Tukazoora ‘Eruuru ey’Obuguzi Bwingi’

Winston, tugambire oku waatandikire kusherura Ruhanga.

Nkakurira omu ka etarikukunda diini aha faamu eyehereire omuri Queensland, Australia. Abw’okugira ngu tukaba twehereire, nkaba ntarikuhurizana n’abanyabuzaare abandi. Aha myaka nka 12, nkatandika kusherura Ruhanga. Nkamushaba kumpwera kumanya amazima agarikumukwataho. Bwanyima nkaruga omu faamu naaza kukora omuri Adelaide, omuri Australia. Aha myaka 21, nkabugana Pam obu naabaire ndi omu kahuumuro omuri Sydney, yaangambira aha kibiina ky’ediini ekirikugira ngu abantu b’omuri Bungyereza bakakomooka omu ruganda rw’Abaisraeli abaabuzire. Nibagira ngu nibo b’enganda za Israeli ikumi ez’obukiizi-bwa-bumosho abaagiire omu buzaahe, omu kyasha kya munaana Y.A. Ku naagarukire Adelaide, nkagaaniira n’ou naabaire ninkora nawe aha nshonga egyo ou Abajurizi ba Yehova baabaire batandikire kwegyesa Baibuli. Bwanyima y’okugaaniira nawe eshaaha nkye, na munonga aha nyikiriza z’Abajurizi ba Yehova, nketegyereza ngu okushaba kwangye okw’omu buto kuriyo nikugarukwamu. Nkaba niinyega ebirikukwata aha Muhangi wangye n’aha Bukama bwe! Kandi obwo nibwo naabona ‘eruuru ey’obuguzi bwingi.’​—Mat. 13:45, 46.

Pam, naiwe okatandika kusherura eruuru egi okiri muto. Okagitunga ota?

Nkakurira omu ka erikukunda ediini omu tauni ya Coffs Harbour, New South Wales. Abazaire bangye, n’abazaire ba maawe bakaba nibaikiriza enyegyesa erikugira ngu Abangyereza bakakomooka omu Baisraeli. Nyowe na murumuna wangye omuto, munyaanyazi omukuru, n’abaana ba maarimi n’aba maawento, tukeegyesibwa kuruga omu buto ngu Ruhanga naashagika Abangyereza. Kwonka nkaguma nimbangaanisa kandi naaguma nyine enjara ey’eby’omwoyo. Obu naabaire nyine emyaka 14, nkataayaayira amakanisa maingi ag’omu kicweka kyaitu otwariiremu Anglican, Baptist, n’ey’Abacwanga. Kwonka nkaguma nyine enjara y’eby’omwoyo.

Bwanyima eka yaitu ekafurukira omuri Sydney, ahu naabugaine Winston ari omu kihuumuro. Nk’oku yaabagambira, ahabw’okugaaniira kwaitu aha by’ediini akahendera atandikire kwegyesibwa Baibuli Abajurizi ba Yehova. Bwanyima y’ekyo, akatandika kumpandiikira amabaruha agarimu ebyahandiikirwe bingi! Buzima, nkabanza kwerarikirira kandi naaguubwa kubi. Kwonka mporampora nketegyereza ngu aga nigo mazima.

Omuri 1962, nkafurukira Adelaide kuba haihi na Winston. Akantebeekanisiza kutuura na Thomas n’omukazi we Janice Sloman Abajurizi ba Yehova, kandi abaabaireho abamiisani omuri Papua New Guinea. Nkaba nyine emyaka 18 obwire obwo, kandi bakanfaho munonga omu by’omwoyo. N’ahabw’ekyo naanye nkatandika kwega Ekigambo kya Ruhanga, kandi juba naahamya ngu naabona amazima. Bwanyima ya Winston naanye kutaaha omu bushwere, tukaza omu buheereza burungi, obutuhwereire kwongyera kusiima eruuru y’omuhendo ei twazoire, n’obu turaabe twabaire nitugyezibwa.

Winston, tugambire ebirikukwata aha buheereza bwawe bw’okubanza.

Ahonaaho tuheerize kutaaha omu bushwere, Yehova akatandika kutwigurira ‘enyigi mpango’ z’okwongyera aha buheereza. (1 Kor. 16:9) Ow’eishe-emwe Jack Porter owaabaire ari omureeberezi waitu orikutaayaayira ebibiina akatworeka orwigi rw’okubanza. (Hati nawe ari aha kakiiko k’eitaagi aka Australasia.) Jack n’omukazi we Roslyn, bakatuhiga kuba baapayoniya ab’obutwire, kandi tukamara emyaka etaano turi baapayoniya. Obu naabaire nyine emyaka 29, nyowe na Pam tukashabwa kutandika kutaayaayira ebibiina omu bizinga bya South Pacific, ebicweka ebyatandikirwe kureebererwa ofiisi y’eitaagi eya Fiji. Ebizinga ebyo bikaba nibitwariramu American Samoa, Samoa, Kiribati, Nauru, Niue, Tokelau, Tonga, Tuvalu, na Vanuatu.

Omu bwire obwo, abantu b’omu bizinga ebyabaire byehereire bakaba nibeerarikirira Abajurizi ba Yehova, n’ahabw’ekyo tukaba twine kuba abanyabwengye kandi abeegyendesereza. (Mat. 10:16) Ebibiina bikaba biine ab’eishe-emwe bakye kandi obumwe tukaba tutatunga buraaro. N’ahabw’ekyo tukaba tushaba abatuuzi kuturaaza, kandi kaingi bakaba batuhwera.

Winston, nookunda munonga omurimo gw’okuvunuura. Niki ekyakureeteire kugukunda?

Omu bwire obwo, ab’eishe-emwe b’aha kirwa kya Tonga bakaba baine turakiti n’ebitabo bikye omu rurimi rwabo. Ab’eishe-emwe bakaba nibakoresa akatabo The Truth That Leads to Eternal Life ak’Orungyereza kwegyesa abantu. N’ahabw’ekyo omu ishomero ry’abareeberezi ery’esaabiiti ina, abareeberezi bashatu ab’omu kicweka ekyo abaabaire nibamanya Orungyereza rukye bakaikiriza kuhwera omu kuvunuura akatabo Truth omu Rutonga. Pam akahandiika ebi baavunwire reero twabyohereza United States kuteerwa. Kikatwara esaabiiti nka munaana okuheza omurimo ogu. N’obu ebi twavunwire byabaire bitari birungi munonga, akatabo kakahwera baingi abarikugamba Orutonga kwega amazima. Nyowe na Pam tituri baavunuuzi, kwonka eky’okureeberaho ekyo kikongyera kutukundisa omurimo ogu.

Pam, embeera aha bizinga zikaba ziri zita waagyeragyeranisa n’ez’omuri Australia?

Zikaba nizitaanira kimwe! Emyanya emwe ekaba erimu ensiri nyingi, omushana mwingi, empiita, embeba, okurwara, kandi obumwe n’eby’okurya bikye. Kwonka aha rubaju orundi, buri izooba, tukaba nitushemererwa kuhuumuraho turikureeba enyanja turi omu kaju akashakaize ebinyaatsi kwonka kataine bisiika. Reero nyekiro okwezi kwaba nikwaka, emikindo ekaba neehwezika gye kandi okwezi kurikureeberwa omu nyanja. Ebintu nk’ebyo bikaba nibitureetera kuta omutima aha bintu birungi omu mwanya gw’okuguta aha bibi.

Tukaba nitukunda abaana, abaabaire nibazaana naitwe kandi barikwenda kumanya bingi baareeba abarikwera kuruga omu ihanga erindi. Ku twabaire tutaayaayire Niue, omwojo muto akakwata aha mukono gwa Winston reero yaagira ati: “Naakunda amooya gaawe.” Buzima akaba atakareebahoga omuntu oine ebyoya aha mukono, kandi akaba atarikumanya oku araabyete!

Kikaba nikitureetera obusaasi bwingi kureeba embeera y’obworo ei abantu barimu. Bakaba beetooroirwe emyanya mirungi kwonka bataine bujanjabi burikumara n’amaizi marungi. Kwonka ab’eishe-emwe, bakaba baterarikiriire. Embeera ei baabaire barimu bakaba bagimanyiriire. Bakaba nibashemererwa kuba hamwe n’ab’omu maka gaabo, kugira omwanya gw’okugiriramu enteerane, n’okugira omugisha gw’okuhimbisa Yehova. Eky’okureeberaho kyabo kikatuhwera kwebembeza ebintu ebikuru n’okworobya embeera zaitu.

Pam, obumwe, okaba oine kutaha amaizi n’okuteeka eby’okurya omu mbeera ezi waabaire otamanyiriire. Ekyo okakibaasa ota?

Ninsiima tata owantendekire gye. Akanyegyesa kukora ebintu bingi, nk’okuteekyesa enku n’okumarwa n’ebintu bikye. Ku twabaire tutaayaayire aha kirwa kya Kiribati, tukaraara omu kaju kakye ak’ebinyaatsi, katandaarize n’amabaare, kandi kaine ebisiika by’emigano. Okubaasa kuteeka, nkatimba ekiina ahansi omu nju naakora amahega, reero nkaba nkoresa ebishushunga bya kokonaati nk’enku. Okutaha amaizi, nkaba nteera orunyiriri ah’iziba n’abakazi abandi. Bakaba bakoresa ekiti kiraingwa ekya fuuti nka mukaaga ekikomirweho omuguha, kikaba kiri nk’eirobo ry’okuroba eby’enyanja. Kwonka omu mwanya gw’okukomaho eirobo bakaba bataho baketi. Abakazi bakaba nibaihaihana omu kutaaha amaizi omu muringo ogu. Ebaketi bakaba bagikiikamu reero eijuramu amaizi. Nkaba ninteekateeka ngu kyorobi okuhitsya obu naakurataho. Nkatambika ebaketi omu maizi emirundi mingi kwonka yaaguma neezeerera aha mutwe gw’amaizi! Boona ku baarekiire aho kunshekyerera, omukazi omwe akampwera. Abantu bakaba nibakunda kuhwera kandi baine embabazi.

Mwembi mukahika mwakunda obuheereza bwanyu aha bizinga. Nimubaasa kutugambira bimwe ebyabashemeize?

Winston: Kikatutwarira obwire kumanyiira entwaza emwe. Nk’eky’okureeberaho, ab’eishe-emwe ku baabaire batuha eby’okurya, bakaba batugaburira byona ebi baateeka. Omu kubanza, tukaba tutarikumanya ngu twine kurya tukabatsigiraho. Tukaba turya byona ebi baatuha! Bwanyima, ekyo ku twakimanyire, tukaguma nitubatsigiraho. N’obu turaabe twabaire nitukora enshobe, ab’eishe-emwe bakaba barahuka kutwetegyereza. Kandi ku twabaire tutaayaayira ab’eishe-emwe bwanyima y’ameezi mukaaga nari n’okurengamu, bakaba bashemererwa kutureeba. Oyihireho ab’eishe-emwe ab’omu kicweka ekyo, niitwe Bajurizi ba Yehova abandi abu baabaire nibareeba.

Okutaayaaya kwaitu kukaha obujurizi burungi omu kicweka ekyo. Ab’omu byaro ebyo bakaba nibateekateeka ngu ab’eishe-emwe baketandikiraho ediini yaabo. N’ahabw’ekyo abatuuzi ku baabaire bareeba omureeberezi orikutaayaayira ebibiina n’omukazi we bataayaayiire ab’eishe-emwe, bakaba bashemererwa kandi bamanya ngu hariyo Abajurizi ba Yehova abandi.

Pam: Hariho ekintu kimwe ekyanshemeize ekyabaireho aha kirwa Kiribati, ekyabaire kiine ekibiina ky’ab’eishe-emwe n’abanyaanyazi-itwe bakye. Itinikai Matera owaabaire ari omureeberezi wenka omu kibiina ekyo, akateeraho kutureeberera. Izooba rimwe akaija n’ekiibo kirimu eihuri rimwe. Reero yaagira ati: “Eri n’eryanyu.” Tukaba nitukunda amahuri kwonka gatarikukira kureebeka. Ekiconco kikye ekyo eky’obufura kikatukwataho munonga.

Pam bwanyima y’emyaka, okarugwamu enda. Niki ekyakuhweraire kugumisiriza?

Omuri 1973 nkatwara enda obu nyowe na Winston twabaire turi omu South Pacific. Tukacwamu kugaruka omuri Australia ahu bwanyima y’ameezi ana omwana waitu yaafeereire. Winston nawe akagira obusaasi bwingi; ahabw’okufeerwa omwana we. Bwanyima y’obwire, obusaasi bw’omu mutima bukatuuba, kwonka nkaguma mbwine okuhitsya obu naashoma ekicweka kya Watchtower eya Apuri 15, 2009. Ekicweka “Ebibuuzo Kuruga omu Bashomi” kikaba kiine ekibuuzo: “Omwereere orikufeera omunda ya nyina naija kuzooka?” Ekicweka ekyo kikatuhamiza ngu Yehova niwe arikwija kucwamu omu nshonga egyo, kandi butoosha naakora ebihikire. Naija kutukiza enkojo ezi twine ezireetsirweho ensi egi embi, arikukoresa Omwana we “kuhwerekyereza emirimo ya Sitaane.” (1 Yoh. 3:8) Ekicweka ekyo kikatuhwera omu kwongyera kusiima “eruuru” y’omuhendo ei twine, itwe Abajurizi ba Yehova! Mbwenu shi tukaabaire turi nkahi kuri tutaine amatsiko g’Obukama?

Bwanyima y’okufeerwa omwana waitu, tukagaruka omu buheereza obw’obutwire. Tukaheereza aha Beseeli omuri Australia kumara ameezi makye, bwanyima twagaruka omu murimo gw’okutaayaayira ebibiina. Omuri 1981, bwanyima y’okumara emyaka ena omu byaro by’omu New South Wales na Sydney, tukeetwa kugaruka aha Beseeli kuheereza aha ofiisi y’eitaagi eya Australia, okuhitsya na hati.

Winston, obuheereza bwawe aha bizinga bya South Pacific haine oku bukuhwereire nk’omwe aha b’Akiiko k’Eitaagi erya Australasia?

Eego, omu muringo mingi. Eky’okubanza, eitaagi rya Australia rikashabwa kureeberera ekirwa kya American Samoa na Samoa. Ofiisi y’eitaagi eya New Zealand bakagikwatanisa n’eya Australia. Hati eitaagi erya Australasia nirireeberera Australia, American Samoa na Samoa, Cook Islands, New Zealand, Niue, Timor-Leste, Tokelau, na Tonga, emyanya ei mbaasize kutaayaayira ndikujwekyerera ofiisi y’eitaagi. Okukora n’ab’eishe-emwe abo abeesigwa omu bizinga ebyo kimpwereire kuhikiiriza gye obuheereza bwangye aha ofiisi y’eitaagi.

Ndikuhendera, nyowe na Pam kurugiirira aha bi turabiremu tutwire nitumanya ngu abakuru tibo bonka abarikusherura Ruhanga. Eminyeeto nabo nibakunda ‘eruuru ey’obuguzi bwingi’, n’obu abanyabuzaare baakuba batarikugikunda. (2 Bag. 5:2, 3; 2 Bus. 34:1-3) Hatariho kubangaanisa, Yehova ni Ruhanga orikutukunda, orikwenda ngu abato n’abakuru batungye amagara!

Nyowe na Pam obu twatandika kusherura Ruhanga emyaka erengire 50 enyima, tukaba tutarikumanya ahu okusherura oku kuratuhitsye. Amazima agarikukwata aha Bukama buzima n’eruuru y’omuhendo! Tumaririire kuhamira aha ruuru egi ey’omuhendo n’amaani gaitu goona!