Gyɛlɛmaya

32 Edwɛkɛ mɔɔ vi Gyihova ɛkɛ rale Gyɛlɛmaya ɛkɛ ne wɔ Dwuda Belemgbunli Zɛdikaya ɛvolɛ 10 ne mɔɔ le Nɛbukadenɛza ɛvolɛ 18 ne azo la ɛne.+ 2 Mekɛ zɔhane ɛnee Babelɔn belemgbunli ne ɛlɔnema ɛbɔ Gyɛlusalɛm ɛyia, na bɛva Gyɛlɛmaya bɛdo efiade wɔ Sinzavolɛma Sua nu+ ɛkɛ wɔ Dwuda belemgbunli ne sua nu.* 3 Ɔluakɛ ɛnee Dwuda Belemgbunli Zɛdikaya ɛva ye ɛdo efiade,+ ɔse, “Duzu ati a ɛka ngapezo zɛhae ɛ? Ɛse, ‘Mɔɔ Gyihova ɛha la ɛne: “Mebava suakpole ɛhye meawula Babelɔn belemgbunli ne asa anu na ɔbaho yeava,+ 4 na Dwuda Belemgbunli Zɛdikaya ɛnrɛhola ɛnrɛvi Kaledeama asa, bɛbava ye bɛawula Babelɔn belemgbunli ne asa anu wɔ adenle biala azo, na ɔ nee ye bɛ nye bayɛ nna na bɛadendɛ.”’+ 5 ‘Ɔbava Zɛdikaya yeahɔ Babelɔn, na ɔbadɛnla nehane kɔkpula kɛ mebahakyi me nye mearanlea ye la,’ Gyihova a se a. Bɛ nee Kaledeama bɛaho ɛdeɛ, noko bɛnrɛhola bɛ.’”+

6 Gyɛlɛmaya hanle kɛ: “Gyihova edwɛkɛ ne ɛra me ɛkɛ ne kɛ, 7 ‘Nea, wɔ papa adiema Hyalɛm ara Hanamili baraha ahile wɔ kɛ: “Tɔ me azɛlɛ ne mɔɔ wɔ Anatɔto la,+ ɔluakɛ wɔmɔ a ɛlɛ nwolɛ adenle ɛtɔ a.”’”+

8 Kɛ mɔɔ Gyihova hanle hilele me la, me papa adiema ara Hanamili rale me nwo ɛkɛ ne wɔ Sinzavolɛma Sua nu ɛkɛ ne na ɔzele me kɛ: “Mesɛlɛ wɔ, tɔ me azɛlɛ ne mɔɔ wɔ Anatɔto, wɔ Bɛngyaman azɛlɛ zo la, ɔluakɛ wɔmɔ a ɛlɛ adenle ɛtɔ na ɛfa a. Yemɔti, tɔ na fa.” Na menwunle kɛ ɛhye le Gyihova edwɛkɛ.

9 Ɔti mendɔle azɛlɛ ne mɔɔ wɔ Anatɔto la menvile me papa adiema ara Hanamili ɛkɛ. Menzuzule ezukoa ne+ memaanle ye, hyikɛle* nsuu nee dwɛtɛ fufule bulu. 10 Akee mengɛlɛle ye wɔ ngyehyɛleɛ kɛlata nu,+ menzɔle ɔ nloa, menvɛlɛle alasevolɛ,+ na menzuzule ezukoa ne wɔ tone nu. 11 Menvale ngyehyɛleɛ kɛlata ne mɔɔ bɛzɔ ɔ nloa kɛ mɔɔ mɛla ne nee ngyehyɛleɛ ne kile la, nee ko ne mɔɔ bɛtɛsɔle ɔ nloa la, 12 na menvale ngyehyɛleɛ kɛlata ne memaanle Masaya ara Nelaya+ ara Bɛlɛke+ wɔ me papa adiema ara Hanamili nee alasevolɛ mɔɔ bɛvale bɛ sa bɛwulale ngyehyɛleɛ kɛlata ne abo la nee Dwuuma mɔɔ bɛde Sinzavolɛma Sua nu ɛkɛ ne la amuala anyunlu ɛkɛ.+

13 Akee menganle mengilele Bɛlɛke wɔ bɛ muala bɛ nyunlu ɛkɛ ne kɛ: 14 “Mɔɔ ɛlɔne Gyihova, Yizilayɛ Nyamenle ne ɛha la ɛne, ‘Fa ngyehyɛleɛ ngɛlata ɛhye mɔ, mɔɔ bɛzɔ ɔ nloa la nee ko ne mɔɔ bɛtɛsɔle ɔ nloa la, na fa wula buakɛ nu amaa bɛahyɛ kpalɛ.’ 15 Ɔluakɛ mɔɔ ɛlɔne Gyihova, Yizilayɛ Nyamenle ne ɛha la ɛne, ‘Bɛbadɔ azua nee azɛlɛ nee vanye egyinli wɔ azɛlɛ ɛhye azo bieko.’”+

16 Mɔɔ menvale ngyehyɛleɛ kɛlata ne memaanle Nelaya ara Bɛlɛke la, akee menyɛle asɔne menzɛlɛle Gyihova kɛ: 17 “O Tumivolɛ Awulae Gyihova! Nea! Ɛvale wɔ tumi kpole ne nee ɛ sa mɔɔ ɛdenrɛle nu la ɛbɔle anwuma nee aze.*+ Debie biala ɛnyɛ se ɛmmaa wɔ, 18 wɔmɔ Mɔɔ ɛda ɛlɔlɛ kpundii ali ɛkile menli apenle apenle, na ɛtua mralɛ kakɛ* wɔ bɛ papa mɔ nvonleɛ nwo,+ nɔhalɛ Nyamenle ne, Bedevinli nee Tumivolɛ ne, mɔɔ wɔ duma a le ɛlɔne Gyihova la. 19 Wɔ bodane* le kpole yɛɛ wɔ gyima le mgbole,+ wɔmɔ mɔɔ ɛ nye nwu menli ndenle kɔsɔɔti,+ na ɛtua awie biala kakɛ kɛ mɔɔ ye ndenle nee ye nyɛleɛ de la.+ 20 Wɔyɛ sɛkɛlɛneɛ nee nwanwane ninyɛne wɔ Yigyibiti azɛlɛ zo, na bɛze ye too badwu ɛnɛ, na wɔva wɔlie duma wɔmaa ɛ nwo wɔ Yizilayɛ nee alesama anu,+ kɛ mɔɔ ɔde ye ɛnɛ la. 21 Na ɛvale sɛkɛlɛneɛ, nwanwane ninyɛne, tumi ɛsalɛ, ɛsalɛ mɔɔ bɛdenrɛ nu nee ninyɛne mɔɔ ka ɛzulolɛ la ɛyele wɔ menli Yizilayɛma ɛvile Yigyibiti azɛlɛ zo.+

22 “Nzinlii, ɛvale azɛlɛ ɛhye mɔɔ ɛhanle ndane kɛ ɛbava wɔamaa bɛ nenyia mɔ la ɛmaanle bɛ,+ azɛlɛ mɔɔ meleke nee wolɛ se zolɛ la.+ 23 Na bɛradɛnlanle zo, noko bɛandie ɛ ne yɛɛ bɛanli wɔ mɛla ne mɔ azo. Bɛanyɛ mɔɔ ɛhanle kɛ bɛyɛ la anu biala, yemɔti a ɛmaanle munzule ɛhye mɔ amuala dole bɛ a.+ 24 Nea! Menli ɛrahuohua ɛnwea* ɛbɛnga suakpole ne ɛyia kɛ bɛko bɛava,+ na ɔlua konle dadeɛ,+ ɛhɔne nee ewulenzane ti,+ Kaledeama mɔɔ bɛ nee suakpole ne ɛlɛko la bava; mɔɔ ɛhanle la amuala ɛra nu, kɛ mɔɔ ɛnwu ye la. 25 Noko O Tumivolɛ Awulae Gyihova, wɔha wɔhile me kɛ, ‘Su ezukoa tɔ azɛlɛ fa na fɛlɛ alasevolɛ,’ ɔnva nwo kɛ bɛbava suakpole ne bɛawula Kaledeama asa anu la.”

26 Na Gyihova edwɛkɛ rale Gyɛlɛmaya ɛkɛ ne kɛ: 27 “Medame Gyihova a mele alesama amuala* Nyamenle a. Debie wɔ ɛkɛ ne mɔɔ ye ɛyɛlɛ yɛ se maa me ɔ? 28 Ɔti mɔɔ Gyihova ɛha la ɛne, ‘Nea, melɛfa suakpole ɛhye meawula Kaledeama asa anu nee Babelɔn Belemgbunli Nɛbukadenɛza asa anu na ɔbaho yeava.+ 29 Na Kaledeama mɔɔ ɛlɛko atia suakpole ɛhye la barado senle wɔ suakpole ɛhye anu ayela ye+ nee azua mɔɔ menli bɔ afɔle wɔ bɛ ti zo maa Beeyale na bɛwola afɔlebɔlɛ nza bɛgua ɛkɛ bɛmaa nyamenle gyɛne bɛfa bɛka me ɛya la.’+

30 “‘Ɔluakɛ menli mɔɔ wɔ Yizilayɛ nee Dwuda la ɛvi bɛ ngakula nu too ɛyɛ mɔɔ le ɛtane wɔ me nye zo la ala;+ Yizilayɛma kɔ zo fa bɛ sa anloa gyima ka me ɛya,’ Gyihova a se a. 31 ‘Na suakpole ɛhye, ɔvi kenle mɔɔ bɛkyekyele too mɔɔ yeradwu ɛnɛ la, yeha me ɛya dedee yemaa meva ɛya kpole,+ yemɔti mebamaa bɛaye ye bɛavi me nye zo,+ 32 ɔlua ninyɛndane mɔɔ Yizilayɛma nee Dwudama ɛyɛ ɛha me ɛya la ati—bɛdabɛ, bɛ arelemgbunli,+ bɛ mgbanyima,+ bɛ ɛsɔfoma, bɛ ngapezoma+ nee Dwuda mrenyia yɛɛ menli mɔɔ wɔ Gyɛlusalɛm la. 33 Bɛkɔ zo bɛkakyi bɛ nzi bɛsi me na tɛ bɛ nyunlu;+ membɔle mɔdenle fane dɔɔnwo* kɛ mekilehile bɛ ɛdeɛ, noko bɛ nuhua biala andie na yealie ndeanlɛ ne yeado nu.+ 34 Na bɛvale bɛ ananze kyibadeɛ ne mɔ bɛhɔzieziele sua ne mɔɔ me duma la zo la anu, amaa bɛagua nwolɛ evinli.+ 35 Bieko, bɛsisile Beeyale ɛzonlenlɛ ɛleka wɔ Henɛm Ara Ne Bɔnza* ne anu,+ amaa bɛayela bɛ mra mrenyia nee bɛ mra mraalɛ wɔ senle nu bɛamaa Molɛke,+ debie mɔɔ meanga kɛ bɛyɛ+ na ɔtɛbale me ahonle* nu ɛlɛ bɔbɔ la, kɛ memaa bɛayɛ kyibadeɛ ɛhye bɛamaa Dwuda ayɛ ɛtane.’

36 “Ɛhye ati, mɔɔ Gyihova, Yizilayɛ Nyamenle ne ɛha ye wɔ suakpole ɛhye mɔɔ bɛlɛka ye wɔ nwolɛ kɛ bɛbalua konle dadeɛ, ɛhɔne nee ewulenzane zo bɛava bɛawula Babelɔn belemgbunli ne asa anu la anwo la ɛne, 37 ‘Nea, mebaboɔboa bɛ nloa meavi azɛlɛ ne mɔɔ menvale ɛya, ɛya kpole nee ahonle mɔɔ ɛfutu kpalɛ la membɔle bɛ asande mengɔle zo la anu,+ na mebava bɛ meazia meara ɛke meamaa bɛadɛnla aze anzodwolɛ nu.+ 38 Bɛbayɛ me menli, na medame noko mebayɛ bɛ Nyamenle.+ 39 Mebamaa bɛ ahonle ko+ nee adenle ko amaa bɛazulo me dahuu, ɔlua bɛdabɛ mumua ne bɛ kpalɛyɛlɛ nee bɛ mra mɔɔ bɛara bɛ nzi la kpalɛyɛlɛ ti.+ 40 Na me nee bɛ bɛayɛ dahuu ngyekyeleɛ,+ na menrɛgyakyi kɛ mebayɛ bɛ boɛ;+ na mebava me nwo ɛzulolɛ meawula bɛ ahonle nu, amaa bɛandwe bɛ nwo bɛanvi me nwo.+ 41 Me nye balie bɛ nwo na meayɛ bɛ boɛ,+ na mebavi me ahonle muala nee me ɛkɛla* muala anu mealua bɛ wɔ azɛlɛ ɛhye azo dahuu.’”+

42 “Na mɔɔ Gyihova ɛha la ɛne, ‘Kɛ mɔɔ menvale munzule mgbole ɛhye mɔ amuala membale menli ɛhye mɔ anwo zo la, zɔhane ala noko a mebava ninyɛne mgbalɛ ɛhye mɔ mɔɔ menvale membɔle bɛ ɛwɔkɛ la amuala meamaa bɛ a.+ 43 Bɛbazia bɛadɔ azɛlɛ wɔ azɛlɛ ɛhye azo bieko,+ ɔnva nwo kɛ bɛlɛka kɛ: “Azɛlɛ ɛhye ɛdɔ mgbane, menli nee nane ɛnle zo, bɛva bɛwula Kaledeama asa anu la.”’

44 “‘Bɛbazu ezukoa bɛadɔ azɛlɛ, bɛbayɛ ngyehyɛleɛ ngɛlata bɛazɔ bɛ nloa, bɛbavɛlɛ alasevolɛ wɔ Bɛngyaman azɛlɛ zo,+ wɔ ɛleka mɔɔ zuozua Gyɛlusalɛm, wɔ Dwuda azuamgbole ne mɔ azo,+ wɔ azuamgbole mɔɔ wɔ maanle ne anu awoka ne mɔ azo, wɔ azuamgbole mɔɔ wɔ awoka ne mɔ abo+ nee azuamgbole mɔɔ wɔ maanle ne nyiakɛ la, ɔluakɛ mebava bɛ menli mɔɔ wɔ akɛlɛzonlenlɛ nu la meazia meara,’+ Gyihova a se a.”