Abategyeki Okurabura Ahari Haramagedoni—Baibuli Neegamba Ki?

Akasheeshe k’Orwokubanza, Okwaikumi 10, 2022, bomu za Russia zikateera omu ndembo nyingi za Ukraine omu kuteeraho kweshashuza ahabw’okushenyagura orutindo orurikugaita Crimea na Russia. Ebi bibaireho abategyeki baaheza kurabura ngu Haramagedoni neebaasa kuba eri haihi kubaho.

• “Titukabaga haihi na Haramagedoni nka hati kuruga obu [Omwebembezi wa U.S. John F.] Kennedy yaarwana na Cuba. . . . Tindikuhamya ngu hariho oku orikubaasa kwegyendesereza kukoresa ebirwaniso by’obutwa hatarugiremu Haramagedoni.”—bikagambwa omwebembezi wa U.S. Joe Biden, Okwaikumi 6, 2022.

• “Niinyikiriza ngu nihabaasa kubaho Haramagedoni, eki n’eky’akabi aha nsi yoona.”—bikagambwa omwebembezi wa Ukraine Volodymyr Zelensky, ku yaabuuziibwe aha kukoresa ebirwaniso by’obutwa. Aga n’amakuru ga BBC, Okwaikumi 8, 2022.

Amahanga shi ku garaakorese ebirwaniso by’obutwa, nikiija kureetaho Haramagedoni? Baibuli neegamba ki?

Ebirwaniso by’obutwa shi nibiija kureetaho Haramagedoni?

Ngaaha. Ekigambo “Haramagedoni” kiri omu Baibuli omurundi gumwe omu Okushuuruurwa 16:16. Oru ti rutaro oruraabe aha gati y’amahanga garikurwanagana hamwe, kureka n’orutaro aha gati ya Ruhanga ‘n’abagabe b’ensi zoona.’ (Okushuuruurwa 16:14) Ruhanga naija kukoresa orutaro oru Haramagedoni kuhendera obutegyeki bw’abantu.—Danieli 2:44.

Kubaasa kumanya ebirikukiraho aha ku orutaro rwa Haramagedoni ruragasire ensi, shoma ekicweka, Orutaro rwa Haramagedoni Niki?

Orutaro rw’ebirwaniso by’obutwa shi nirwija kucwekyereza ensi n’abantu?

Ngaaha. N’obu abategyeki barikubaasa kwija kukoresa ebirwaniso by’obutwa omu biro by’omumaisho, Ruhanga tarikwija kwikiriza abantu kucwekyereza ensi. Baibuli neegira eti:

•  ‘Ensi yo neegumaho obutwire bwona.’—Omubuurizi 1:4.

• ‘Abahikiriire nibaija kuhungura ensi, bagituuremu ebiro byona.’—Zaaburi 37:29.

Kwonka, obunabi bwa Baibuli n’ebirikubaho hati nibyoreka ngu juba nihaija kubaho empinduka z’amaani omu byafaayo by’abantu. (Matayo 24:3-7; 2 Timoseo 3:1-5) Manya eki Baibuli erikugamba aha biro by’omumaisho kurabira omu mushomo gwaitu gw’okwegyesibwa Baibuli otashashwire.