Orutaro n’Embeera Mbi y’Obwire Byongyeire aha Ibura ry’Eby’okurya omu Nsi Yoona—Baibuli Neegamba Ki?

Orutaro omu Ukraine, n’ebirugire omu mpinduka y’obwire, nibyongyera kuburiza kimwe eby’okurya. Na munonga eki kiriyo nikibaho omu mahanga agarikutunguuka ei baingi barikugumirwa kutunga eby’okurya birikumara.

“Eibura ry’eby’okurya nirireetwaho entaro, embeera mbi y’obwire, ebeeyi y’amajuta, n’ebindi bingi.”—bikagambwa António Guterres, omuhandiiki mukuru w’Ekibiina ky’Amahanga Ageeteeraine, Okwamushanju 17, 2023.
“Abahangu nibateebereza ngu Russia okuruga omu ndagaano y’okwiha eby’okurya omu Ukraine omu busingye, nikiija kwongyera aha ibura ry’eby’okurya omu mahanga amooro na munonga omu bukiizi-bwa-bumosho bw’Africa n’omuri Asia.”—Atalayar.com, Okwamushanju 23, 2023.

Yetegyereze eki Baibuli erikugamba aha ibura ry’eby’okurya na nyentsya.

Baibuli ekagamba kare aha ibura ry’eby’okurya

Yesu akagira ati: ‘Eihanga niriija kuteera erindi ihanga, n’obugabe buteere obundi bugabe, [kandi] nihaija kubaho n’enjara.’—Matayo 24:7.
Ekitabo ky’Okushuuruurwa nikigamba aha bavugi bana b’embaraasi ab’akamanyiso. Omwe aha bavugi b’embaraasi aba naajwekyera entaro. Ondiijo orikumukurata naajwekyera enjara, obwire obu eby’okurya byakubaire biri eby’okwerembaremba, kandi birikuguzibwa aha beeyi y’ahaiguru. “Naareeba embaraasi erikwiragura, kandi owaabaire agishutamiho akaba aine eminzaani omu ngaro ze. Naahurira nk’eiraka . . . nirigira riti: Endengo y’engano noija kuzigura omushaara gw’eizooba ryona! N’endengo ishatu za sayiri nazo ozigure omushaara gw’eizooba.”—Okushuuruurwa 6:5, 6, Baibuli eya Contemporary English.

Obunabi obu oburikukwata aha ibura ry’eby’okurya buriyo nibuhikiirira omu bwire obu Baibuli erikweta ‘ebiro by’emperu.’ (2 Timoseo 3:1) Kubaasa kwega ebirikukwata aha ‘biro by’emperu’ n’abavugi bana b’embaraasi abarikugambwaho omu Okushuuruurwa, reeba vidiyo Ensi Ekahinduka Kuruga 1914, kandi oshome n’ekicweka, “The Four Horsemen—Who Are They?”

Oku Baibuli erikubaasa kuhwera

Baibuli erimu obuhabuzi oburikukora oburikubaasa kutuhwera kwemera embeera zigumire, otwariiremu okutemba kw’ebeeyi y’eby’okurya nari eibura ry’eby’okurya. Reeba eby’okureeberaho ebimwe omu kicweka “How to Live on Less.”
Baibuli neeha amatsiko ngu ebintu nibiija kutereera. Neeraganisa obwire obu harikwija kubaho “omweru mwingi omu nsi,” kandi buri omwe aine eby’okurya birikumara. (Zaaburi 72:16) Kubaasa kwega ebirikukwata aha matsiko ga Baibuli aga nyentsya n’enshonga ahabw’enki orikubaasa kwesiga eki Baibuli erikugamba, shoma ekicweka, ““Amatsiko Agaabuzima Aga Nyentsya Nungi.”