa bɛbɔ bɛ ɛbɛla a,+ 4 mebamaa ezule adɔ amaa bɛ wɔ ye mekɛ kpalɛ nu,+ na azɛlɛ ne bamaa bɛanyia aleɛ,+ na ɛbɔ nu mbaka amaa bɛ nzoleɛ. 5 Mekɛ mɔɔ bɛfa bɛwoso ma la badɛlɛ ahɔdwu bɛ vanye ma ɛdelɛ mekɛ, yɛɛ vanye ma ɛdelɛ mekɛ badɛlɛ ahɔdwu mekɛ mɔɔ bɛdua aleɛ la; bɛbali aleɛ bɛ ko ayi na bɛadɛnla azɛlɛ ne azo bɛ nwo adɔ bɛ.+ 6 Mebamaa anzodwolɛ ara azɛlɛ ne azo,+ na bɛbala mɔɔ awie ɛnrɛha bɛ ɛzulolɛ a;+ mebaye nane anwo ɛzulolɛ meavi azɛlɛ ne azo, na awie ɛnrɛva konle dadeɛ ɛnrɛpɛ nu wɔ bɛ azɛlɛ ne azo. 7 Bɛbavoa bɛ kpɔvolɛma, na bɛbadɔ dadeɛ nloa wɔ bɛ nyunlu. 8 Bɛ nuhua nnu bavoa menli 100, yɛɛ bɛ nuhua 100 bavoa menli 10,000, na bɛ kpɔvolɛma badɔ dadeɛ nloa wɔ bɛ nyunlu.+

9 “‘Mebalo* bɛ na meamaa bɛ nwo azo,+ na meali ngyekyeleɛ mɔɔ me nee bɛ ɛyɛ la azo.+ 10 Mɔɔ bɛgua zo bɛlɛdi aleɛ dɛba ne mɔɔ bɛnyianle ye ɛvolɛ ne mɔɔ ɛpɛ nu la anu la, ɔbahyia kɛ bɛye dɛba ne na bɛfa fofolɛ ne bɛsie ɔ bo zo. 11 Mebava me ɛdanlɛsua ne meazie bɛ avinli,+ na menrɛkpo* bɛ ɛlɛ. 12 Mebalua bɛ avinli na meayɛ bɛ Nyamenle,+ na bɛdabɛ noko bɛayɛ me menli.+ 13 Medame a mele Gyihova bɛ Nyamenle ne, mɔɔ yele bɛ vile Yigyibiti azɛlɛ zo amaa bɛanyɛ bɛ ngɛkɛlɛ bieko, na membubule bɛ gyɛnvayile ne memaanle bɛnyianle bɛ ti la.*

14 “‘Noko saa bɛandie me anzɛɛ bɛanli mɛla ɛhye mɔ amuala azo,+ 15 na bɛkpo me ngyehyɛleɛ,+ bɛkyi* me adehilelɛ, na bɛanli me mɛla ne mɔ amuala azo na bɛsɛkye me ngyekyeleɛ ne a,+ 16 medame noko mebava ɛhye mɔ meayɛ bɛ: mebava avinliwule nee ebunlu meahwe bɛ nzo meamaa bɛali nyane, bɛ nye bazi na bɛ ngoane* abɔ bɛ. Bɛbalua bɛ ma mgbane, ɔluakɛ bɛ kpɔvolɛma barali.+ 17 Mebadu me nye meazie bɛ nwo, na bɛ kpɔvolɛma bali bɛ nwo zo konim,+ yɛɛ menli mɔɔ kpɔ bɛ la batietia bɛ nwo zo,+ na bɛbanriandi wɔ mekɛ mɔɔ awie ɛndoa bɛ la.+

18 “‘Saa ɛhye ammaa bɛandie me bɔbɔ a, mebahwe bɛ nzo fane nsuu wɔ bɛ ɛtane ne mɔ anwo. 19 Mebaha bɛ anwomemaazo kpole ne aze na meamaa bɛ anwomanyunlu ayɛ kɛ bulalɛ+ na bɛ azɛlɛ ne ayɛ kɛ kɔbele. 20 Bɛbavɛ bɛ azɛlɛ ne anwo mgbane, ɔluakɛ azɛlɛ ne ɛnrɛmaa bɛ aleɛ,+ yɛɛ azɛlɛ ne azo mbaka ɛnrɛzo ma.

21 “‘Noko saa bɛkɔ zo bɛdwazo bɛtia me na bɛandie me a, mebahwe bɛ nzo fane nsuu wɔ bɛ ɛtane ne mɔ anwo. 22 Mebamaa ɛbɔ nu nane anwo ɛzulolɛ ara bɛ avinli+ na bɛahu bɛ mra+ nee bɛ nyɛmoa, na menli ne baha ekyi bie, na bɛ adenle ne mɔ azo adɔ mgbane.+

23 “‘Saa ɛhye mɔ amuala anzi bɛanlie me ɛdenrɛdenrɛlɛ bɛando nu+ na bɛkɔ zo bɛdwazo bɛtia me a, 24 akee medame noko mebadwazo meatia bɛ, na meahwe bɛ nzo fane nsuu wɔ bɛ ɛtane ne mɔ anwo. 25 Mebava konle dadeɛ meara bɛ nwo zo meava meali bɛ nzenralɛ kɛmɔ bɛanli me ngyekyeleɛ ne azo la ati.+ Saa bɛboɔboa bɛ nloa wɔ bɛ azuamgbole ne mɔ azo a, mebamaa ewule adɔ bɛ avinli,+ na meava bɛ meawula bɛ kpɔvolɛ asa anu.+ 26 Saa mesɛkye ɛleka* mɔɔ bɛfa bɛ paano* bɛsie la a,+ mraalɛ bulu bado paano wɔ fonlomo kokye anu na akee bɛazuzu bɛahyɛ bɛamaa bɛ;+ na bɛbali noko bɛ ko ɛnrɛyi.+

27 “‘Saa ɛhye mɔ amuala anzi bɛandie me na bɛkɔ zo bɛdwazo bɛtia me a, 28 mebadwazo meatia bɛ ɛsesebɛ+ na meahwe bɛ nzo fane nsuu wɔ bɛ ɛtane ne mɔ anwo. 29 Yemɔti bɛbali bɛ mra mrenyia nee bɛ mra mraalɛ nwonane.+ 30 Mebazɛkye bɛ ɛzonlenlɛ ɛleka ne mɔ+ na meabubu bɛ ayilevuanlɛ afɔlemokyea ne mɔ, na meavuandi bɛ avunli meagua bɛ bɛkyi ananze* avunli ne mɔ azo,+ na mebahyi* bɛ na meahwe me nwo meavi bɛ nwo.+ 31 Mebazɛkye bɛ azuamgbole ne mɔ+ na meamaa bɛ ɛleka nwuanzanwuanza ne mɔ adɔ mgbane, na me nye ɛnrɛlie* bɛ afɔlebɔlɛ evuanlɛ ne mɔ anwo. 32 Mebamaa azɛlɛ ne adɔ mgbane,+ na ɔbazi bɛ kpɔvolɛma mɔɔ baradɛnla zolɛ la anwo.+ 33 Na mebabɔ bɛ asande wɔ maanle maanle ne mɔ anu+ na meahwe konle dadeɛ meali bɛ nzi;+ na bɛ azɛlɛ ne badɔ mgbane, na bɛ azuamgbole ne mɔ azɛkye.+

34 “‘Mekɛ zɔhane mɔɔ azɛlɛ ne badɔ mgbane na bɛwɔ bɛ kpɔvolɛma azɛlɛ zo la, azɛlɛ ne badua ye ɛnwomenlelielɛ ne anwo kakɛ. Mekɛ zɔhane, azɛlɛ ne balie ɔ menle, ɔluakɛ ɔwɔ kɛ ɔtua ye ɛnwomenlelielɛ ne mɔ anwo kakɛ.+ 35 Mekɛ mɔɔ azɛlɛ ne badɔ mgbane la anu amuala, ɔbalie ɔ menle ɔluakɛ mekɛ mɔɔ bɛde zo la, ɔdwu ɛnwomenlelielɛ ne mɔ a bɛmmaa ɔnlie ɔ menle.

36 “‘Na menli mɔɔ banyia bɛ ti la ɛdeɛ,+ mebamaa arɛlebɔlɛ ayi bɛ ahonle tɛkɛɛ wɔ bɛ kpɔvolɛma azɛlɛ zo; na nya mɔɔ anwoma ɛlɛbɔ ye la ane bamaa bɛanriandi, na bɛbanriandi kɛ menli mɔɔ ɛlɛnriandi konle dadeɛ la, na bɛadɔ aze wɔ mekɛ mɔɔ awie ɛndoa bɛ la.+ 37 Bɛ ngome bɛbatietia bɛ nwo zo na bɛadu bɛagua kɛ menli mɔɔ ɛlɛnriandi konle dadeɛ noko awie ɛndoa bɛ la. Bɛnrɛhola bɛnrɛho bɛnrɛtia bɛ kpɔvolɛma.+ 38 Bɛbawu wɔ maanle maanle ne mɔ anu,+ na bɛ kpɔvolɛma azɛlɛ ne bame bɛ. 39 Na bɛdabɛ mɔɔ bɛbaha la banwu amaneɛ wɔ bɛ kpɔvolɛma azɛlɛ zo+ ɔlua bɛ ɛtane ne ati. Ɛhɛe, bɛbanwu amaneɛ ɔlua bɛ papa mɔ ɛtane ne ati.+ 40 Akee bɛbaha bɛ ɛtane ne+ nee bɛ papa mɔ ɛtane ne yɛɛ nɔhalɛ mɔɔ bɛanli la na bɛalie bɛado nu kɛ bɛanli nɔhalɛ ɔluakɛ bɛdwazole bɛtiale me.+ 41 Ɔti medame noko mendwazole mentiale bɛ+ na menvale bɛ mengɔle bɛ kpɔvolɛma azɛlɛ zo.+

“‘Bie a bɛ ahonle ne mɔɔ ɛsolo la babɛlɛ aze+ na akee bɛadua bɛ ɛtane ne anwo kakɛ. 42 Mebahakye ngyekyeleɛ mɔɔ me nee Gyekɔbo yɛle,+ ngyekyeleɛ mɔɔ me nee Ayezeke yɛle+ yɛɛ ngyekyeleɛ mɔɔ me nee Ebileham yɛle la,+ na meahakye azɛlɛ ne. 43 Mekɛ mɔɔ bɛkpole azɛlɛ ne na ɔdɔle mgbane la, ɛnee ɔlɛtua ye ɛnwomenlelielɛ ne mɔ anwo kakɛ,+ yɛɛ ɛnee bɛdabɛ noko bɛlɛtua bɛ ɛtane ne anwo kakɛ, ɔluakɛ bɛkpole* me mɛla ne mɔ yɛɛ bɛhyile me ngyehyɛleɛ ne mɔ.+ 44 Noko ɛhye mɔ amuala anzi, saa bɛwɔ bɛ kpɔvolɛma azɛlɛ zo a, menrɛkpo bɛ bɔkɔɔ+ yɛɛ menrɛhyi bɛ too menrɛbɔ bɛ bo zo, ɔluakɛ anrɛɛ ɔbazɛkye ngyekyeleɛ+ mɔɔ me nee bɛ ɛyɛ la, ɔboalekɛ medame a mele Gyihova bɛ Nyamenle ne a. 45 Bɛdabɛ ti, mebahakye ngyekyeleɛ mɔɔ me nee bɛ nenyia mɔ yɛle la,+ menli mɔɔ menyele bɛ menvile Yigyibiti azɛlɛ zo wɔ maanle maanle ne anye zo,+ amaa bɛanwu kɛ medame a mele bɛ Nyamenle la. Medame a mele Gyihova a.’”

46 Ɛhye mɔ a le adehilelɛ, ngyehyɛleɛ nee mɛla mɔɔ Gyihova luale Mosisi anwo zo vale maanle Yizilayɛma wɔ Saenae Boka ne azo a.+