Dwobu
5 “Mesɛlɛ wɔ fɛlɛ nea! Asoo awie wɔ ɛkɛ mɔɔ ɔbalie wɔ zo a?
Nwuanzanwuanzama ne mɔ anu boni a ɛbavɛlɛ ye kɛ ɔboa wɔ a?
2 Ɔluakɛ ɛyavalɛ bahu koasea,
Yɛɛ anyebolo bahu sonla mɔɔ ye adwenle ɛtɛtinli la.
3 Menwunle kɛ koasea ɛlɛsosɔ ndinli,
Noko arɛlevilɛ nu ala bɛwale ye tɛnlabelɛ ne amonle.
4 Ɔ mra nee banebɔlɛ avinli wale,
Yɛɛ bɛsisi* bɛ wɔ suakpole ne anlenkɛ kpole ne anloa,+ bɛnnyia awie ɛnlie bɛ.
5 Sonla mɔɔ ɛhɔne ɛlɛku ye la di ma mɔɔ ɔkɛde la,
Ɔfa mɔɔ wɔ mbowule nu bɔbɔ la,
Yɛɛ ɛhane bahye bɛ agyapadeɛ.
6 Ɔluakɛ ninyɛndane ɛnfifi ndɛtɛlɛ nu,
Yɛɛ ngyegyelɛ ɛnfifi azɛlɛ nwo.
7 Ɔluakɛ bɛwo sonla bɛmaa ngyegyelɛ,
Kɛ mɔɔ sendɔlɔra tudu kɔ anwuma ala la.
8 Noko, saa medame a, anrɛɛ mebabodo Nyamenle,
Na meava me edwɛkɛ meawula Nyamenle asa anu,
9 Meamaa Ahenle mɔɔ yɛ ninyɛne mgbole mɔɔ bɛngola bɛnvedevede nu,
Nwanwane ninyɛne mɔɔ ɛnlɛ ɔ nloa la.
10 Ɔmaa ezule tɔ azɛlɛ ye azo
Na ɔmaa ɛya ne mɔ nyia nzule.
11 Ɔkpogya koahweabanema zo kpalɛ,
Na ɔkpogya mɔɔ ɛlɛdi nyane la zo ɔkɔ ngoanelielɛ nu.
12 Ɔsɛkye adwenle ɛtane mɔɔ mɛlɛbɛlama kɛbɔ la,
Amaa bɛ sa anloa gyima amkpazi.
13 Ɔkye nrɛlɛbɛvolɛma wɔ bɛdabɛ mumua ne bɛ agyibadolɛ nu,+
Amaa mɔɔ anye gyi ɔ ti anwo la ngyehyɛleɛ ne mɔ ayɛ mgbane.
14 Awozinli fa bɛ wɔ alehyenlɛ nu,
Na bɛfuovua ewiazo kɛ asɛɛ nɔɔzo.
15 Ɔdie menli ɔfi nzisima atafinlima mɔɔ le kɛ konle dadeɛ la anloa,
Ɔdie ehyiavolɛma ɔfi anwosesebɛma asa anu,
16 Na koahweabanema nyia anyelazo,
Noko ɔmaa ɛtanevolɛma ka bɛ nloa to nu.
17 Nea! Anyelielɛ a le sonla ne mɔɔ Nyamenle kɛhwi ɔ nyunlu la;
Ɔti mmakpo Tumivolɛ Bedevinli ne ɛdenrɛdenrɛlɛ!
18 Ɔluakɛ ɔmaa bɛdi nyane, noko ɔkyekye hanlɛ ne;
Ɔboda, noko ɔfa ɔ sa ɔyɛ ayile.
19 Ɔbalie wɔ yeavi munzule nsia anu,
Mɔɔ tɔ zo nsuu bɔbɔ la ɛnrɛboda wɔ.
20 Ɛhɔne mekɛ nu, ɔbalie wɔ yeavi ewule nu,
Na yealie wɔ yeavi konle dadeɛ nloa wɔ konle nu.
21 Ɔbabɔ ɛ nwo bane yeavi ɛtafinlimalɛ mɔɔ bila kɛ empele la anwo,+
Na saa ɛzɛkyelɛ ba a, ɛnrɛzulo.
22 Ɛbazele ɛzɛkyelɛ nee ɛhɔne,
Na ɛnrɛzulo azɛlɛ ye azo nane anwo ɛzulolɛ.
23 Ɔluakɛ ɛbɔ nu awolɛ ɛnrɛboda wɔ,*
Yɛɛ nane anwo ɛzulolɛ mɔɔ wɔ ɛbɔ nu la nee wɔ badɛnla anzodwolɛ nu.
24 Ɛbanwu kɛ wɔ ɛdanlɛsua ne gyi kpundii,*
Na saa ɛkɔnea wɔ mboane adidileka ne a, ɛbanwu kɛ bie ɛtɛminlinle.
25 Ɛbawo mralɛ dɔɔnwo,
Na ɛ bo zo amra anwo bazo kɛ azɛlɛ ye azo ndile.
26 Ɛbahɔ nla ne anu la ɛnee ɛtɛdɛ anwosesebɛ,
Kɛ ma mɔɔ bɛhye ye file mɔɔ bɛboɔboale bɛ nloa wɔ bɛ mekɛ nu la.
27 Nea! Yɛnleɛnlea ɛhye anu, na ɔle zɔ.
Tie na die to nu.”