Gyɛlɛmaya
11 Edwɛkɛ mɔɔ vi Gyihova ɛkɛ rale Gyɛlɛmaya ɛkɛ ne la ɛne: 2 “Bɛdie ngyekyeleɛ ɛhye anu edwɛkɛ ne!
“Ka* kile Dwuda mrenyia nee Gyɛlusalɛmma 3 na se bɛ kɛ, ‘Mɔɔ Gyihova, Yizilayɛ Nyamenle ne ɛha la ɛne: “Munzule ɛha sonla ne mɔɔ ɔndie ngyekyeleɛ ɛhye anu edwɛkɛ ne,+ 4 edwɛkɛ mɔɔ menganle mengilele bɛ nenyia mɔ wɔ kenle ne mɔɔ menyele bɛ menvile Yigyibiti azɛlɛ ne azo,+ wɔ bulalɛ fonlomo ne anu+ la kɛ, ‘Bɛdie me ne, na bɛyɛ mɔɔ mebaha meahile bɛ la amuala; na bɛbayɛ me menli na medame noko meayɛ bɛ Nyamenle,+ 5 amaa meali ndane ne mɔɔ menganle mengilele bɛ nenyia mɔ la azo, kɛ mebava azɛlɛ mɔɔ meleke nee wolɛ se zolɛ la meamaa bɛ,+ kɛ mɔɔ ɔde ye ɛnɛ la.’”’”
Na membuale kɛ: “Amen,* O Gyihova.”
6 Na Gyihova zele me kɛ: “Ka edwɛkɛ ɛhye mɔ amuala wɔ Dwuda azuamgbole ne mɔ nee Gyɛlusalɛm awɔdenle ne mɔ azo: ‘Bɛdie ngyekyeleɛ ɛhye anu edwɛkɛ ne na bɛli zo. 7 Ɔluakɛ mendule bɛ nenyia mɔ folɛ ɛsesebɛ wɔ kenle mɔɔ menyele bɛ menvile Yigyibiti la too yeradwu ɛnɛ, mendule bɛ folɛ fane dɔɔnwo kɛ: “Bɛdie me ne.”+ 8 Noko bɛandie yɛɛ bɛanyɛ ɛnzolɛ; emomu, awie biala yɛle anzosesebɛ lile ɔdaye mumua ne ye ahonle ɛtane nzi.+ Ɔti memaanle edwɛkɛ mɔɔ wɔ ngyekyeleɛ ɛhye anu mɔɔ menganle mengilele bɛ kɛ bɛli zo na bɛanli zo la amuala rale bɛ nwo zo.’”
9 Akee Gyihova zele me kɛ: “Dwuda mrenyia nee Gyɛlusalɛmma ɛbɔ adwenle kɛ bɛte me nwo atua. 10 Bɛzia bɛhɔ ɛtane ne mɔ mɔɔ bɛ nenyia mɔ mɔɔ bɛanli me edwɛkɛ zo yɛle ye wɔ mɔlebɛbo ne la anwo.+ Bɛdabɛ noko bɛhɔli nyamenle gyɛne nzi na bɛzonle bɛ.+ Yizilayɛma nee Dwudama ɛzɛkye* ngyekyeleɛ ne mɔɔ me nee bɛ nenyia mɔ yɛle la.+ 11 Ɛhye ati mɔɔ Gyihova ɛha la ɛne, ‘Nea melɛfa munzule+ mɔɔ bɛnrɛhola bɛnrɛvi nu la meara bɛ nwo zo. Saa bɛsu bɛfɛlɛ me kɛ bɛkpondɛ moalɛ a, menrɛdie bɛ.+ 12 Na Dwuda azuamgbole nee Gyɛlusalɛmma bahɔ bɛ nyamenle ne mɔ mɔɔ bɛbɔle afɔle bɛmaanle bɛ* la ɛkɛ bɛahɔkpondɛ moalɛ,+ noko wɔ bɛ munzule mekɛ ne anu ɛhye mɔ ɛnrɛhola ɛnrɛlie bɛ. 13 Ɔluakɛ O Dwuda, wɔ nyamenle ne mɔ anwo ɛzo kɛ wɔ azuamgbole ne mɔ la, na kɛ mɔɔ awɔdenle dɔɔnwo wɔ Gyɛlusalɛm la zɔhane ala a wɔzi afɔlemokyea dɔɔnwo wɔmaa anyiemgba deɛ ne* a, afɔlemokyea mɔɔ bɛbabɔ afɔle wɔ zo bɛamaa Beeyale la.’+
14 “Noko wɔmɔ,* mmayɛ asɔne ɛmaa menli ɛhye mɔ. Mmasu anzɛɛ mmayɛ asɔne ɛmaa bɛ,+ ɔluakɛ saa bɛ amaneɛnwunlɛ ti bɛsu bɛfɛlɛ me a menrɛdie.
15 Duzu ati a ɔwɔ kɛ me kulovolɛ ne tɛnla me sua nu
Wɔ mekɛ mɔɔ menli dɔɔnwo ɛva adwenle ɛtane la ɛ?
Saa munzule ne ba bɛ nwo zo a, asoo nane nwuanzanwuanza* bamaa yeavi bɛ nwo zo ɔ?
Mekɛ zɔhane, asoo bɛ nye balie?
16 Mekɛ bie Gyihova vɛlɛle wɔ ɔlivi baka buzuu,
Ɛnee ɛle kɛnlɛma yɛɛ wɔ ma le kpalɛ.
Noko dede kpole bie rale na ɔdole senle wɔ ye nu,
Na bɛbubule ye ngane ne mɔ.
17 “Ɛlɔne Gyihova, Mɔɔ luale wɔ+ la ɛha kɛ munzule bado wɔ ɔlua ɛtane mɔɔ Yizilayɛma nee Dwudama ɛyɛ la ati, bɛbɔ afɔle bɛmaa Beeyale bɛva bɛha me ɛya.”+
18 Gyihova bɔle me amaneɛ amaa meanwu ye;
Mekɛ zɔhane ɛmaanle menwunle mɔɔ bɛlɛyɛ la.
19 Ɛnee mele kɛ boaneralɛ mɔɔ le bɛlɛvo mɔɔ bɛlɛkɔ bɛahɔhu ye la.
Ɛnee menze kɛ bɛva me nwo adwenle ɛtane:+
“Bɛmaa yɛzɛkye baka ne nee ye ma ne amuala,
Na yɛpɛ ye yɛvi anyewɔzoamra azɛlɛ ne azo,
Amaa bɛangakye ye duma bieko.”
Maa menwu kɛ wɔli bɛ nzenralɛ,
Ɔluakɛ wɔmɔ a meva me edwɛkɛ mewula ɛ sa nu a.
21 Ɛhye ati, mɔɔ Gyihova ɛha ɛtia Anatɔto mrenyia+ mɔɔ bɛkpondɛ kɛ bɛpɛ wɔ ngoane zo* na bɛka kɛ: “Mmaka ngapezo wɔ Gyihova duma nu bieko+ anrɛɛ yɛkɛhu wɔ la”; 22 ɔti mɔɔ ɛlɔne Gyihova ɛha la ɛne: “Nea mebahwe bɛ nzo. Bɛbava konle dadeɛ bɛahu mgbavolɛ ne mɔ,+ na bɛ mra mrenyia nee bɛ mra mraalɛ bawu ɛhɔne nu.+ 23 Na bɛdabɛ mɔɔ bɛbaha la anu biala ɛnrɛha, ɔluakɛ mebamaa munzule ado mrenyia mɔɔ bɛwɔ Anatɔto la+ wɔ bɛ anzohwenlɛ ɛvolɛ ne anu.”