Edwɛkɛsisilɛ Mɔɔ Tɔ Zo Nwiɔ
19 Akee Dwuda Belemgbunli Gyɛhɔhyafate vale ɔ nwo kɔlɔɔnwo*+ ziale hɔle ye sua nu* wɔ Gyɛlusalɛm. 2 Ɛnyelɛzodeɛnwunlɛnli Haneenae+ ara Gyihu+ vindele hɔyiale Belemgbunli Gyɛhɔhyafate na ɔzele ye kɛ: “Asoo amumuyɛma a ɔwɔ kɛ ɛboa bɛ a,+ yɛɛ menli mɔɔ kpɔ Gyihova la a ɔwɔ kɛ ɛkulo bɛ ɔ?+ Ɔlua ɛhye ati Gyihova ɛya ne wɔ ɛ nwo zo. 3 Noko, bɛnwu ninyɛne mgbalɛ wɔ wɔ nu,+ ɔluakɛ wɔyeye ɛzonlenlɛ mbaka* ne mɔ wɔvi azɛlɛ ne azo yɛɛ wɔziezie wɔ ahonle* kɛ ɛkpondɛ nɔhalɛ Nyamenle ne abo zo.”+
4 Gyɛhɔhyafate hɔle zolɛ dɛnlanle Gyɛlusalɛm, na ɔvindele bieko ɔhɔle menli ne anwo lɔ, ɔvi Biyɛ-hyiba kɔdwu Yifelaem awoka ne mɔ azo,+ kɛ ɔfa bɛ yeazia yeara Gyihova, bɛ nenyia mɔ Nyamenle ne anwo ɛkɛ.+ 5 Eza ɔkpale ndɛnebuavolɛma wɔ azɛlɛ ne amuala azo wɔ Dwuda azuamgbole mɔɔ bɛlie nwolɛ bane la amuala azo, suakpole biala azo ɛdeɛ.+ 6 Na ɔzele ndɛnebuavolɛma ne kɛ: “Bɛnlea mɔɔ bɛlɛyɛ la boɛ, ɔluakɛ bɛmbua ndɛne bɛmmaa sonla emomu Gyihova, na ɔ nee bɛ lua wɔ bɛ ndɛnebualɛ ne anu.+ 7 Na bɛzulo Gyihova.+ Bɛnlea mɔɔ bɛyɛ la boɛ, ɔluakɛ Gyihova yɛ Nyamenle ne ɛnli nzisi,+ ɔnnea sonla nyunlu,+ ɔnlie belaebo.”+
8 Gyɛhɔhyafate kpale Livaema nee ɛsɔfoma yɛɛ Yizilayɛma bie mɔ mɔɔ bɛle mgbanyinli wɔ bɛ papa mɔ sua nu la wɔ Gyɛlusalɛm noko kɛ bɛzonle kɛ Gyihova ndɛnebuavolɛma na bɛli menli mɔɔ de Gyɛlusalɛm la edwɛkɛ.+ 9 Na ɔzele bɛ kɛ: “Ɔwɔ kɛ bɛfa nɔhalɛlilɛ nee ahonle mɔɔ di munli* la bɛyɛ ɛhye wɔ Gyihova ɛzulolɛ nu: 10 Mekɛ biala mɔɔ bɛ mediema mɔɔ dede bɛ azuamgbole ne mɔ azo la kɛva edwɛkɛ mɔɔ fale mogya mɔɔ bɛha bɛgua anwo la kɛra+ anzɛɛ kɛbiza edwɛkɛ mɔɔ fale mɛla, adehilelɛ, ngyehyɛleɛ anzɛɛ ndɛnebualɛ ne mɔ anwo la, ɔwɔ kɛ bɛbɔ bɛ kɔkɔ amaa bɛanli fɔlɛ wɔ Gyihova anyunlu; anrɛɛ ye ɛya ne bara bɛdabɛ nee bɛ mediema ne mɔ anwo zo. Ɛhye a ɔwɔ kɛ bɛyɛ a, amaa bɛanli fɔlɛ. 11 Ɛsɔfo kpanyinli Amalaya mɔɔ nea bɛ nwo zo wɔ Gyihova anwo edwɛkɛ biala anu la a wɔ ɛke la.+ Yehyemɛle ara Zɛbadaya a le Dwuda sua nu amra adekilevolɛ wɔ edwɛkɛ biala mɔɔ fale belemgbunli ne anwo la anwo a. Na Livaema bazonle kɛ bɛ mgbanyima. Bɛmaa bɛ nwo ɛyɛ se na bɛyɛ gyima ne, na Gyihova nee menli mɔɔ yɛ mɔɔ le kpalɛ la ɛlua.”*+