Ruhanga n’Oha?

Abantu baingi nibagira ngu nibaikiririza omuri Ruhanga. Kwonka waabuuza ngu Ruhanga n’oha, nootunga eby’okugarukamu bitarikushushana. Abamwe nibagira ngu naatwaza kubi kandi ngu naafubira abantu baakora enshobe. Abandi nibagira ngu aine rukundo, kandi ngu naabasaasira n’obu baakukora enshobe. Kwonka hariho abarikwikiriza ngu Ruhanga ari hare munonga kandi tarikutufaho. Ahabw’emiteekateekyere etarikushushana, abantu nibareeba ngu kigumire kumanya Ruhanga.

Ni kikuru kumanya Ruhanga? Eego, ni kikuru. Waamanya ngu Ruhanga n’owaabuzima noogira ekigyendererwa n’okumarwa. (Ebyakozirwe 17:26-28) Waayeyongyera kwirira haihi Ruhanga, nawe naayeyongyera kukukunda n’okukuhwera. (Yakobo 4:8) Hatariho kubangaanisa, okumanya amazima agarikukwata ahari Ruhanga nikiija kukuhwera kutunga amagara agatahwaho.​—Yohaana 17:3.

Noobaasa kumumanya ota? Teekateeka aha muntu ou orikumanya gye, obundi nka munywani waawe ow’aha mara. Omukago gwanyu gukatandika guta? Noobaasa kuba waamanyire eiziina rye, emitwarize ye, ebi arikukunda n’ebi arikwanga, ebi akozire n’ebi arikwenda kukora, n’ebindi. Okanywana omuntu ogwo ahakuba okeega ebirikumukwataho.

Nikyo kimwe, nitubaasa kumanya Ruhanga twayetegyereza enshonga ezi:

• EIZIINA RYA RUHANGA NI RIIHA?

• RUHANGA AINE MITWARIZE KI?

• NI BINTU KI EBI YAAKOZIRE?

• NI BINTU KI EBI ARAAKORE?

• OKUMANYA RUHANGA NIKIKUGASIRA KITA?

Magaziini egi neeha eby’okugarukamu eby’ebibuuzo ebyo. Ebirimu nibiija kukuhwera kumanya Ruhanga n’ebi arikwija kukora omu biro by’omumaisho waagira omukago murungi nawe.