Edwɛkɛsisilɛ Mɔɔ Tɔ Zo Nwiɔ

31 Mɔɔ bɛwiele ɛhye mɔ amuala ala la, Yizilayɛma mɔɔ ɛnee wɔ ɛkɛ ne la amuala hɔle Dwuda azuamgbole ne mɔ azo, na bɛbubule ɛzonlenlɛ mpila ne mɔ,+ bɛpepɛle ɛzonlenlɛ mbaka* ne mɔ,+ na bɛbubule ɛzonlenlɛ ɛleka ne mɔ*+ nee afɔlemokyea+ mɔɔ wɔ Dwuda nee Bɛngyaman la amuala, yɛɛ mɔɔ wɔ Yifelaem nee Manasɛ la,+ kɔkpula kɛ bɛzɛkyele bɛ bɔkɔɔ, ɛhye anzi Yizilayɛma amuala ziale hɔle bɛ azuamgbole ne mɔ azo, bɛ nuhua ko biala hɔle ye sua nu.

2 Akee Hɛzikaya yɛle ɛsɔfo ne mɔ ekpunli ekpunli+ yɛɛ Livaema ne ekpunli ekpunli,+ na ɔmaanle ɛsɔfoma ekpunli ko biala nee Livaema ekpunli ko biala gyima,+ kɛ bɛbɔ ɛyelalɛ afɔle nee anzodwolɛ afɔle, bɛzonle na bɛyɛ mo na bɛye ayɛlɛ wɔ Gyihova alienwo* ɛkɛ+ nlenkɛ mgbole ne mɔ anloa. 3 Bɛvale belemgbunli mumua ne ninyɛne ne mɔ bie bɛmaanle kɛ bɛva bɛbɔ ɛyelalɛ afɔle,+ nwonlomɔ nee nɔsolɛ afɔlebɔdeɛ+ boka nwolɛ, yɛɛ ɛyelalɛ afɔle mɔɔ bɛbɔ ye Ɛnwomenlelielɛ kenle,+ siane fofolɛ+ yɛɛ ɛvoyialilɛ ne mɔ+ anu, kɛ mɔɔ bɛhɛlɛ ye wɔ Gyihova Mɛla ne anu la.

4 Yeanga ye zɔ, ɔhanle ɔhilele menli mɔɔ wɔ Gyɛlusalɛm la kɛ bɛva ɛsɔfoma nee Livaema kyɛfoa ne bɛmaa bɛ,+ amaa bɛali Gyihova mɛla ne azo pɛpɛɛpɛ.* 5 Mɔɔ bɛhanle edwɛkɛ ne ala la, Yizilayɛma vale ma mɔɔ limoa, nwanye fofolɛ, nwole+ nee wolɛ dɔɔnwo kpalɛ yɛɛ ɛbɔ nu nzoleɛ+ kɔsɔɔti bie rale; bɛvale debie biala ngyɛnu bulu anu ko dɔɔnwo kpalɛ bɛrale.+ 6 Na Yizilayɛma nee Dwudama mɔɔ dede Dwuda azuamgbole ne mɔ azo la noko vale bɛ nlankɛ nee mboane ngyɛnu bulu anu ko ne mɔ nee ninyɛne nwuanzanwuanza ne mɔɔ bɛdele nwolɛ bɛmaanle Gyihova bɛ Nyamenle ne la ngyɛnu bulu anu ko ne rale.+ Bɛvale bɛrale na bɛhuohuanle bɛ edukue dɔɔnwo. 7 Bɛbɔle ɔ bo bɛhuohuanle bɛ ndoboa ne anloa edukue edukue wɔ siane nsa ne anu;+ na bɛwiele siane nsuu ne anu.+ 8 Mɔɔ Hɛzikaya nee mgbanyima ne mɔ rale na bɛnwunle ninyɛne edukue edukue ne mɔ la, bɛyele Gyihova ayɛlɛ na bɛyilale ye menli Yizilayɛma.

9 Hɛzikaya bizale ɛsɔfo ne mɔ nee Livaema ne ninyɛne edukue edukue ne anwo edwɛkɛ, 10 na ɛsɔfo kpanyinli Azalaya mɔɔ vi Zeedɔko sua nu la zele ye kɛ: “Ɔvi mekɛ mɔɔ bɛbɔle ɔ bo kɛ bɛfa ninyɛne bɛara Gyihova sua nu la,+ menli ne di aleɛ maa bɛ ko yi na bie dɔɔnwo tɛbɔ ɛkɛ, ɔluakɛ Gyihova ɛyila ye menli ne, na dɔɔnwo kpalɛ ɛhye ɛha.”+

11 Ɛhye ati Hɛzikaya zele bɛ kɛ bɛyɛ ninyɛnezielɛ ɛleka*+ wɔ Gyihova sua nu ɛkɛ, yemɔti bɛyɛle. 12 Bɛlile nɔhalɛ bɛvale ninyɛne ne bɛrale, ngyɛnu bulu anu ko*+ ne mɔ nee ninyɛne nwuanzanwuanza ne mɔ; bɛmaanle Livaenli Konanaya nleanle ɛhye mɔ amuala azo, na ɔnle ɛkɛ a ɔ diema Hyemɛyae a wɔ ɛkɛ a. 13 Gyɛhayɛle, Azazaya, Neehate, Asahɛle, Gyɛlimɔto, Dwozabade, Yileɛle, Yesemakaya, Meehate yɛɛ Bɛnaya a le mbɔlɔba mgbanyima mɔɔ Belemgbunli Hɛzikaya hanle kɛ bɛboa Konanaya nee ɔ diema Hyemɛyae a, yɛɛ Azalaya a nleanle nɔhalɛ Nyamenle ne sua ne azo a. 14 Na Livaenli Yemenaa ara Kola mɔɔ nea aduduleɛ+ anlenkɛ kpole ne la a ɛnee nea afɔle mɔɔ bɛfi bɛ ɛhulolɛ nu bɛbɔ+ bɛmaa nɔhalɛ Nyamenle ne la azo a, na ɔhyɛle ninyɛne mɔɔ bɛvale bɛrɛlɛle Gyihova+ nee ninyɛne nwuanzanwuanza kpalɛ ne mɔ.+ 15 Na menli mɔɔ vea ɔ bo la a le Yidɛn, Menayamen, Gyɛhyua, Hyɛmaya, Amalaya yɛɛ Hyɛkanaya mɔɔ bɛwɔ ɛsɔfo ne mɔ azuamgbole ne mɔ+ azo, mɔɔ bɛbu bɛ nɔhavoma la ati bɛva gyima bɛwula bɛ sa nu kɛ bɛhyɛ aleɛ ne pɛpɛɛpɛ bɛmaa bɛ mediema ne mɔ wɔ bɛ ekpunli ne mɔ anu+ bɛmaa mgbole nee ngyikyi kɔsɔɔti la. 16 Bɛyɛle ɛhye bɛbokale aleɛ mɔɔ bɛhyɛle bɛmaanle mrenyia mɔɔ bɛli ɛvolɛ nsa mɔɔ kɔ mɔɔ bɛhɛlɛle bɛ aluma kɛ mɔɔ bɛ mbusua de, mɔɔ bɛrazonlenle dahuu wɔ Gyihova sua ne anu na bɛyɛle gyima mɔɔ bɛvale bɛmaanle bɛ ekpunli ekpunli ne mɔ la anwo.

17 Bɛhɛlɛle ɛsɔfo ne mɔ nee Livaema mɔɔ ɛli ɛvolɛ 20 mɔɔ kɔ la+ aluma kɛ mɔɔ bɛ mbusua nee bɛ papa mɔ awuke ne mɔ de la+ bɛmaanle bɛ ekpunli ekpunli gyima ne mɔ.+ 18 Bɛhɛlɛle bɛ ngakula ne mɔ, bɛ ye mɔ, bɛ mra mrenyia nee bɛ mra mraalɛ kɔsɔɔti yɛɛ bɛ asafo ne amuala aluma bɛbokale abusua ne anwo—ɔluakɛ bɛhɔle zo bɛmaanle bɛ nwo dele na bɛyɛle gyima ne mɔɔ bɛbule bɛ nɔhavoma la ati bɛvale bɛwulale bɛ sa nu la— 19 nee Aalɔn abozoamra ne, ɛsɔfo ne mɔ mɔɔ de adidileka mɔɔ zuozua azuamgbole ne mɔ azo la.+ Bɛbobɔle mrenyia bie mɔ aluma na bɛyele bɛ wɔ azuamgbole ne mɔ amuala azo kɛ bɛva nrenyia ko biala mɔɔ boka ɛsɔfo ne mɔ anwo nee awie biala mɔɔ bɛhɛlɛle ye duma bɛbokale Livaema abusua ne anwo la aleɛ bɛmaa ye.

20 Hɛzikaya yɛle ɛhye wɔ Dwuda amuala, na ɔhɔle zo ɔyɛle mɔɔ le kpalɛ na ɔtenrɛ na ɔle nɔhalɛ la wɔ Gyihova ye Nyamenle ne anye zo. 21 Na gyima biala mɔɔ ɔyɛle kɛ ɔfa yeakpondɛ ye Nyamenle ne abo zo la, saa ɔfale nɔhalɛ Nyamenle ne sua ne anu ɛzonlenlɛ gyima nwo o,+ anzɛɛ Mɛla nee adehilelɛ nwo o, ɔvile ye ahonle nu a ɔyɛle a, na ɔwiele ye boɛ.