Nimbaasa Kutunga Ebigambo Birikuhuumuriza omu Baibuli?
Eki Baibuli erikugarukamu
Eego. (Abarooma 15:4) Yetegyereze Ebyahandiikirwe ebimwe ebihuumuriize baingi abaine embeera egumire, kandi abaine n’enyehurira mbi.
Omu kicweka eki
Oburemeezi
Zaaburi 23:4: ‘N’obu naakuraba omu ruhanga rw’ekibunda, Tindikwija kutiina kabi koona, ahabw’okuba ori hamwe naanye.’
Amakuru: Waashaba Ruhanga kandi okeesiga Ekigambo kye Baibuli kukuha obuhabuzi, noobaasa kuraba omu buremeezi oine obumanzi.
Abafilipi 4:13: ‘Nimbaasa kukora byona [ahabw’ogwo] orikumpa amaani.’
Amakuru: Ruhanga naabaasa kukuha maani g’okwemera buri buremeezi bwona.
Okufeerwa omukundwa
Omubuurizi 9:10: ‘Ahabw’okuba okuzimu tihabayo murimo, nari enaama, nari okumanya n’obu bwakuba obwengye.’
Amakuru: Abafu tibarikubonabona, kandi tibarikubaasa kutukora kubi. Tibaine eki barikumanya.
Ebyakozirwe 24:15: ‘Nihaija kubaho kuzooka.’
Amakuru: Ruhanga naabaasa kugarura abakundwa baitu abaafiire babe abahuriire.
Okweshinja ekirenga
Zaaburi 86:5: “Ahabw’okuba, iwe [Yehova,a] ori murungi, orahuka kusaasira, kandi ogira embabazi nyingi ahari boona abakutakira.”
Amakuru: Ruhanga naasaasira abo abarikweteisiza kimwe ahabw’enshobe ezi baakozire enyima, kandi abamaririire kutagaruka kuzikora.
Zaaburi 103:12: ‘Nk’oku oburugwa-izooba eri hare n’oburengyerwa-izooba, nikwo atwaire atyo hare eby’okushiisha byaitu.’
Amakuru: Ruhanga ku arikutusaasira, ebibi byaitu naabita hare munonga. Tarikuguma nibitwijutsya butoosha kutucwera orubanja nari kutufubira.
Enaku
Zaaburi 31:7: “Okareeba obusaasi bwangye, waamanya enaku zangye.”
Amakuru: Ruhanga naamanya okubonabona kwawe kwona. Naamanya enyehurira zaawe ez’omunda, n’obu abandi baakuba batarikuzimanya.
Zaaburi 34:18: “[Yehova] aba haihi ab’emitima ehendekire, ajuna ab’omutima [oguhendekire].”
Amakuru: Ruhanga naaraganisa kukushagika waaba oine enaku. Naabaasa kukuha amaani g’okwemera obusaasi bwawe.
Endwara
Zaaburi 41:3: ‘[Yehova naija kumuhangaana], arembeire aha kitanda kye.’
Amakuru: Ruhanga naabaasa kukuhwera waaba oine endwara y’amaani arikukuha obusingye bw’omu mutima, n’amaani, okugumisiriza, n’obwengye bw’okucwamu gye.
Isaaya 33:24: “Tihaine mutuuzi waayo origira ati: Ndwaire.”
Amakuru: Ruhanga naaraganisa obwire obu abantu boona baraayesiimire omu kugira amagara marungi.
Amaganya n’okwerarikirira
Zaaburi 94:19: “Ku nteekateeka bingi, naayemereza omutima, okuhuumuriza kwawe kugwisa gye amagara gangye.”
Amakuru: Twaba twine amaganya tukashaba Ruhanga, naabaasa kutuhwera kuguma twikaikaine.
1 Petero 5:7: “Mumwegyekyerere okushoberwa kwanyu kwona, ahabw’okuba naabataho omutima.”
Amakuru: Ruhanga tarikwehuzya okubonabona kwaitu. Naayenda ngu tumushabe ahari buri kimwe ekirikutwerarikiriza.
Entaro
Zaaburi 46:9: “Amaraho engamba okuhika aha muheru gw’ensi.”
Amakuru: Obukama bwa Ruhanga juba nibwija kumaraho entaro zoona.
Zaaburi 37:11, 29: ‘Abacureezi nibaija kuhungura ensi, beesiime ahabw’okugira obusingye bwingi. Abahikiriire nibaija kuhungura ensi, bagituuremu ebiro byona.’
Amakuru: Abantu barungi nibaija kwesiimira omu kugira obusingye omu nsi ebiro byona.
Okutiina ebiro by’omumaisho
Yeremia 29:11: “Ahakuba niimanya ebi ndikubateekateekyera, eby’oburungi bitari by’obubi, ngu mbone [kubaha amatsiko na nyentsya, nikwo Yehova] arikugira.”
Amakuru: Ruhanga naahamiza abantu be ngu nibaija kugira nyentsya nungi.
Okushuuruurwa 21:4: ‘Naija kuragaza amarira goona aha maisho gaabo, tiharikwija kubaho kufa bundi, n’obu kwakuba okucura nari okurira nari obusaasi, ahakuba ebya ira nibiija kuba bihwaireho.’
Amakuru: Ruhanga naaraganisa kwihaho ebibi byona ebi turikureeba nibibaho omu nsi hati.
a Yehova n’eiziina rya Ruhanga. (Zaaburi 83:18) Reeba ekicweka, “Yehova n’Oha?”