Edwɛkɛsisilɛ Mɔɔ Limoa

28 Akee Devidi boɔboale mgbanyima ne mɔ amuala anloa wɔ Gyɛlusalɛm: mbusua mgbanyima, ekpunli ekpunli+ mɔɔ sonle belemgbunli ne la anwo zo mgbanyima, mgbanyima mɔɔ nea menli apenle apenle nee ɛya ɛya nwo zo,+ mgbanyima mɔɔ nea belemgbunli ne nee ɔ mra ne mɔ agyapadeɛ kɔsɔɔti yɛɛ bɛ nyɛmoa zo,+ nee suakunlu mgbanyima yɛɛ nrenyia katakyie biala mɔɔ fɛta la.+ 2 Akee belemgbunli ne dwazole gyinlanle ɔ gyakɛ azo na ɔhanle kɛ:

“Me mediema nee me menli, bɛdie me. Ɛnee ɔwɔ me ahonle nu kɛ mesi sua mɔɔ bayɛ Gyihova ngyekyeleɛ ɛlɛka ne ɛnwomenlelielɛ ɛleka nee yɛ Nyamenle ne agyakɛ abo ebia la,+ na memboɔboale me nwo kɛ mesi.+ 3 Noko nɔhalɛ Nyamenle ne zele me kɛ, ‘Tɛ ɛdawɔ a ɛbazi sua wɔamaa me duma ne a,+ ɔluakɛ ɛle sonla mɔɔ kɔ konle yɛɛ wɔha mogya wɔgua.’+ 4 Noko Gyihova, Yizilayɛ Nyamenle ne yele me vile me papa awuke nu kɛ membanyɛ Yizilayɛma belemgbunli dahuu,+ ɔluakɛ ɔkpale Dwuda kɛ adekilevolɛ,+ na wɔ Dwuda sua nu, ɔkpale me papa awuke ne,+ yɛɛ me papa amra ne mɔ anu, medame a ɔliele me ɔdole nuhua na ɔyɛle me belemgbunli wɔ Yizilayɛma amuala anwo zo a.+ 5 Na wɔ me mra ne mɔ amuala anu—ɔluakɛ Gyihova ɛmaa mewo mralɛ dɔɔnwo+—ɔkpale me ra Sɔlɔmɔn+ kɛ ɔdɛnla Gyihova belemgbunli ebia ne azo ɔnlea Yizilayɛma anwo zo.+

6 “Ɔzele me kɛ, ‘Ɛ ra Sɔlɔmɔn a bazi me sua ne nee me alienwo ɛkɛ ne mɔ a, ɔluakɛ mekpa ye kɛ me ra nrenyia na mebayɛ ye papa.+ 7 Saa ɔsi pi ɔdi me mɛla ne mɔ nee me ndɛnebualɛ ne mɔ azo+ kɛ mɔɔ ɔlɛyɛ ye kɛkala la a, mebava ye belemgbunlililɛ ne meazie ɛkɛ ne kpundii dahuu.’+ 8 Ɔti meka ye wɔ Yizilayɛma amuala, Gyihova asafo ne anye zo ɛke nee yɛ Nyamenle ne anyunlu kɛ: Bɛkpondɛ Gyihova yɛ Nyamenle ne mɛla ne mɔ amuala kpalɛ na bɛli zo pɛpɛɛpɛ, amaa bɛava azɛlɛ kpalɛ ne+ bɛayɛ bɛ ɛdeɛ na bɛava bɛagyakyi bɛ mra mɔɔ bɛbavi bɛ nzi bɛara la kɛ bɛ agyapadeɛ dahuu.

9 Na wɔmɔ me ra Sɔlɔmɔn, nwu wɔ papa Nyamenle ne na fa ahonle mɔɔ di munli*+ nee ɛkɛla* mɔɔ lɛ anyelielɛ* la sonle ye, ɔluakɛ Gyihova neɛnlea ahonle kɔsɔɔti anu,+ na ɔnwu adwenle nu nzuzulɛ biala.+ Saa ɛkpondɛ ye a, ɔbamaa wɔanwu ye,+ noko saa ɛkpo ye a, ɔbakpo wɔ dahuu.+ 10 Noko nea, Gyihova ɛkpa wɔ kɛ ɛzi sua ɛmaa ɔyɛ ɛzonlenlɛsua. Nyia akɛnrasesebɛ na kɔyɛ gyima ne.”

11 Akee Devidi vale kɛzi bɛbazi abenlana ne la nee ye azua ne mɔ, ye ninyɛnezielɛ ɛleka ne mɔ, ye ɛbolɔnsam ekpumgbunli ne mɔ, ɔ kunlu ekpumgbunli ne mɔ yɛɛ mgbɔdalɛ ɛlɛka ne ati sua* ne anwo ngyehyɛleɛ ne maanle ɔ ra Sɔlɔmɔn.+ 12 Ɔvale suazilɛ ne anwo ngyehyɛleɛ ne ɔmaanle ye, debie biala mɔɔ sunsum ne maanle ɔnwunle ye mɔɔ fale Gyihova sua ne alienwo ne mɔ,+ aleɛlilɛ azua mɔɔ wɔ nwolɛ la amuala, nɔhalɛ Nyamenle ne sua nu ɛkɛ ne ninyɛnezielɛ ɛleka ne mɔ yɛɛ ninyɛne mɔɔ bɛyɛ bɛ nwuanzanwuanza* la ninyɛnezielɛ ɛleka ne mɔ anwo la;+ 13 nee kɛzi bɛbahyehyɛ ɛsɔfoma ne+ nee Livaema ne anu ekpunli ekpunli bɛamaa Gyihova sua ne anu gyima ne amuala nee ahyɛnze mɔɔ bɛbava bɛayɛ gyima wɔ Gyihova sua ne anu la amuala; 14 nee nvutuke dodo, nvutuke mɔɔ bɛbava bɛayɛ ahyɛnze kɔsɔɔti mɔɔ bɛbava bɛayɛ gyima ngakyile ne mɔ la, dwɛtɛ fufule ahyɛnze ne mɔ amuala ɛdeɛ ne dodo, yɛɛ ahyɛnze kɔsɔɔti mɔɔ bɛbava bɛayɛ gyima ngakyile ne mɔ la; 15 nee dodo mɔɔ bɛbava bɛayɛ nvutuke ahɛnlaneɛ mbaka+ ne nee bɛ nvutuke ahɛnlaneɛ ne mɔ, dodo mɔɔ bɛbava bɛayɛ ahɛnlaneɛ mbaka ngakyile ne mɔ nee bɛ ahɛnlaneɛ ne mɔ yɛɛ dwɛtɛ fufule dodo mɔɔ bɛbava bɛayɛ bɛ ahɛnlaneɛ mbaka ne mɔ la, kɛnlaneɛbaka ko biala nee ye ahɛnlaneɛ ne mɔ, kɛzi bɛbava ko biala bɛali gyima la; 16 nee nvutuke dodo mɔɔ bɛbava bɛayɛ ɛkponle ne mɔ mɔɔ bɛbava paano ne mɔɔ bɛbagua ye ekpunli ekpunli* bɛagua zolɛ la,+ ko biala ɛdeɛ, yɛɛ dwɛtɛ fufule dodo mɔɔ bɛbava bɛayɛ dwɛtɛ fufule ɛkponle ne mɔ la, 17 nee dodo mɔɔ bɛbava bɛayɛ faka ne mɔ, ahyɛnze ngyikyi ne mɔ, nvutuke tagyee mbuakɛ ne mɔ, nee dodo mɔɔ bɛbava bɛayɛ nvutuke ahyɛnze ngyikyi ne mɔ,+ kyɛnze ekyi ko biala yɛɛ dodo mɔɔ bɛbava bɛayɛ dwɛtɛ fufule kyɛnze ngyikyi ne mɔ la, kyɛnze ekyi ko biala ɛdeɛ. 18 Eza ɔhilele nvutuke mɔɔ bɛdu nu la dodo mɔɔ bɛbava bɛayɛ ayilevuanlɛ afɔlemokyea+ ne nee ehwili ne sɔhovolɛ ne,+ mɔɔ yemɔ a le nvutuke kyɛlɔbe+ ne mɔ mɔɔ bɛdɛlɛdɛlɛ bɛ ndɛba anu bɛheda Gyihova ngyekyeleɛ ɛlɛka ne azo la. 19 Devidi hanle kɛ: “Ɛnee Gyihova asa wɔ me nwo zo, na ɔmaanle me nwunu ɔmaanle mengɛlɛle suazilɛ ne anwo ngyehyɛleɛ+ ne amuala wɔ kɛlata zo.”+

20 Akee Devidi zele ɔ ra Sɔlɔmɔn kɛ: “Nyia akɛnrasesebɛ na maa ɛ nwo ɛyɛ se na kɔyɛ gyima ne. Mmasulo yɛɛ mmamaa wɔ ahonle tu, ɔluakɛ Gyihova Nyamenle, me Nyamenle ne nee wɔ lua.+ Ɔnrɛgyakyi wɔ yɛɛ ɔnrɛkpo wɔ,+ emomu ɔ nee wɔ balua kɔkpula kɛ bɛkɛwie Gyihova sua ne anwo gyima ne amuala. 21 Na ɛsɔfoma+ nee Livaema+ mɔɔ bɛhyehyɛ bɛ nu ekpunli ekpunli bɛmaa nɔhalɛ Nyamenle ne sua ne anu gyima ne amuala la ɛne. Ɛlɛ gyimayɛvoma mɔɔ bɛlɛ ɛhulolɛ ne yɛɛ bɛbe wɔ gyima biala ɛyɛlɛ nu la,+ nee mgbanyima+ yɛɛ menli kɔsɔɔti mɔɔ bɛbali wɔ adehilelɛ zo la.”