Edwɛkɛsisilɛ Mɔɔ Tɔ Zo Nwiɔ

13 Wɔ Belemgbunli Gyɛlɔbowam ɛvolɛ 18 ne azo, Abaegya rayɛle Dwuda belemgbunli.+ 2 Ɔlile ebia ɛvolɛ nsa wɔ Gyɛlusalɛm. Ye mame a le Gebeyanli+ Yuleɛle ara raalɛ Maekaya.+ Na konle hɔle zo wɔ Abaegya nee Gyɛlɔbowam avinli.+

3 Ɔti Abaegya vale ɛlɔnema 400,000 mɔɔ bɛle katakyiema, kovolɛma mɔɔ bɛtete* bɛ la+ hɔle konle. Na Gyɛlɔbowam vale mrenyia 800,000 mɔɔ bɛtete* bɛ, konle nu katakyiema mɔɔ bɛhyehyɛ bɛ pɛpɛɛpɛ la hɔyiale ye wɔ konle ne anu. 4 Akee Abaegya hɔgyinlanle Zɛmaleeyem Boka ne mɔɔ wɔ Yifelaem awoka ne mɔ azo la azo na ɔhanle kɛ: “O Gyɛlɔbowam nee Yizilayɛma amuala, bɛdie me. 5 Ɔti bɛnze kɛ Gyihova, Yizilayɛ Nyamenle ne luale ngyenle ngyekyeleɛ*+ zo vale Yizilayɛ belemgbunlililɛ ne maanle Devidi nee ɔ mra+ ne mɔ dahuu+ ɔ? 6 Noko Nibate ara Gyɛlɔbowam,+ Devidi ara Sɔlɔmɔn sonvolɛ ne dwazole na ɔdele ɔ menle ne anwo atua.+ 7 Na menli kpamgbavolɛma mɔɔ nvasoɛ ɛnle bɛ nwo zo la hɔle zo boɔboale bɛ nwo hɔlile ɔ nzi. Na bɛ nwo yɛle se dɛlale Sɔlɔmɔn ara Rilihɔbowam wɔ mekɛ mɔɔ ɛnee Rilihɔbowam le kakula na ɔnlɛ akɛnrasesebɛ la, na yeangola bɛ.

8 Na kɛkala bɛdwenle kɛ bɛbahola bɛaho bɛatia Gyihova belemgbunlililɛ ne mɔɔ wɔ Devidi amra ne mɔ asa anu la ɔluakɛ bɛ nwo zonle kpalɛ yɛɛ Gyɛlɔbowam ɛyɛ nvutuke nlankɛ mralɛ ɛmaa bɛ kɛ nyamenle la ati.+ 9 Asoo bɛtɛfoanle Gyihova ɛsɔfoma,+ Aalɔn abozoamra ne mɔ nee Livaema, yɛɛ bɛtɛkpale bɛdabɛ mumua ne bɛ ɛsɔfoma kɛ mɔɔ menli mɔɔ wɔ azɛlɛ mɔɔ ɛha la azo ɛyɛ ye la ɔ?+ Awie biala mɔɔ kɛva ɛnlankɛ nyinli ko nee mboane mralɛ nyinli nsuu kɛra la kola yɛ ɛsɔfo* maa ananze mɔɔ bɛnle nyamenle la. 10 Noko yɛmɛ, Gyihova a le yɛ Nyamenle a,+ yɛɛ yɛtɛkpole ye; yɛ ɛsɔfoma ne, Aalɔn abozoamra ne mɔ ɛlɛsonle Gyihova yɛɛ Livaema ne boa wɔ gyima ne anu. 11 Bɛbɔ ɛyelalɛ afɔle bɛmaa Gyihova nwonlomɔ nee nɔsolɛ biala,+ bɛfa ayilevuanlɛ bɛboka nwolɛ+ na paano ne mɔɔ bɛgua ye ekpunli ekpunli* la+ gua nvutuke tagyee ɛkponle ne azo, yɛɛ bɛsɔ nvutuke kɛnlaneɛbaka ne+ nee ye ahɛnlaneɛ ne mɔ nɔsolɛ biala,+ ɔluakɛ yɛlɛdi mɛla mɔɔ Gyihova yɛ Nyamenle ne ɛva ɛmaa yɛ la azo; noko bɛmɛ bɛkpo ye. 12 Akee bɛnlea! nɔhalɛ Nyamenle ne nee yɛ lua, ɔli yɛ nyunlu, ɔ nee ye ɛsɔfoma ne nee aweɛne ndendenle ne mɔ mɔɔ bɛbɔ bɛkɔ konle la kɛ bɛbɔ bɛagua bɛ nwo zo. O Yizilayɛ mrenyia, bɛmmako bɛtia bɛ nenyia mɔ Nyamenle Gyihova ne, ɔluakɛ ɔnrɛwie bɛ boɛ.”+

13 Noko Gyɛlɔbowam zoanle ɛlɔnema kɛ bɛhɔbu bɛ nzi, amaa mekɛ mɔɔ bɛwɔ Dwudama anyunlu ɛkɛ ne la, ɛnee menli ɛhendeɛ ne mɔ noko wɔ bɛ nzi nehane. 14 Mɔɔ Dwudama dole bɛ nye la, bɛnwunle kɛ ɔwɔ kɛ bɛko konle ne wɔ bɛ nyunlu nee bɛ nzi. Ɔti bɛbɔle ɔ bo bɛzunle bɛvɛlɛle Gyihova+ wɔ mekɛ mɔɔ ɛnee ɛsɔfoma ne ɛlɛbɔ aweɛne ndendenle ne mɔ kpole la. 15 Dwudama deanle konle ɛdeanlɛ, na mɔɔ Dwudama deɛdeanle nu kpole la, nɔhalɛ Nyamenle ne lile Gyɛlɔbowam nee Yizilayɛma amuala anwo zo konim wɔ Abaegya nee Dwudama anyunlu. 16 Yizilayɛma nriandile vile Dwudama anyunlu, na Nyamenle yele bɛ wulale bɛ sa nu. 17 Abaegya nee ye menli ne hunle bɛ nuhua dɔɔnwo kpalɛ, na bɛhunle bɛ menli mɔɔ bɛtete* bɛ la 500,000. 18 Ɛhye ati, bɛbɛlɛle Yizilayɛma aze wɔ zɔhane mekɛ ne, noko Dwudama anwo yɛle se ɔluakɛ bɛvale bɛ nwo bɛdole Gyihova, bɛ nenyia mɔ Nyamenle ne anwo zo.*+ 19 Abaegya hɔle zo voanle Gyɛlɔbowam na ɔliele azuamgbole ɔvile ɔ sa nu, Bɛtɛle+ nee azua mɔɔ zuozua ye,* Gyɛhyena nee azua mɔɔ zuozua ye yɛɛ Yifilean+ nee azua mɔɔ zuozua ye. 20 Na Gyɛlɔbowam annyia ye tumi ne bieko wɔ Abaegya mekɛ zo; akee Gyihova bɔle ye maanle ɔwule.+

21 Noko Abaegya nyianle anwosesebɛ kpole. Nzinlii, ɔgyale mraalɛ 14,+ na ɔwole mralɛ mrenyia 22 yɛɛ mralɛ mraalɛ 16. 22 Na Abaegya anwo tetedwɛkɛ mɔɔ ɛha la, ye nyɛleɛ nee ye edwɛkɛ ne mɔ, bɛhɛlɛ bɛ wɔ ngapezonli Yedo edwɛkɛ* ne anu.+