Edwɛkɛsisilɛ Mɔɔ Tɔ Zo Nwiɔ

27 Dwotam+ lile ɛvolɛ 25 la yɛɛ ɔrayɛle belemgbunli a, na ɔlile tumi ɛvolɛ 16 wɔ Gyɛlusalɛm. Ye mame a le Zeedɔko ara raalɛ Gyɛluhyaa.+ 2 Ɔhɔle zo ɔyɛle mɔɔ le kpalɛ wɔ Gyihova anye zo, kɛ mɔɔ ye papa Yuzaya yɛle ala la,+ noko yemɔ yeanli ɔ ti anwo yeanwolo Gyihova ɛzonlenlɛsua ne anu.+ Noko ɛnee menli ne tɛyɛ ninyɛndane. 3 Ɔdaye a ɔyɛle Gyihova sua ne anwuma lɔ anlenkɛ kpole ne a,+ yɛɛ ɔyɛle gyima dɔɔnwo wɔ Ofɛle+ bane ne anwo. 4 Eza ɔkyekyele azuamgbole+ wɔ Dwuda awoka ne mɔ azo,+ na ɔsisile aranemgbole+ nee tawa+ wɔ ɛleka mɔɔ mbaka dɔɔnwo wɔ la. 5 Ɔ nee Amɔnoma+ belemgbunli ne honle na awieleɛ bɔkɔɔ ne ɔlile bɛ nwo zo konim, yemɔti wɔ zɔhane ɛvolɛ ne anu, Amɔnoma maanle ye dwɛtɛ fufule talɛnte* 100, hwiiti kɔɔ ɛzuzudeɛ* 10,000 yɛɛ baale 10,000. Eza Amɔnoma duale ɛhye maanle ye wɔ ɛvolɛ mɔɔ tɔ zolɛ nwiɔ nee nsa la anu.+ 6 Ɔti Dwotam anwo yɛle se dahuu, ɔluakɛ ɔzieziele ye ndenle nu wɔ Gyihova ye Nyamenle ne anyunlu.

7 Na Dwotam anwo tetedwɛkɛ mɔɔ ɛha la, ye konle mɔɔ ɔhonle nee ye nyɛleɛ kɔsɔɔti, bɛhɛlɛ ye wɔ Yizilayɛ nee Dwuda Arelemgbunli Buluku ne anu.+ 8 Ɔlile ɛvolɛ 25 la yɛɛ ɔrayɛle belemgbunli a, na ɔlile tumi ɛvolɛ 16 wɔ Gyɛlusalɛm.+ 9 Akee bɛmaanle Dwotam nee ye nenyia mɔ hɔlale na ɔliele ɔ menle, na bɛziele ye wɔ Devidi Suakpole+ ne azo. Na ɔ ra Ehaze ralile ye agya lile belemgbunli.+