Edwɛkɛsisilɛ Mɔɔ Limoa

14 Taya Belemgbunli Haelam+ zoanle menli wɔ Devidi ɛkɛ, na bɛvale sida mbaka, menli mɔɔ fa awolɛ si sua* yɛɛ kapentama bɛhɔle kɛ bɛkazi sua* bɛamaa ye.+ 2 Na Devidi nwunle kɛ Gyihova ɛzie ye belemgbunli bɔkɔɔ wɔ Yizilayɛ,+ ɔluakɛ Ye menli Yizilayɛma ati bɛkpogya ye belemgbunlililɛ ne zo.+

3 Devidi gyale mraalɛ dɔɔnwo+ wɔ Gyɛlusalɛm, na Devidi wole mralɛ mrenyia nee mralɛ mraalɛ dɔɔnwo.+ 4 Mralɛ mɔɔ ɔwole bɛ wɔ Gyɛlusalɛm la aluma ɛne:+ Hyamua, Hyobabe, Neetan,+ Sɔlɔmɔn,+ 5 Yebehaa, Yelaehyua, Ɛlepɛlɛte, 6 Noga, Nifɛge, Gyafaya, 7 Ɛlehyama, Bilayada yɛɛ Ɛlefɛlɛte.

8 Mɔɔ Filisitiama dele kɛ bɛkpokpa Devidi kɛ ɔli Yizilayɛma amuala anwo zo belemgbunli la,+ Filisitiama ne mɔ kɔsɔɔti rakpondɛle Devidi.+ Mɔɔ Devidi dele nwolɛ bie la, ɔhɔle bɛ nwo zo. 9 Akee Filisitiama ravenle ninyɛne wɔ Relɛfeeyem Bɔnza* ne anu.+ 10 Devidi bizale Nyamenle kɛ: “Mengɔ Filisitiama ne anwo zo ɔ? Ɛbava bɛ wɔawula me sa nu ɔ?” Na Gyihova zele ye kɛ: “Kɔ na mebava bɛ meawula ɛ sa nu.”+ 11 Ɔti Devidi hɔle Beeyale-pɛleezem,+ na ɔhuhunle bɛ wɔ ɛkɛ. Na Devidi hanle kɛ: “Nɔhalɛ Nyamenle ne ɛlua me sa zo ɛli me agbɔvolɛ nwo zo konim kɛ azule mɔɔ yi sɛkye debie la.” Ɛhye ati a bɛvɛlɛle ɛkɛ ne Beeyale-pɛleezem la. 12 Filisitiama ne gyakyile bɛ nyamenle ne mɔ wɔ ɛkɛ, na Devidi maanle bɛvale senle bɛyelale bɛ.+

13 Nzinlii Filisitiama ne hɔvenle ninyɛne wɔ bɔnza* ne anu bieko.+ 14 Devidi bizale Nyamenle bieko, noko nɔhalɛ Nyamenle ne zele ye kɛ: “Mmakɔyia bɛ. Emomu, bu bɛ nzi na kɔ bɛ nwo zo wɔ beeka mbaka ne mɔ anyunlu.+ 15 Na saa ɛte bɛ gyakɛ abo dede ne kɛ asɛɛ menli lua beeka mbaka ne mɔ azo a, kɔteta bɛ, ɔluakɛ nɔhalɛ Nyamenle ne ɛlimoa ɛ nyunlu kɛ ɔkahuhu Filisitia ɛlɔnema ne.”+ 16 Ɔti Devidi yɛle mɔɔ nɔhalɛ Nyamenle ne hanle hilele ye la,+ na bɛhuhunle Filisitia ɛlɔnema ne bɛvile Gebɛyɔn bɛhɔdwule Gizɛ.+ 17 Na bɛdele Devidi nganeɛ wɔ azɛlɛ ne amuala azo, na Gyihova maanle Devidi anwo ɛzulolɛ dɔle maanle maanle ne mɔ kɔsɔɔti anwo zo.+