Sɔlɔmɔn Edwɛne
5 “O me diema raalɛ, me atɔfolɛ,
Mewolo me tola ne anu.+
Metete me alufuanlɛ nee me ninyɛne evuanlɛ.+
Meli me wolɛ ndɛlamoa nee me wolɛ;
Menlo me nwanye nee me meleke.”+
“Agɔnwolɛma, bɛli debie!
Bɛnlo ɛhulolɛ edwɛkɛ na bɛmaa ɔbo bɛ!”+
2 “Mela, noko me ahonle ɛdwazo.+
Mete me kulovolɛ ne ane kɛ ɔlɛbɔ anlenkɛ ne anu!”
“O me diema raalɛ, me kulovolɛ, buke me,
Me abubule mɔɔ di munli!
Ɔluakɛ ɛbɔlɛ ɛloa me ti zo,
Nɔɔzo ɛbɔlɛ ɛloa me ti enrinli ne.”+
3 “‘Meye me tɛladeɛ ne.
Ɔwɔ kɛ mewula ye bieko ɔ?
Mewowo me gyakɛ anwo.
Ɔwɔ kɛ meyɛ nwolɛ evinli bieko ɔ?’
4 Me kulovolɛ ne yele ɔ sa vile anlenkɛ ne tokule ne anu,
Na me nwo lɔle ye.
5 Mendwazole kɛ mekabuke me kulovolɛ ne;
Me sa anwo alufuanlɛ ne zonyinle guale,
Yɛɛ me sa mrɛlɛsɛka ne anwo alufuanlɛ nwole ne
Zonyinle guale kolɔkolɔ ne anwo.
6 Membukele me kulovolɛ ne,
Noko ɛnee me kulovolɛ ne ɛhakyi ɔ nye na yehɔ.
Mɔɔ ɔhɔle la, me rɛle bɔle.*
Memkpondɛle ye, noko meannwu ye.+
Menvɛlɛle ye, noko yeanlie zolɛ.
7 Sinzavolɛma mɔɔ luolua sua ne azo la nwunle me.
Bɛbobɔle me na bɛbodale me.
Menli mɔɔ sinza bane ne mɔ la yele me ti zo aguzo ne.
8 O Gyɛlusalɛm mraalɛ, meka ndane meado bɛ nwo kɛ:
Saa bɛnwu me kulovolɛ ne a,
Bɛha bɛhile ye kɛ ɛhulolɛ ɛmaa me nwo ɛdo me.”
9 “Duzu a maa wɔ kulovolɛ ne tɛla kulovolɛ gyɛne biala,
Wɔmɔ mɔɔ ɛ nwo yɛ fɛ tɛla mraalɛ kɔsɔɔti a?
Duzu a maa wɔ kulovolɛ ne tɛla kulovolɛ gyɛne biala,
Mɔɔ ɔti wɔha ndane zɛhae wɔdo yɛ nwo a?”
10 “Me kulovolɛ ne anwo ta yɛɛ ɔbolo;
Ɔgyi menli apenle bulu avinli a, ɔle ngakyile.
11 Ɔ ti le nvutuke, nvutuke tagyee.
Ɔ ti zo enrinli le kɛ arɛlɛ mrɛlakɛ mɔɔ anwoma ɛlɛbɔ ye la,
Ɔle bile kisikisi kɛ kɔkɔsɛlɛ.
12 Ɔ nye ma le kɛ abubule mɔɔ gyigyi azudenle nloa,
Mɔɔ bɛlɛbia wɔ meleke nu,
Na bɛdede nzubula mɔɔ ɛyi tɛkɛɛ la anwo* la.
13 Ɔ nvoka le kɛ felawɔse evuanlɛ mɔɔ ɛfifi kofie zo,+
Nya evuanlɛ mɔɔ bɛhuohua ye edukue la.
Ɔ nloa le kɛ aloa mɔɔ alufuanlɛ nwole vi nu sonyi gua la.+
14 Ɔ sa mrɛlɛsɛka le nvutuke, ɔ sa ati le kelesɔlaete.
Ɔ ko le kɛ ɛzɛlɛ* mɔɔ ɔta mɔɔ bɛva safaya bɛfɔlo nwolɛ la.
15 Ɔ gyakɛ le kɛ mabolo* mpila mɔɔ gyigyi nvutuke tagyee adiabo zo la.
Ɔle kɛnlɛma kɛ Lɛbanɔn, ɔle kɛ sida mbaka mɔɔ tɛla biala.+
16 Ɔ nloa anu le menlemenle,
Yɛɛ ɔ nwo debie biala le kɛnlɛma.+
O Gyɛlusalɛm mraalɛ, ahenle mɔɔ la me ahonle nwo, me kulovolɛ ne ɛne.”