Edwɛkɛsisilɛ Mɔɔ Tɔ Zo Nwiɔ
10 Rilihɔbowam hɔle Hyikɛm.+ Ɔluakɛ ɛnee Yizilayɛma amuala ɛra Hyikɛm kɛ bɛbazie ye belemgbunli.+ 2 Mɔɔ Nibate ara Gyɛlɔbowam+ dele la (ɛnee ɔtɛbɔ Yigyibiti ɔluakɛ Belemgbunli Sɔlɔmɔn ati ɔnriandile ɔhɔle ɛkɛ),+ Gyɛlɔbowam vile Yigyibiti rale. 3 Na bɛzoanle bɛmaanle bɛhɔvale ye bɛrale, na Gyɛlɔbowam nee Yizilayɛma kɔsɔɔti hɔle Rilihɔbowam ɛkɛ na bɛhanle kɛ: 4 “Wɔ papa maanle yɛ gyɛnvayile ne yɛle ɛlomboɛ.+ Noko saa ɛte gyima ɛsesebɛ mɔɔ wɔ papa vale maanle yɛ la azo na ɛmaa gyɛnvayile ɛlomboɛ* mɔɔ ɔvale ɔdole yɛ kɔme zo la anu yɛ felafela a, yɛbazonle wɔ.”
5 Yemɔti ɔzele bɛ kɛ: “Bɛhɔ na ɔdi kenle nsa a bɛazia bɛara me nwo ɛke.” Ɔti menli ne hɔle.+ 6 Akee Belemgbunli Rilihɔbowam nee mgbanyima mɔɔ zonlenle ye papa Sɔlɔmɔn wɔ mekɛ mɔɔ ɔde aze la zuzule nwolɛ, ɔbizale bɛ kɛ: “Duzu folɛ a bɛbadu me wɔ kɛzi membua menli ɛhye mɔ la anwo ɛ?” 7 Bɛbuale ye kɛ: “Saa ɛyɛ menli ɛhye mɔ boɛ na ɛyɛ mɔɔ bɛ nye die nwolɛ la na ɛmaa bɛ mualɛ kpalɛ a, bɛbayɛ wɔ sonvolɛma dahuu.”
8 Noko ɔkpole folɛ mɔɔ mgbanyima ne mɔ dule ye la, na ɔ nee mgbavolɛ mɔɔ ɔ nee bɛ bɔle nu nyinle na kɛkala bɛle ye sonvolɛma la zuzule nwolɛ.+ 9 Ɔbizale bɛ kɛ: “Duzu folɛ a bɛbadu me wɔ kɛzi ɔwɔ kɛ yɛbua menli ɛhye mɔ mɔɔ ɛha ɛhile me kɛ, ‘Maa wɔ papa gyɛnvayile ne mɔɔ ɔvale ɔdole yɛ kɔme zo la ɛyɛ felafela’ la ɛ?” 10 Mgbavolɛ ne mɔ mɔɔ ɔ nee bɛ bɔle nu nyinle la zele ye kɛ: “Edwɛkɛ ɛhye a ɔwɔ kɛ ɛka ɛkile menli mɔɔ ɛha ɛhile wɔ kɛ, ‘Wɔ papa maanle yɛ gyɛnvayile ne yɛle ɛlomboɛ, noko maa ɔyɛ felafela ɔmaa yɛ’ la a; ka kile bɛ kɛ, ‘Me sa ɛrɛlɛsɛka ekyi ne bayɛ ɛlomboɛ adɛla me papa anze. 11 Me papa vale gyɛnvayile ɛlomboɛ zoale bɛ, noko mame, mebava bie meaboka nwo. Me papa vale nyɛma mɔɔ bɛbɛka la bilale bɛ, noko mame, mebava empele a meabila bɛ a.’”
12 Gyɛlɔbowam nee menli ne amuala rale Rilihɔbowam ɛkɛ wɔ kenle nsa ne azo kɛ mɔɔ belemgbunli ne hanle la, ɔse: “Bɛzia bɛrɛla me nwo ɛke kenle nsa ne azo.”+ 13 Noko belemgbunli ne andendɛ kɛnlɛma angile bɛ. Ɔti Belemgbunli Rilihɔbowam kpole mgbanyima ne mɔ folɛdulɛ ne. 14 Ɔdendɛle ɔhilele bɛ kɛ mɔɔ mgbavolɛ ne mɔ dule ye folɛ la kɛ: “Mebamaa bɛ gyɛnvayile ne ayɛ ɛlomboɛ kpalɛ na meava bie meaboka nwolɛ, me papa vale nyɛma mɔɔ bɛbɛka la bilale bɛ, noko mame, mebava empele a meabila bɛ a.” 15 Ɔti belemgbunli ne andie menli ne, ɔluakɛ nɔhalɛ Nyamenle ne a maanle ɔrale ye zɔ a,+ amaa edwɛkɛ mɔɔ Gyihova luale Hyaelonli Ahaegya anwo zo hanle+ hilele Nibate ara Gyɛlɔbowam la ara nu.
16 Na Yizilayɛma amuala ɛdeɛ, kɛ mɔɔ belemgbunli ne andie bɛ la ati, menli ne buale belemgbunli ne kɛ: “Duzu kyɛfoa a yɛlɛ wɔ Devidi anu a? Yɛnlɛ agyapadeɛ biala wɔ Gyɛsi ara ne anu. O Yizilayɛma, awie biala ɛdoa ye nyamenle ne mɔ! O Devidi, ɛdawɔ nea wɔ sua ne azo.”+ Yemɔti Yizilayɛma ziale hɔle bɛ azua* nu.+
17 Noko Rilihɔbowam hɔle zo lile Yizilayɛma mɔɔ de Dwuda azuamgbole ne mɔ azo la anwo zo belemgbunli.+
18 Akee Belemgbunli Rilihɔbowam zoanle Hadolam+ mɔɔ nea bɛdabɛ mɔɔ bɛye bɛ bɛmaa bɛyɛ akɛlɛ gyima la anwo zo la, noko Yizilayɛma zile ye awolɛ hunle ye. Belemgbunli Rilihɔbowam bɔle mɔdenle vole ye ehwili ne nriandile hɔle Gyɛlusalɛm.+ 19 Na Yizilayɛma ɛde Devidi sua nu amra anwo atua too badwu ɛnɛ.