Edwɛkɛsisilɛ Mɔɔ Limoa
18 Nzinlii, Devidi lile Filisitiama anwo zo konim na ɔhanle bɛ aze na ɔliele Gate+ nee azua mɔɔ zuozua ye* la ɔvile Filisitiama asa anu.+ 2 Akee ɔlile Mowabe+ anwo zo konim na Mowabema rayɛle Devidi sonvolɛma na bɛduale adwule.+
3 Devidi lile Zoba+ Belemgbunli Hadadizɛ+ anwo zo konim wɔ Heemate+ anwo ɛkɛ wɔ mekɛ mɔɔ ɛnee Hadadizɛ lua adenle zo ɛlɛkɔ Azule Yufileti ne anloa+ nehane yeahɔhile kɛ ɔlɛ tumi la. 4 Devidi hyele ye ehwili 1,000, ye mgbɔnwɔkavoma 7,000 yɛɛ sogyama mɔɔ dua aze la 20,000.+ Akee Devidi bubule ye mgbɔnwɔ mɔɔ twe ehwili la amuala agyakɛ maanle ɔhale 100 ala.+ 5 Mekɛ mɔɔ Seleama mɔɔ wɔ Damasekɛse la rale kɛ bɛbaboa Zoba Belemgbunli Hadadizɛ la, Devidi hunle Seleama ne anu 22,000.+ 6 Akee Devidi yɛle sogyama azokoɛleɛ dɔɔnwo wɔ Damasekɛse mɔɔ wɔ Selea la, na Seleama rayɛle Devidi sonvolɛma na bɛduale adwule. Gyihova maanle Devidi lile konim* wɔ ɛleka biala mɔɔ ɔhɔle la.+ 7 Eza Devidi liele nvutuke enyinlike ne mɔ vile Hadadizɛ azonvolɛ ne mɔ ɛkɛ na ɔ nee bɛ rale Gyɛlusalɛm. 8 Devidi vale kɔbele dɔɔnwo kpalɛ vile Hadadizɛ azuamgbole Tebate nee Kɛn azo. Ɛhye a Sɔlɔmɔn vale yɛle kɔbele Angola Kpole* ne,+ mpila ne mɔ yɛɛ kɔbele ahyɛnze ne mɔ+ a.
9 Mɔɔ Heemate Belemgbunli Towu dele kɛ Devidi ɛli Zoba+ Belemgbunli Hadadizɛ+ ɛlɔnema ne mɔ amuala anwo zo konim la, 10 ɛkɛ ne ala ɔzoanle ɔ ra Hadolam wɔ Belemgbunli Devidi ɛkɛ kɛ ɔhɔbiza kɛzi ɔ nwo de la na ɔyɛ ye mo kɛ ɔ nee Hadadizɛ ɛho na yeli ɔ nwo zo konim la (ɔluakɛ ɛnee Hadadizɛ ta nee Towu ko), na ɔvale nvutuke, dwɛtɛ fufule nee kɔbele ninyɛne ngakyile dɔɔnwo ɔhɔle. 11 Belemgbunli Devidi dele ninyɛne ɛhye mɔ anwo maanle Gyihova,+ na ɔvale dwɛtɛ fufule nee nvutuke ne mɔ mɔɔ ɔ nee bɛ vi maanle maanle ne mɔ kɔsɔɔti anu ɔrale la ɔbokale nwolɛ: mɔɔ ɔ nee bɛ vi Yidɔm nee Mowabe nee mɔɔ ɔliele ɔvile Amɔnoma,+ Filisitiama+ yɛɛ Amalɛkema+ ɛkɛ la.
12 Zɛluaya+ ara Abehyae+ hunle Yidɔmma 18,000 wɔ Ngyenle Bɔnza ne+ anu. 13 Ɔyɛle sogyama azokoɛleɛ dɔɔnwo wɔ Yidɔm na Yidɔmma amuala rayɛle Devidi sonvolɛma.+ Gyihova maanle Devidi lile konim* wɔ ɛleka biala mɔɔ ɔhɔle la.+ 14 Devidi hɔle zo lile belemgbunli wɔ Yizilayɛ amuala,+ na ɔbuale ndɛne wɔ pɛlepɛlelilɛ nee tenleneyɛlɛ nu ɔmaanle ye menli ne amuala.+ 15 Ɛnee Zɛluaya ara Dwowabe a nea ɛlɔne ne anwo zo a,+ yɛɛ Ahaelɛde ara Gyɛhɔhyafate+ a le kɛlɛvolɛ a, 16 ɛnee Ahaetɛbe ara Zeedɔko nee Abayata ara Ahemɛlɛke le ɛsɔfoma yɛɛ Hyavehya le kɛlɛhɛlɛvolɛ. 17 Ɛnee Gyɛhɔyada ara Bɛnaya nea Kɛlɛtema+ nee Pɛlɛtema+ anwo zo. Na ɛnee Devidi amra ne mɔ lɛ dibilɛ kpole kpalɛ mɔɔ saa belemgbunli ne ɛnle ɛkɛ a bɛdabɛ a bɛwɔ ɛkɛ a.