Gyɛlɛmaya
14 Gyihova edwɛkɛ mɔɔ fale ezule mɔɔ ɛndɔ la anwo mɔɔ rale Gyɛlɛmaya ɛkɛ ne la ɛne:+
2 Dwuda ɛlɛdi nyane,+ ye nlenkɛ mgbole ne mɔ ɛzɛkye.
Bɛyɛ basaa na bɛdudu bɛgua aze,
Bɛte ɛzunlɛ wɔ Gyɛlusalɛm.
3 Bɛ menle mɔ soa bɛ sonvolɛma* kɛ bɛhɔza nzule.
Bɛkɔ bula ne mɔ azo noko bɛnnyia nzule.
Bɛfa bɛ mbuakɛ ne mgbane bɛsia.
Bɛ nyunlu gua aze yɛɛ bɛ sa nu to,
Na bɛkeda bɛ ti zo.
4 Kɛmɔ ezule ɛndɔ azɛlɛ ne azo la ati,+
Azɛlɛ ne ɛkpakyekpakye,
Ɛyazonlɛma anyunlu ɛgua aze na bɛhedɛheda bɛ ti zo.
5 Asoasoa belɛ mɔɔ la kpɔkɛ nu bɔbɔ la, gyakyi ɔ ra adɔma ɛkɛ
Ɔluakɛ ndile biala ɛnle ɛkɛ.
6 Ɛbɔ nu asoaso gyinlegyinla awoka zo.
Bɛdie ɛnwomenle ndɛndɛ kɛ ɛzonlɛ;
Bɛ nye zo ɛyɛ bɛ kisii, ɔluakɛ bɛnnyia ndile.+
7 O Gyihova, yɛ nvonleɛ di daselɛ tia yɛ ɛdeɛ,
Noko wɔ duma ne ati, yɛ nwolɛ debie.+
Yɛanli nɔhalɛ fane dɔɔnwo,+
Na ɛdawɔ a yɛyɛ ɛtane yɛtia wɔ a.
8 O Yizilayɛ anyelazo, ye Ngoanedievolɛ+ wɔ ngyegyelɛ mekɛ nu,
Duzu ati a wɔyɛ kɛ ɛyɛvolɛ wɔ azɛlɛ ye azo,
Kɛ adendulɛnli mɔɔ ɔmakyi yeala kenle ko na yeahɔ la ɛ?
9 Duzu ati a wɔyɛ kɛ awie mɔɔ edwɛkɛ ɛzi ɔ nwo,
Kɛ katakyie mɔɔ ɛngola ɛnlie ngoane la ɛ?
Mmakpo yɛ.
10 Mɔɔ Gyihova ɛha ye wɔ menli ɛhye mɔ anwo la ɛne: “Bɛkulo akpɔsa ɛhɔlɛ;+ bɛngola ɛleka ko tɛnla.+ Yemɔti Gyihova anye ɛnlie bɛ nwo.+ Akee ɔbahakye bɛ nvonleɛ na yeahwe bɛ nzo wɔ bɛ ɛtane ne mɔ anwo.”+
11 Akee Gyihova zele me kɛ: “Mmayɛ asɔne ɛmaa menli ɛhye mɔ kɛ ninyɛne ɛhɔ boɛ ɛmaa bɛ.+ 12 Saa bɛkye ɛhɔne a, menrɛdie bɛ ɛzunlɛ,+ na saa bɛbɔ ɛyelalɛ afɔle nee ma afɔle a, me nye ɛnrɛlie nwolɛ,+ ɔluakɛ mebalua konle dadeɛ, ɛhɔne nee ewulenzane* zo meabɔ bɛ bo zo.”+
13 Ɛhye ati menganle kɛ: “O Tumivolɛ Awulae Gyihova! Nea, ngapezoma ne ɛlɛka ahile bɛ kɛ, ‘Bɛnrɛnwu konle dadeɛ yɛɛ ɛhɔne ɛnrɛhu bɛ, emomu mebamaa bɛ nɔhalɛ anzodwolɛ wɔ ɛke.’”+
14 Akee Gyihova zele me kɛ: “Ngapezoma ne ɛlɛka adalɛ ngapezo wɔ me duma nu.+ Metɛsoanle bɛ yɛɛ metɛkanle ɛhwee metɛkilele bɛ yɛɛ me nee bɛ ɛtɛtendɛle.+ Adalɛ ɛnyelɛzodeɛnwunlɛ nee abisadeɛ mɔɔ nvasoɛ ɛnle zo nee adalɛ edwɛkɛ mɔɔ wɔ bɛ ahonle nu la yɛɛ bɛlɛka bɛahile bɛ a.+ 15 Ɛhye ati mɔɔ Gyihova ɛha ye wɔ ngapezoma mɔɔ fa me duma ka ngapezo wɔ mekɛ mɔɔ metɛsoanle bɛ na bɛka kɛ konle dadeɛ anzɛɛ ɛhɔne ɛnrɛra azɛlɛ ɛhye azo la anwo la ɛne: ‘Konle dadeɛ nee ɛhɔne a bahuhu ngapezoma zɔhane a.+ 16 Na ɛhɔne nee konle dadeɛ ti, bɛbavuandi menli mɔɔ ɛlɛka ngapezo ne ahile bɛ la avunli bɛagua Gyɛlusalɛm awɔdenle ne mɔ azo, awie biala ɛnrɛzie bɛ+—bɛ nee bɛ ye mɔ, bɛ mra mrenyia, anzɛɛ bɛ mra mraalɛ—ɔluakɛ mebawola munzule mɔɔ fɛta bɛ la meagua bɛ nwo zo.’+
17 “Ka edwɛkɛ ɛhye kile bɛ,
‘Maa me nye ɛhwi monle alehyenlɛ nee aledwolɛ, mmamaa ɔpɛ,+
Ɔluakɛ ɛbodalɛ kpole bie+
Ɛmaa me menli ne ɛgua aze na bɛbubu bɔkɔɔ.
18 Saa mekɔ ɛbɔ nu na menea a,
Menwu bɛdabɛ mɔɔ bɛwu konle dadeɛ nloa la avunli!+
Na saa meba suakpole ne azo a,
Menwu bɛdabɛ mɔɔ ɛhɔne ɛmaa anwonyane ɛbɔ bɛ la!+
Ɔluakɛ ngapezoma nee ɛsɔfoma luolua nu wɔ azɛlɛ mɔɔ bɛnze zo la azo.’”+
19 Asoo wɔkpo Dwuda bɔkɔɔ, anzɛɛ ɛkyi Zayɔn ɔ?+
Duzu ati a wɔboda yɛ mɔɔ yɛnnyia ayile biala yɛnyɛ a?+
Ɛnee yɛ nye la anzodwolɛ ade, noko debie kpalɛ amba,
Ɛnee yɛlɛkpondɛ ayileyɛlɛ, noko ɛzulolɛ a rale a!+
20 O Gyihova, yɛdie yɛ amumuyɛyɛlɛ ne yɛto nu,
Nee yɛ nenyia mɔ nvonleɛ ne,
Ɔluakɛ yɛyɛ ɛtane yɛtia wɔ.+
21 Wɔ duma ne ati, mmakpo yɛ;+
Mmabu ɛ nye ɛgua wɔ anyunlunyia belemgbunli ebia ne azo.
Kakye ngyekyeleɛ ne mɔɔ ɛ nee yɛ yɛle la, mmasɛkye ye.+
22 Asoo maanle maanle ne mɔ ananze ne mɔ mɔɔ nvasoɛ ɛnle zo la anu bie kola maa ezule tɔ,
Anzɛɛ anwuma angome kola maa ezule tɔ ɔ?
O Gyihova yɛ Nyamenle, asoo tɛ ɛ ngomekye ala?+
Yɛ anyelazo a le wɔ,
Ɔluakɛ ɛ ngomekye a wɔyɛ ninyɛne ɛhye mɔ amuala a.