53 Nwane a ɛnyia diedi wɔ mɔɔ bɛdele bɛvile yɛ ɛkɛ ne la anu a?+
Na nwane a Gyihova ɛye ɔ sa ɛhile ye a?+
2 Ɔbafifi kɛ baka ekyi bie+ wɔ ɔ nyunlu, kɛ ndinli wɔ azɛlɛ resee zo.
Ɔnzɔho ɛhwee, yɛɛ ɔnle kɛnlɛma;+
Saa yɛnwu ye a, ɔ nwo ɛngile kɛ ɔwɔ kɛ yɛbikye ye.
3 Menli ambu ye bie yɛɛ bɛkpole ye,+
Sonla mɔɔ nwunle nyane na ɛnee ɔze anwodolɛ deɛ holɛ.
Ɛnee ɔle kɛ asɛɛ bɛva ɔ nyunlu bɛvea yɛ.
Bɛambu ye bie yɛɛ yɛbule ye kɛ ɔ nwo ɛngyia.+
4 Nɔhalɛ nu, ɔdaye a ɔzoale yɛ anwodolɛ kɔsɔɔti,+
Na ɔliele yɛ nyanelilɛ kɔsɔɔti ɔdole ɔ nwo zo a.+
Noko yɛbule ye kɛ Nyamenle ɛhwe ɔ nzo, yebo ye na yehile ye nyane.
5 Noko yɛ mɛladonlɛ ti a bɛbodɛbodale ye a;+
Yɛ ɛtane ne mɔ ati ɔnwunle amaneɛ kpole.+
Ɔzoale anzohwenlɛ amaa yɛanyia anzodwolɛ,+
Na ye nganlɛ ne mɔ ati, bɛyɛle yɛ ayile.+
6 Yɛ muala yɛminli kɛ mboane,+
Ko biala ɛva ye adenle ɛdeɛ zo,
Na Gyihova ɛva yɛ ɛtane ne mɔ amuala ɛgua ɔ nwo zo.+
7 Bɛsisile ye+ yɛɛ ɔmaanle bɛhilele ye nyane,+
Noko yeambuke ɔ nloa.
Bɛ nee ye hɔle kɛ boane mɔɔ bɛkahu ye,+
Kɛ boane belɛ mɔɔ ɛyɛ koonwu wɔ menli mɔɔ ɛlɛpepɛ ɔ nwo enrinli anyunlu la,
Na yeambuke ɔ nloa.+
8 Ɔlua nzisi nee ndɛnebualɛ ti, bɛvale ye bɛhɔle;
Nwane a bava ye awolɛndoazo ne anwo edwɛkɛ agyegye ɔ nwo a?
Ɔluakɛ bɛpɛle ye bɛvile anyewɔzoamra azɛlɛ zo;+
Me menli ne mɛladonlɛ ti bɛbole ye.+
9 Bɛbɔle ye nla bɛbokale amumuyɛma anwo,+
Ye ewule nu bɛziele ye wɔ sukoavolɛma avinli,+
Noko yeanyɛ ɛtane biala
Yɛɛ bɛannwu mɛlɛbɛla biala wɔ ɔ nloa anu.+
10 Noko ɛnee ɔle Gyihova ɛhulolɛdeɛ kɛ ɔbanwu amaneɛ na ɔ nwo ado ye.
Saa ɛfa ye ngoane ɛbɔ ɛtane afɔle a,+
Ɔbanwu ɔ bo zo amra, ɔbanyi yeahyɛ,+
Na ɔlua ɔ nwo zo, mɔɔ Gyihova kulo la bayɛ zɔ.+
11 Ye amaneɛnwunlɛ ne ati, ɔ kunlu badwo mɔɔ ɔbanwu ye la anwo.
Me sonvolɛ tenlenenli ne balua ye nrɛlɛbɛ zo+
Yeamaa menli dɔɔnwo ayɛ tenlenema,+
Na yeazoa bɛ ɛtane ne mɔ.+
12 Yemɔti mebamaa ye kyɛfoa wɔ menli dɔɔnwo avinli,
Na ɔ nee katakyiema bahyɛ ninyɛne mɔɔ bɛnyianle ye wɔ konle nu la,
Ɔluakɛ ɔvale ye ngoane ɔmaanle bɔbɔ ɔhɔle ewule nu+
Na bɛdianle ye bɛbokale mɛladonlɛma anwo;+
Ɔzoale menli dɔɔnwo ɛtane,+
Na ɔkpale mɛladonlɛma ati kyɛlɛ.+