Lɛvitikɔso

22 Gyihova zele Mosisi bieko kɛ: 2 “Ka kile Aalɔn nee ɔ mra mrenyia ne mɔ kɛ, ɔwɔ kɛ bɛnea boɛ wɔ kɛzi bɛbayɛ* Yizilayɛma ninyɛne nwuanzanwuanza ne mɔ mɔɔ bɛlɛte nwo bɛamaa me la anwo+ na bɛangua me duma ne anwo evinli.+ Medame a mele Gyihova a. 3 Ka kile bɛ kɛ, ‘Wɔ bɛ awolɛndoazo kɔsɔɔti anu, saa bɛ bo zo amra bie mɔɔ anwo ɛgua evinli la ba ninyɛne nwuanzanwuanza ne mɔ mɔɔ Yizilayɛma kɛde nwo kɛmaa Gyihova la anwo a, bɛbaye* zɔhane sonla* ne bɛavi me nye zo.+ Medame a mele Gyihova a. 4 Ɔnle kɛ Aalɔn abozoamra ne bie mɔɔ le kokobɛvolɛ+ anzɛɛ nzule vi ɔ nwo se gua la+ di ninyɛne nwuanzanwuanza ne mɔ bie kɔkpula kɛ ɔ nwo kɛde,+ yɛɛ ɔnle kɛ awie mɔɔ anwo kɛha sonla mɔɔ funli ɛgua ɔ nwo evinli,+ anzɛɛ sonla mɔɔ ɔ nwo kɛra,+ 5 anzɛɛ awie mɔɔ kɛva ɔ sa kɛha abɔdeɛ dɔɔnwo* mɔɔ anwo ɛnde la bie+ anzɛɛ ɔ nwo kɛha awie mɔɔ debie bie ɛmaa ɔ nwo ɛgua evinli na ɔbahola yeagua ɔdaye noko ɔ nwo evinli la di bie.+ 6 Awie* mɔɔ anwo kɛha ninyɛne ɛhye mɔ bie la anwo bagua evinli kɔkpula nɔsolɛ nu, na ɔnle kɛ ɔdi ninyɛne nwuanzanwuanza ne mɔ bie, kyesɛ ɔfa nzule ɔbia.+ 7 Saa sɛnzɛne ne kɔtɔ a, ɔ nwo bade, na akee ɔbahola yeali ninyɛne nwuanzanwuanza ne bie, ɔluakɛ ye aleɛ ɔ.+ 8 Eza ɔnle kɛ ɔdi nane biala mɔɔ ɛwu anzɛɛ nane anwo ɛzulolɛ ɛtete ye nu la na ɔmaa ɔgua ɔ nwo evinli.+ Medame a mele Gyihova a.

9 “‘Ɔwɔ kɛ bɛdi me mɛla zo, amaa bɛanyɛ ɛtane na bɛanwu ɔluakɛ bɛgua ninyɛne nwuanzanwuanza ne anwo evinli la ati. Medame a mele Gyihova mɔɔ melɛte bɛ nwo a.

10 “‘Ɔnle kɛ awie biala* mɔɔ ɛnlɛ nwolɛ adenle la di ninyɛne nwuanzanwuanza ne bie.+ Ɔnle kɛ ɛsɔfo bie ɛyɛvolɛ anzɛɛ ɛkpanli di ninyɛne nwuanzanwuanza ne bie. 11 Noko saa ɛsɔfo bie fa ye ezukoa tɔ awie* a, zɔhane sonla ne bahola ali bie. Ngɛkɛlɛ mɔɔ bɛwole bɛ wɔ ye sua nu la noko bahola ali ye aleɛ ne bie.+ 12 Saa ɛsɔfo bie ara raalɛ gya awie mɔɔ ɛnle ɛsɔfo la* a, ɔnrɛhola ɔnrɛli ndoboa nwuanzanwuanza ne bie. 13 Noko saa ɛsɔfo bie ara raalɛ yɛ kunlavolɛ anzɛɛ bɛbɔ ye ewole na ɔnlɛ ralɛ na ɔsia ɔba ye papa sua nu kɛ mɔɔ ɛnee ɔde wɔ ye ngakula nu la a, ɔbahola yeali ye papa aleɛ ne bie;+ noko awie* biala mɔɔ ɛnlɛ nwolɛ adenle la ɛnrɛli bie.

14 “‘Saa awie ɛnze na ɔdi debie nwuanzanwuanza a, ɔwɔ kɛ ɔtua deɛ ne bolɛ ne ngyɛnu nnu anu ko ɔboka nwolɛ na ɔfa afɔlebɔdeɛ nwuanzanwuanza ne ɔmaa ɛsɔfo ne.+ 15 Yemɔti ɔnle kɛ bɛgua ninyɛne nwuanzanwuanza mɔɔ Yizilayɛma fa bɛlɛ Gyihova la anwo evinli+ 16 na ɔmaa bɛnyia bɛ fɔlɛlilɛ ne anwo anzohwenlɛ, kɛmɔ bɛli bɛ ninyɛne nwuanzanwuanza ne la ati; ɔluakɛ medame a mele Gyihova mɔɔ melɛte bɛ nwo a.’”

17 Gyihova doale zo zele Mosisi kɛ: 18 “Tendɛ kile Aalɔn nee ɔ mra mrenyia ne mɔ nee Yizilayɛma amuala na se bɛ kɛ, ‘Saa Yizilayɛnli anzɛɛ ɛyɛvolɛ bie mɔɔ wɔ Yizilayɛ la fa ɛyelalɛ afɔlebɔdeɛ+ arɛlɛ Gyihova yeava yeali ye ɛwɔkɛ zo anzɛɛ ɔfi ye ɛhulolɛ nu yeabɔ afɔle a,+ 19 ɔwɔ kɛ ɔfa ɛnlankɛ nyinli,+ boaneralɛ nyinli anzɛɛ abɔnkye nyinli mɔɔ te kpɔkɛ la, amaa bɛalie bɛado nu. 20 Ɔnle kɛ bɛfa debie biala mɔɔ anwo lɛ dɛne la bɛba,+ ɔluakɛ ɔnrɛmaa bɛnrɛlie bɛ bɛnrɛdo nu.

21 “‘Saa awie ɛlɛfa anzodwolɛ afɔlebɔdeɛ+ arɛlɛ Gyihova yeava yeadua ɛwɔkɛ mɔɔ yebɔ, anzɛɛ ɔlɛfi ye ɛhulolɛ nu yeabɔ afɔle a, ɔwɔ kɛ ɔfa ɛnlankɛ anzɛɛ boane mɔɔ te kpɔkɛ la amaa bɛalie ye bɛado nu. Ɔnle kɛ ɔ nwo nyia dɛne biala. 22 Ɔnle kɛ afɔlebɔdeɛ biala anye bɔ, ɔ gyakɛ bu, ɔ nwo pepɛ, ɔ nwo tudu, ɔdɔ ngɛkɛba anzɛɛ debie gua ɔ nwo; ɔnle kɛ bɛfa ɛhye mɔ bie bɛbɛlɛ Gyihova anzɛɛ bɛfa bie bɛbɔ afɔle wɔ afɔlemokyea ne azo bɛmaa Gyihova. 23 Bɛbahola bɛava ɛnlankɛ anzɛɛ boane mɔɔ ɔ sa anzɛɛ ɔ gyakɛ ko wale anzɛɛ le ezinra bo zolɛ la bɛavi bɛ ɛhulolɛ nu bɛabɔ afɔle, noko bɛnrɛlie bɛnrɛdo nu kɛ ɔle ɛwɔkɛbɔlɛ afɔlebɔdeɛ. 24 Ɔnle kɛ bɛfa nane mɔɔ bɛbɔ anzɛɛ bɛbɛtɛ ɔ ndɔma anzɛɛ bɛdu ɔ ndɔma anzɛɛ bɛpɛ bɛvi ɛkɛ la bɛbɛlɛ Gyihova, yɛɛ ɔnle kɛ bɛfa nane zɛhae mɔ bɛbɔ afɔle wɔ bɛ azɛlɛ ne azo. 25 Ɔnle kɛ bɛdie ɛhye mɔ bie bɛfi nyɛvolɛ sa nu bɛfa bɛba kɛ bɛ Nyamenle ne aleɛ, ɔluakɛ ewule nee dɛne wɔ bɛ nwo. Ɔnrɛmaa bɛnrɛlie bɛ bɛnrɛdo nu.’”

26 Gyihova zele Mosisi bieko kɛ: 27 “Saa ɛnlankɛ anzɛɛ boane anzɛɛ abɔnkye wo a, ɔ ra ne badɛnla ɔ nli anwo too kenle nsuu,+ noko ɔvi kenle mɔtwɛ ne azo mɔɔ kɔ la, bɛbalie bɛado nu kɛ afɔlebɔdeɛ, afɔle mɔɔ bɛva senle bɛbɔ bɛmaa Gyihova la. 28 Bɛmmaku ɛnlankɛ anzɛɛ boane nee ɔ ra kenle ko ne ala.+

29 “Saa bɛbɔ moyɛlɛ afɔle bɛamaa Gyihova a,+ ɔwɔ kɛ bɛbɔ ye wɔ adenle mɔɔ ɔbalie bɛ yeado nu la azo. 30 Ɔwɔ kɛ bɛdi ye kenle ko ne ala. Ɔnle kɛ bɛgyakyi bie bɛmaa aleɛ kye zolɛ.+ Medame a mele Gyihova a.

31 “Ɔwɔ kɛ bɛdi me mɛla ne mɔ azo na bɛfa bɛbɔ bɛ ɛbɛla.+ Medame a mele Gyihova a. 32 Ɔnle kɛ bɛgua me duma nwuanzanwuanza ne anwo evinli,+ ɔwɔ kɛ bɛte me nwo wɔ Yizilayɛma avinli.+ Medame a mele Gyihova mɔɔ melɛte bɛ nwo a,+ 33 medame a menyele bɛ menvile Yigyibiti azɛlɛ zo menvale mengilele kɛ mele bɛ Nyamenle a.+ Medame a mele Gyihova a.”