Gyɛlɛmaya
25 Edwɛkɛ mɔɔ rale Gyɛlɛmaya ɛkɛ mɔɔ fale Dwudama amuala anwo wɔ Dwosaya ara Gyɛhɔyakem,+ Dwuda belemgbunli ne ɛvolɛ nna ne anu, mɔɔ le Babelɔn Belemgbunli Nɛbukadenɛza ɛvolɛ mɔɔ limoa anu la ɛne. 2 Mɔɔ ngapezonli Gyɛlɛmaya hanle ye wɔ Dwudama amuala nee Gyɛlusalɛmma amuala anwo la ɛne:
3 “Ɔvi Emɔn ara Dwosaya, Dwuda belemgbunli ne, ɛvolɛ 13+ ne azo too mɔɔ badwu ɛnɛ la, ye ɛvolɛ 23 ɛne, Gyihova edwɛkɛ ɛra me ɛkɛ, yɛɛ medendɛ mehile bɛ fane dɔɔnwo,* noko bɛandie.+ 4 Na Gyihova zoanle ye azonvolɛ ngapezoma kɔsɔɔti bɛ nwo ɛkɛ, ɔzoanle bɛ fane dɔɔnwo,* noko bɛandie anzɛɛ bɛanyɛ ɛnzolɛ na bɛade.+ 5 Bɛhanle kɛ, ‘Mesɛlɛ bɛ, awie biala ɛzia ɔ nzi ɛvi ye ndenle ɛtane ne mɔ azo nee ye ninyɛndane nwo;+ na bɛadɛnla azɛlɛ ne mɔɔ Gyihova vale maanle bɛ nee bɛ nenyia mɔ dɛbadɛba la azo bɛahyɛ. 6 Bɛmmadi nyamenle gyɛne nzi, bɛsonle bɛ na bɛbɔ bɛ ti aze bɛmaa bɛ, bɛmmafa bɛ sa anloa gyima bɛka me ɛya; anrɛɛ mebava munzule meara bɛ nwo zo.’
7 “‘Noko bɛandie me,’ Gyihova a se a. ‘Emomu bɛva bɛ sa anloa gyima bɛha me ɛya bɛmaa munzule ɛdo bɛ.’+
8 “Ɛhye ati mɔɔ ɛlɔne Gyihova ɛha la ɛne, ‘“Kɛmɔ bɛandie me edwɛkɛ la ati, 9 melɛsoa meamaa bɛahɔvɛlɛ sɔlɔ mbusua kɔsɔɔti,”+ Gyihova a se a, “melɛsoa meamaa bɛahɔvɛlɛ Babelɔn Belemgbunli Nɛbukadenɛza, me sonvolɛ ne,+ na meamaa bɛara azɛlɛ ɛhye+ nee bɛdabɛ mɔɔ bɛde zo nee maanle maanle mɔɔ zuozua ye la kɔsɔɔti anwo zo.+ Mebazɛkye bɛ na meamaa bɛahakyi debie ɛzulolɛ bie nee debie mɔɔ bɛbabɔ nwolɛ nvonloma na bɛadɔ mgbane dahuu. 10 Mebamaa anyelielɛ ɛnelɛ nee fɛlɛkolilɛ ɛnelɛ, atɔfolɛ nrenyia ane nee atɔfolɛ raalɛ ane agyakyi, bɛnrɛde ɛdibolɛ ne yɛɛ kɛnlaneɛ ɛnrɛda bieko.+ 11 Na azɛlɛ ɛhye amuala badɔ mgbane na yeahakyi debie ɛzulolɛ bie, na maanle maanle ɛhye mɔ bɛazonle Babelɔn belemgbunli ne ɛvolɛ 70.”’+
12 “‘Na saa ɛvolɛ 70 ne dwu a,+ mebahwe Babelɔn belemgbunli ne nee maanle zɔhane anzo wɔ bɛ nvonleɛ ne anwo,’+ Gyihova a se a, ‘na mebamaa Kaledeama azɛlɛ ne adɔ mgbane dahuu.+ 13 Mebamaa edwɛkɛ mɔɔ meha metia azɛlɛ zɔhane la amuala, mɔɔ bɛhɛlɛ ye wɔ buluku ɛhye anu la amuala, mɔɔ Gyɛlɛmaya ɛha ɛdo ɛkɛ mɔɔ tia maanle maanle kɔsɔɔti la ado ye. 14 Ɔluakɛ maanle dɔɔnwo nee arelemgbunli mgbole+ bɛava bɛ ayɛ ngɛkɛlɛ,+ na mebadua bɛ kakɛ wɔ bɛ nyɛleɛ nee bɛ sa anloa gyima nwo.’”+
15 Ɔluakɛ mɔɔ Gyihova, Yizilayɛ Nyamenle ne ɛha ɛhile me la ɛne: “Die ɛyavalɛ nza kanrɛlɛ ɛhye me sa nu, na maa maanle maanle mɔɔ mebazoa wɔ wɔ bɛ nwo ɛkɛ ne la kɔsɔɔti ɛnlo. 16 Na bɛbanlo bɛabo* na bɛayɛ bɛ ninyɛne kɛ ɛzɛlɛma la, ɔlua konle dadeɛ ne mɔɔ melɛsoa meamaa yeara bɛ nwo zo la ati.”+
17 Ɔti menliele kanrɛlɛ ne wɔ Gyihova asa anu na memaanle maanle maanle mɔɔ Gyihova zoanle me wɔ bɛ nwo ɛkɛ ne la amuala nlonle:+ 18 ɔvi Gyɛlusalɛm nee Dwuda azuamgbole ne mɔ,+ ye arelemgbunli nee ye mgbanyima nwo zo, bɛbazɛkye bɛ, bɛbahakyi debie ɛzulolɛ bie, menli babɔ bɛ nwo nvonloma na bɛawa bɛ amonle,+ kɛ mɔɔ ɔlɛba bɛ nwo zo ɛnɛ la; 19 akee Yigyibiti Belemgbunli Falo nee ye sonvolɛma, ye mgbanyima nee ye menli ne amuala,+ 20 nee nyɛvolɛ mɔɔ wɔ bɛ avinli la amuala; Ɛɛze azɛlɛ zo arelemgbunli kɔsɔɔti; Filisitia+ azɛlɛ zo arelemgbunli kɔsɔɔti, Ahyekɛlɔn,+ Gaza, Ɛkelɔn nee bɛdabɛ mɔɔ bɛha Ahyedɔdo la; 21 Yidɔm,+ Mowabe+ nee Amɔnoma;+ 22 Taya arelemgbunli kɔsɔɔti, Saedɛn arelemgbunli kɔsɔɔti+ nee mbɔra mɔɔ wɔ nyevile nu la arelemgbunli; 23 Didan,+ Tima, Bɛɛze yɛɛ bɛdabɛ mɔɔ bɛkpa bɛ kɛsa la amuala;+ 24 Areleebea arelemgbunli kɔsɔɔti+ yɛɛ nyɛvolɛ mɔɔ de fienemgbole ne anu la arelemgbunli kɔsɔɔti; 25 Zemelae arelemgbunli kɔsɔɔti, Yilam arelemgbunli kɔsɔɔti+ yɛɛ Medea arelemgbunli kɔsɔɔti;+ 26 nee sɔlɔ arelemgbunli mɔɔ bikye nee mɔɔ bɛwɔ moamoa la amuala, bɛbanlo ye bɛ ti ngoko, nee arelemgbunlililɛ mɔɔ ɛha mɔɔ bɛwɔ azɛlɛ ne azo la amuala; na Hyihyake*+ belemgbunli ne noko banlo bie.
27 “Na se bɛ kɛ, ‘Mɔɔ ɛlɔne Gyihova, Yizilayɛ Nyamenle ne ɛha la ɛne: “Bɛnlo bɛbo na bɛfefe na bɛgua aze amaa bɛandwazo bieko+ ɔlua konle dadeɛ ne mɔɔ melɛmaa yeara bɛ nwo zo la ati.”’ 28 Na saa bɛkpo kɛ bɛnrɛlie kanrɛlɛ ne ɛ sa nu bɛnrɛnlo a, ka kile bɛ kɛ, ‘Mɔɔ ɛlɔne Gyihova ɛha la ɛne: “Ɔwɔ kɛ bɛno! 29 Na nea! saa melɛfa munzule mealimoa meara suakpole ne mɔɔ me duma la zo la azo a,+ ɛnee bɛnea a bɛmɛ menrɛhwe bɛ nzo ɔ?”’+
“‘Mebahwe bɛ nzo, ɔluakɛ melɛfɛlɛ konle dadeɛ meamaa yeara bɛdabɛ mɔɔ bɛde azɛlɛ ne azo la kɔsɔɔti anwo zo,’ Gyihova a se a.
30 “Ka edwɛkɛ ɛhye amuala kile bɛ na se bɛ kɛ,
‘Gyihova bahulu wɔ anwuma,
Na ɔbamaa bɛade ɔ ne wɔ ye tɛnlabelɛ nwuanzanwuanza ne.
Ɔbahulu kpole yeagua ye tɛnlabelɛ ne azo.
Ɔbadeɛdea nu kɛ bɛdabɛ mɔɔ bɛtietia vanye ma zo wɔ kuma nu la,
Ɔbado konimlilɛ edwɛne wɔ bɛdabɛ mɔɔ bɛde azɛlɛ ne azo la kɔsɔɔti anwo zo.’
31 ‘Dede bie badwu azɛlɛ ne ɛleka biala,
Ɔluakɛ Gyihova nee maanle maanle ne mɔ ɛnyia edwɛkɛ.
Ɔdaye mumua ne ɔbabua menli kɔsɔɔti ndɛne.+
Na ɔbaye amumuyɛma yeamaa konle dadeɛ,’ Gyihova a se a.
32 Mɔɔ ɛlɔne Gyihova ɛha la ɛne:
‘Nea! Munzule ɛlɛtɛlɛ avi maanle zo ahɔ maanle zo,+
Na ahumu kpole bie badu avi azɛlɛ ne ɛleka biala.+
33 Na kenle zɔhane bɛdabɛ mɔɔ Gyihova bahu bɛ la bɛagugua ɛkɛ wɔ azɛlɛ ne ɛleka biala. Bɛnrɛzu bɛ, bɛnrɛboɔboa bɛ nloa yɛɛ bɛnrɛzie bɛ. Bɛbayɛ kɛ nyɛmoa ebinli la wɔ azɛlɛ ne azo.’
34 Bɛzu na bɛye awolɛ, bɛmɛ mboaneneavolɛma!
Bɛhundo bɛ nwo aze, bɛmɛ mɔɔ bɛle titili wɔ mboane ekpunli ne anu la,
Ɔluakɛ mekɛ ɛdwu mɔɔ bɛbahu bɛ na bɛabɔ bɛ asande a,
Na bɛbagua aze kɛ mbuakɛ mɔɔ sonle bolɛ!
35 Mboaneneavolɛma ne ɛnlɛ ɛleka ɛnriandi ɛngɔ,
Yɛɛ mboane ekpunli ne anu titili ne mɔ ɛnrɛvi ɛsalɛ.
36 Bɛdie, mboaneneavolɛma ne ɛzunlɛ
Nee bɛdabɛ mɔɔ bɛle titili wɔ mboane ekpunli ne anu la awolɛyelɛ,
Ɔluakɛ Gyihova ɛzɛkye bɛ adidileka ne.
37 Gyihova ɛya wuluwulu ne ati,
Anzodwolɛ ɛleka ne ɛzɛkye bɔkɔɔ.