Edwɛkɛsisilɛ Mɔɔ Limoa

23 Mɔɔ Devidi yɛle ɛrelera na ye ngoane mekɛ ɛlɛkɔ awieleɛ* la, ɔziele ɔ ra Sɔlɔmɔn belemgbunli wɔ Yizilayɛma anwo zo.+ 2 Akee ɔboɔboale Yizilayɛ mgbanyima, ɛsɔfoma+ nee Livaema ne+ mɔ amuala anloa. 3 Bɛdianle Livaema mɔɔ ɛli ɛvolɛ 30 mɔɔ kɔ la;+ menli mɔɔ bɛdianle bɛ ngoko ngoko la dodo le 38,000. 4 Menli ɛhye mɔ anu 24,000 nleanle Gyihova sua ne anwo gyima ne azo, yɛɛ 6,000 yɛle mgbanyima nee ndɛnebuavolɛma,+ 5 na 4,000 zinzale nlenkɛ mgbole ne mɔ+ yɛɛ 4,000 vale edwɛnebɔlɛ ninyɛne mɔɔ Devidi hanle kɛ, “Menyɛle kɛ bɛva bɛye ayɛlɛ” la yele Gyihova ayɛlɛ.+

6 Akee Devidi hyehyɛle bɛ* ekpunli ekpunli+ kɛ mɔɔ Livae amra ne mɔ de la: Gɛhyɔn, Kohate yɛɛ Mɛlɛlae.+ 7 Gɛhyɔnoma ne a le Leedan nee Hyemɛyae. 8 Leedan amra ne mɔ anu, Gyɛhayɛle a li bɛ ti a, Zitam yɛɛ Dwowɛle,+ bɛle nsa. 9 Hyemɛyae amra a le Hyilomɔto, Heeziyɛle yɛɛ Hɛlan, bɛle nsa. Ɛhye mɔ le mbusua mgbanyima wɔ Leedan abusua ne anu. 10 Na Hyemɛyae amra a le Gyeehate, Zaena, Gyiyɛhye yɛɛ Belaya. Menli nna ɛhye mɔ le Hyemɛyae amra. 11 Gyeehate a li bɛ ti a yɛɛ Zaezaa tɔ zolɛ nwiɔ. Noko kɛmɔ Gyiyɛhye nee Belaya anwo mralɛ mrenyia dɔɔnwo la ati, bɛdianle bɛ bɛbɔle nu kɛ abusua ko na bɛmaanle bɛ gyima ko.

12 Kohate amra a le Amelam, Yezehaa,+ Hibulɔn yɛɛ Ɛzeɛle,+ bɛle nna. 13 Amelam amra a le Aalɔn+ nee Mosisi.+ Noko bɛyele Aalɔn bɛziele ahane+ kɛ ɔde Nwuanzanwuanza Nu Nwuanzaanwu Ɛleka* ne anwo dahuu, ɔ nee ɔ mra ne mɔ, kɛ bɛbɔ afɔle wɔ Gyihova anyunlu, bɛzonle ye, na bɛyila menli wɔ ye duma nu dahuu.+ 14 Na nɔhalɛ Nyamenle sonla Mosisi ɛdeɛ, bɛdianle ɔ mra ne mɔ bɛbokale Livae abusua ne anwo. 15 Mosisi amra a le Gɛhyɔm+ nee Ɛleyizɛ.+ 16 Gɛhyɔm amra ne mɔ anu, Hyɛbuwɛle+ a li bɛ ti a. 17 Ɛleyizɛ abozoamra* anu, Rilihabaya+ a li bɛ ti a; Ɛleyizɛ anwo ralɛ nrenyia bieko, noko ɛnee Rilihabaya amra mrenyia ne mɔ zonle kpalɛ. 18 Yezehaa+ amra ne mɔ anu, Hyɛlomete+ a li bɛ ti a. 19 Hibulɔn amra ne mɔ anu, Gyilaya a li bɛ ti a, Amalaya tɔ zolɛ nwiɔ, Gyeheezayɛle tɔ zolɛ nsa yɛɛ Gyɛkamiyam+ tɔ zolɛ nna. 20 Ɛzeɛle amra ne mɔ+ anu, Maeka a li bɛ ti a yɛɛ Yehyaya tɔ zolɛ nwiɔ.

21 Mɛlɛlae amra a le Maalae nee Muhyae.+ Maalae amra a le Ɛlieza nee Kehye. 22 Ɛlieza wule, noko yeanwo mralɛ mrenyia, mraalɛ ala a ɔwole a. Ɔti Kehye amra ne mɔ mɔɔ le bɛ mbusuafoɔ* la gyale bɛ. 23 Muhyae amra a le Maalae, Yidaa yɛɛ Gyɛlemɔto, bɛle nsa.

24 Ɛhye mɔ a le Livae amra ne mɔ kɛ mɔɔ bɛ mbusua ne mɔ de la a, mbusua mgbanyinli, bɛdabɛ mɔɔ bɛhɛlɛle bɛ aluma, bɛdianle bɛ na bɛbobɔle bɛ aluma na bɛyɛle Gyihova sua ne anwo gyima ne bie, mɔɔ bɛli ɛvolɛ 20 mɔɔ kɔ la. 25 Ɔluakɛ Devidi hanle kɛ: “Gyihova, Yizilayɛ Nyamenle ne ɛmaa ye menli ɛnyia ɛnwomenlelielɛ,+ na ɔbadɛnla Gyɛlusalɛm dahuu.+ 26 Eza ɔngyia kɛ Livaema soa ɛdanlɛsua ne anzɛɛ nwolɛ ninyɛne ne mɔ mɔɔ bɛfa bɛyɛ gyima wɔ ɛkɛ ne la anu biala bie.”+ 27 Ɔluakɛ, kɛ mɔɔ Devidi hanle ye wɔ ye adehilelɛ ne mɔ mɔɔ li awieleɛ anu la, bɛdianle Livaema mɔɔ ɛli ɛvolɛ 20 mɔɔ kɔ la. 28 Bɛ gyima a le kɛ bɛboa Aalɔn amra ne mɔ+ wɔ Gyihova sua nu gyimayɛlɛ nu, bɛanlea alienwo ɛkɛ,+ aleɛlilɛ azua ne mɔ, debie nwuanzanwuanza biala mɔɔ bɛte nwolɛ la yɛɛ gyima biala mɔɔ ɔhyia kɛ bɛyɛ ye wɔ nɔhalɛ Nyamenle ne sua nu ɛkɛ ne la azo. 29 Bɛboale wɔ paano ne mɔɔ bɛgua ye ekpunli ekpunli,*+ esamo motoo ne mɔɔ bɛfa bɛbɔ ma afɔle, paano ndɛbandɛba mɔɔ mgbɔvonle ɛnle nu,+ kyɛnze tɛtɛlɛ nu keeki yɛɛ esamo mɔɔ bɛfɔtɔ+ la anu, eza bɛnleanle ninyɛne mgbole nee ngyikyi mɔɔ bɛfa bɛsuzu debie la amuala azo. 30 Ɛnee ɔwɔ kɛ bɛgyinla ɛkɛ nwonlomɔ biala+ bɛyɛ Gyihova mo na bɛye ye ayɛlɛ na bɛyɛ ye zɔhane ala wɔ nɔsolɛ nu noko.+ 31 Bɛboale mekɛ biala mɔɔ bɛlɛbɔ ɛyelalɛ afɔle bɛamaa Gyihova wɔ Ɛnwomenlelielɛ kenle,+ siane fofolɛ+ yɛɛ ɛvoyialilɛ mekɛ nu+ la, dodo biala mɔɔ nwolɛ mɛla ne kile la, bɛyɛle ɛhye dahuu wɔ Gyihova anyunlu. 32 Eza bɛyɛle gyima mɔɔ bɛlɛ ye wɔ nyianu ɛdanlɛsua ne anu nee ɛleka nwuanzanwuanza ne la, yɛɛ bɛboale bɛ mediema Aalɔn amra ne mɔ wɔ Gyihova sua nu ɛkɛ ne gyima ne anu.