Edwɛkɛsisilɛ Mɔɔ Limoa
20 Wɔ ɛvolɛ ne mɔlebɛbo,* mekɛ mɔɔ arelemgbunli ne mɔ kɔ konle la, Dwowabe+ lile sogyama ekpunli ne anyunlu hɔle konle na bɛzɛkyele Amɔnoma azɛlɛ ne; ɔhɔle na ɔbɛngale Relaba+ ɔyiale, noko Devidi dɛnlanle Gyɛlusalɛm.+ Dwowabe tetale Relaba na ɔbubule ye ɔguale aze.+ 2 Akee Devidi dule Malekam abotile ne vile ɔ ti, na ɔnwunle kɛ ye ɛlomboɛ le nvutuke talɛnte* ko, na ɛnee awolɛ mɔɔ sonle bolɛ la wɔ nu; na bɛvale bɛzoale Devidi. Eza ɔsesale ninyɛne dɔɔnwo ɔvile suakpole ne azo ɔhɔle.+ 3 Na ɔvale menli mɔɔ wɔ zolɛ la ɔrale yɛɛ ɔmaanle bɛvale sɛlada bɛkpukekpukɛle awolɛ na bɛvale bulalɛ mɔɔ anloa yɛ nla la nee akuma bɛyɛle gyima.+ Ɛhye a Devidi yɛle ye wɔ Amɔnoma azuamgbole kɔsɔɔti azo a. Akee Devidi nee ye sogyama ne amuala ziale rale Gyɛlusalɛm.
4 Ɛhye anzi, bɛ nee Filisitiama honle wɔ Gizɛ. Mekɛ zɔhane, Huhyanli Sebɛkae+ hunle Sepae mɔɔ le Relɛfeeyem+ abozoamra ne mɔ bie la, na bɛlile bɛ nwo zo konim.
5 Na bɛ nee Filisitiama nyianle konle bieko, na Gyeeyɛ ara Ɛleheenan bɔle Gatenli Golayate+ adiema Laamae hunle ye, ɛnee ye atwɛ baka ne le kɛ ndanlɛnwolɛma mgbunla la.+
6 Konle bieko zile wɔ Gate,+ ɛnee nrenyia kakanyinli+ bie wɔ ɛkɛ, ɔ sa ko biala mrɛlɛsɛka le 6 yɛɛ ɔ gyakɛ ko biala mrɛlɛsɛka le 6, ɔ muala le 24; na ɛnee ɔdaye noko ɔle Relɛfeeyem abozoamra ne mɔ bie.+ 7 Ɔhɔle zo ɔgolole Yizilayɛma anwo.+ Yemɔti Devidi adiema Hyemea+ ara Dwɔnatan bɔle ye hunle ye.
8 Ɛhye mɔ le Relɛfeeyem+ mɔɔ wɔ Gate+ la abozoamra, na Devidi nee ye azonvolɛ ne mɔ hunle bɛ.