Edwɛne
Kɔmaa edwɛndolɛma kpanyinli ne. Devidi ayɛlɛyelɛ edwɛne.
64 O Nyamenle, saa mebodo wɔ a, tie me.+
Kpɔvolɛ ne anwo ɛzulolɛ ti, bɔ me ngoane nwo bane.
2 Bɔ me nwo bane fi amumuyɛma adwenle ɛtane mɔɔ bɛvea bɛbɔ la anwo,+
Bɔ me nwo bane wɔ ɛtanevolɛma dɔɔnwo ne anwo.
3 Bɛsi bɛ tafinlima kɛ konle dadeɛ;
Bɛsua bɛ nloa edwɛkɛ mɔɔ yɛ nyane kɛ ɛda mbaka la,
4 Kɛ bɛfi bɛ ɛvealeka ne mɔ bɛado bɛawɔ mɔɔ anwo ɛnlɛ edwɛkɛ la;
Bɛto bɛwɔ ye arɛlevilɛ nu mɔɔ bɛnzulo a.
5 Bɛsɔ bɛ amumuyɛ adwenle ne anu ɛsesebɛ;*
Bɛsuzu kɛzi bɛbava bɛ ngane ne mɔ bɛavea la anwo.
Bɛka kɛ: “Nwane a banwu ngane ne mɔ a?”+
6 Bɛkpondɛ ndenle fofolɛ mɔɔ bɛdua zo bɛdi ɛtane la;
Bɛdua nrɛlɛbɛ adenle zo bɛfea bɛbɔ adwenle ɛtane;+
Bɛngola bɛnnwu mɔɔ awie biala dwenle nwo wɔ ye ahonle nu la.
7 Noko Nyamenle bado ɛda awɔ bɛ;+
Bɛbaboda arɛlevilɛ nu.
8 Bɛ tafinlima bamaa bɛadɔ aze;+
Bɛdabɛ mɔɔ bɛbanwu bɛ la kɔsɔɔti bakpusu bɛ ti.
9 Akee menli kɔsɔɔti bazulo,
Na bɛabɔ mɔɔ Nyamenle ɛyɛ la nolo,
Na bɛanyia ye nyɛleɛ ne mɔ anwo ndelebɛbo.+