Gyɛlɛmaya
40 Edwɛkɛ ɛhye a vi Gyihova ɛkɛ rale Gyɛlɛmaya ɛkɛ wɔ mekɛ mɔɔ sinzavolɛma kpanyinli Nɛbuzaladan+ gyakyile ye wɔ Releema la.+ Ɔvale kyeenyi ɔguale ɔ sa na ɔvale ye ɔhɔle ɛkɛ, na ɛnee ɔboka Gyɛlusalɛmma nee Dwudama mɔɔ bɛ nee bɛ ɛlɛkɔ akɛlɛzonlenlɛ nu wɔ Babelɔn la anwo. 2 Akee sinzavolɛma kpanyinli ne vale Gyɛlɛmaya hɔle ahane na ɔzele ye kɛ: “Gyihova wɔ Nyamenle ne a hanle munzule ɛhye tiale ɛleka ɛhye a, 3 na Gyihova ɛmaa yera nu kɛ mɔɔ ɔhanle la, ɔluakɛ bɛyɛle ɛtane bɛtiale Gyihova na bɛandie ɔ ne. Ɛhye ati a ɛhye ɛdo bɛ a.+ 4 Na kɛkala, melɛye kyeenyi ne meavi ɛ sa. Saa ɛnea na ɔle kpalɛ kɛ ɛ nee me bahɔ Babelɔn a, maa yɛhɔ na mebanlea wɔ. Na saa ɛngulo kɛ ɛ nee me kɛhɔ Babelɔn noko a, ɛnee mmaba. Nea! Azɛlɛ ne amuala la ɛ nyunlu. Kɔ ɛleka biala mɔɔ ɛkulo la.”+
5 Mekɛ mɔɔ ɔtɛsile kpɔkɛ kɛ ɔsia ɔ nzi la, Nɛbuzaladan hanle kɛ: “Sia kɔ Hyeefan+ ara Ahaekam+ ara Gɛdalaya+ mɔɔ Babelɔn belemgbunli ne ɛye ye kɛ ɔnlea Dwuda azuamgbole ne mɔ azo la anwo ɛkɛ, na ɛ nee ye ɛhɔdɛnla wɔ menli ne anu; anzɛɛ kɔ ɛleka biala mɔɔ ɛkulo la.”
Akee sinzavolɛma kpanyinli ne maanle ye aleɛ nee ahyɛlɛdeɛ na ɔmaanle ɔhɔle. 6 Ɔti Gyɛlɛmaya hɔle Ahaekam ara Gɛdalaya anwo ɛkɛ wɔ Mezepa,+ na ɔ nee ye hɔdɛnlanle wɔ menli ne mɔɔ bɛgyakyile bɛ wɔ azɛlɛ ne azo la anu.
7 Nzinlii, ɛlɔnema mgbanyima mɔɔ wɔ azɛlɛ ne azo la amuala nee bɛ menli ne dele kɛ Babelɔn belemgbunli ne ɛye Ahaekam ara Gɛdalaya kɛ ɔnlea azɛlɛ ne azo na yeye ye kɛ ɔnlea mrenyia, mraalɛ yɛɛ ehyiavolɛma mɔɔ wɔ azɛlɛ ne azo la amra ne mɔ mɔɔ bɛanva bɛ bɛangɔ Babelɔn la anwo zo.+ 8 Ɔti bɛrale Gɛdalaya anwo ɛkɛ wɔ Mezepa.+ Bɛmɛ a le Nɛtanaya ara Yehyemɛle,+ Kalia amra Dwoheenan nee Dwɔnatan,+ Tanehumɛte ara Sɛlaya, Nɛtɔfanli Yifae amra ne mɔ nee Meeyakaenli ne ara Gyɛzanaya+ nee menli mɔɔ boka bɛ nwo la. 9 Hyeefan ara Ahaekam ara Gɛdalaya hanle ndane hilele bɛ nee bɛ menli ne mɔ kɛ: “Bɛmmasulo kɛ bɛbazonle Kaledeama. Bɛdɛnla azɛlɛ ye azo na bɛzonle Babelɔn belemgbunli ne, na ɔbawie bɛ boɛ.+ 10 Na mame, mebadɛnla Mezepa na meagyinla bɛ gyakɛ anu* meamaa Kaledeama mɔɔ bɛara yɛ nwo ɛke la. Noko bɛmɛ bɛboɔboa nwanye, wawaa mekɛ nu ma nee nwole nloa, na bɛva bɛgua debie nu bɛzie na bɛdɛnla azuamgbole mɔɔ bɛva la azo.”+
11 Na Dwuuma mɔɔ wɔ Mowabe, Amɔn nee Yidɔm la amuala, yɛɛ bɛdabɛ mɔɔ bɛde maanle gyɛne nu la amuala dele kɛ Babelɔn belemgbunli ne ɛmaa menli ɛha Dwuda na yeye Hyeefan ara Ahaekam ara Gɛdalaya kɛ ɔnlea bɛ nwo zo. 12 Ɔti Dwuuma mɔɔ wɔ ɛleka mɔɔ bɛbɔle bɛ asande bɛhɔle la kɔsɔɔti bɔle ɔ bo kɛ bɛsia bɛara, na bɛrale Dwuda azɛlɛ ne azo wɔ Gɛdalaya anwo ɛkɛ wɔ Mezepa. Na bɛboɔboale nwanye nee wawaa mekɛ nu ma dɔɔnwo kpalɛ anloa.
13 Kalia ara Dwoheenan nee ɛlɔne mgbanyima mɔɔ wɔ azɛlɛ ne azo la amuala rale Gɛdalaya anwo ɛkɛ wɔ Mezepa. 14 Bɛzele ye kɛ: “Asoo ɛnze kɛ Beeyalese, Amɔnoma belemgbunli ne,+ ɛzoa Nɛtanaya ara Yehyemɛle kɛ ɔrahu wɔ* ɔ?”+ Noko Ahaekam ara Gɛdalaya anlie bɛ anli.
15 Akee Kalia ara Dwoheenan hanle ye fealeranu hilele Gɛdalaya wɔ Mezepa kɛ: “Maa me adenle maa mengɔngu Nɛtanaya ara Yehyemɛle, na awie ɛnrɛnwu ye. Duzu ati a ɔwɔ kɛ ɔku wɔ* na menli mɔɔ wɔ Dwuda mɔɔ bɛboɔboa bɛ nloa wɔ ɛ nwo ɛke la kɔsɔɔti bɔ asande na Dwudama mɔɔ ɛha la abo zo minli ɛ?” 16 Noko Ahaekam ara Gɛdalaya+ buale Kalia ara Dwoheenan kɛ: “Mmayɛ ɛhye, ɔluakɛ mɔɔ ɛlɛka ye wɔ Yehyemɛle anwo la ɛnle nɔhalɛ.”