Gumizamu Noohamya Omukago Gwawe n’Omukundwa Waawe

1. Ahabw’enki abanywani barungi bari ebiconco kuruga ahari Yehova?

ABANYWANI barungi n’ebiconco kuruga ahari Yehova. (Yak. 1:17) Nibakunda Ruhanga kandi naitwe nibatukunda. Nibashemererwa naitwe, batuhuumuriza twaba twine amaganya, kandi batuha n’obuhabuzi kyayetengyesa. Nibatuhamiraho kandi nitubaasa kubeesiga. Buzima abanywani nk’abo ‘nibashemeza omutima’ gwaitu!—Enf. 27:9.

2. Ahabw’enki ni kikuru omushaija n’omukazi kugumizamu nibahamya omukago gwabo? (Matayo 19:6)

² Ni kikuru omushaija n’omukazi we kuba abanywani. Baine kugumizamu nibahamya omukago gwabo, kandi tibaine kugukwata eijaga. Baayehuzya omukago gwabo nibabaasa kutandika kugira eihamba, kwehurira kubi nari bagire ekiniga. Kwonka baagumizamu kuhamya omukago gwabo nibagira enkoragana nungi erikukirirayo kimwe. (Shoma Matayo 19:6.) Omu kicweka, nituza kureeba oku abari omu bushwere barikubaasa kugumizamu nibahamya omukago gwabo. Kwonka, ka tubanze tureebe oku Abakristaayo abatari omu bushwere barikubaasa kutoorana omukundwa oraabe munywani waabo ebiro byona.

OKU ORIKUBAASA KUTOORANA OMUKUNDWA ORAABE MUNYWANI WAAWE EBIRO BYONA

3-4. Niki ekirikubaasa kuhwera Omukristaayo kutunga omuntu murungi w’okutaaha nawe omu bushwere? (Enfumu 18:22)

³ Tutakacwiremu aha nshonga nkuru, twine kubanza kuteekateeka aha buremeezi n’ebirungi ebirikubaasa kurugamu. Okucwamu nk’okwo nikuba nikuza kukwata aha magara gaitu kumara obwire buraingwa, n’ahabw’ekyo ni kikuru munonga kucwamu n’obwegyendesereza.

⁴ Twaba nitutoorana ow’okuza nawe omu bushwere kandi oraabe munywani waitu ebiro byona, nituba nitucwamu emwe aha nshonga ezirikukirayo obukuru. Ahabw’okugira ngu Yehova niwe yaataireho entebeekanisa y’obushwere, n’eky’obwengye kusherura obuhabuzi bwe twaba nitutoorana ow’okutaaha nawe omu bushwere. Naayenda ngu omushaija atungye omukazi murungi, n’omukazi atunge omushaija murungi. Butoosha Yehova naamanya ebitushemereire. (Shoma Enfumu 18:22; Isa. 48:​17, 18) Emisingye eri omu Kigambo kya Ruhanga neebaasa kuhwera Omukristaayo kutunga omuntu omushemereire.

5. Ahabw’enki ni kikuru kutaaha omu bushwere n’omuntu obatiziibwe?

⁵ Ku turikubatizibwa, nituba banywani ba Ruhanga. (Zab. 25:14) Ku oraabe nooyenda kutaaha omu bushwere, oine kusherura ou oraabutaahemu nawe omuri banywani ba Yehova. (1 Kor. 7:39) Waakora ekyo, nooba nooyoreka ngu nootwara emitindo ya Yehova nk’ey’omuhendo, kandi noija kureeba ou ori nawe omu bushwere nk’omugisha kuruga ahari Yehova. (Enf. 19:14) Noija kwetantara oburemeezi oburikuruga omu ‘kukwatanisa’ n’otarikwikiriza. (2 Kor. 6:14) Buzima nikiba kitari ky’obwengye kuriima omuntu otari mu mazima, obundi ahabw’okuteekateeka ngu omu Bakristaayo bagyenzi baawe tiharimu akushemereire. Kandi toine kuteekateeka ngu wariima omuntu otari mu mazima naabaasa kwija kwega amazima.

6-7. Ni bibuuzo ki ebi oine kwebuuza omu bwire bw’okuriima?

⁶ N’ekyabuzima, tiburi muntu obatiziibwe ngu ni murungi w’okutaaha nawe omu bushwere. Haaba haine ou orikwenda kuriima, ni kirungi kwebuuza ebibuuzo nk’ebi: ‘Naatwariza ata ab’eka ye? Naaha abantu ekitiinisa kandi naafayo? Banywani be ni baahi? Naatwaza ata haabaho obutaikirizana? Naaremera aha miteekateekyere ye, nari naahurikiza n’ebitenso by’abandi na munonga byaba bitarikuhenda emisingye ya Baibuli? Aine miteekateekyere ki aha mpiiha?’

⁷ Noobaasa kwongyera kwebuuza oti: ‘Munywani wangye ogu naakundira kimwe Yehova? Ariyo naajwara “omuntu omusya”? Naaza kumpwera kugumizamu nimpeereza Yehova omu bwijwire? Twine ebigyendererwa by’omwoyo ebirikushushana? Naija kuba omunywani ow’aha mara omu bushwere?’ (Kol. 3:​9, 10) Waaba ori munyaanyazi-itwe, ow’eishe-emwe ou orikuriima naija kukubeera omunywani murungi, kandi omutwe gw’eka murungi? (1 Kor. 11:3) Waaba ori ow’eishe-emwe, munyaanyazi-itwe ou orikuriima naija kwikiriza kuza ahansi y’obushoboorozi bwawe nk’omutwe gw’eka n’obu oraabe otahikiriire? Nikitwara obwire kugarukamu ebibuuzo ebyo. N’ahabw’ekyo, teeraho kumanya gye ou orikwenda kutaaha nawe omu bushwere omu bwire bw’okuriima.

8-9. Niki ekirikubaasa kuhwera omuntu orikuriima kucwamu omu muringo gw’obwengye? (Reeba n’ekishushani.)

⁸ Omu bwire bw’okuriima noija kucwamu omu muringo gw’obwengye waateeraho kumanya gye omuntu ou orikuriima. Teeraho kumanya oku abandi barikureeba munywani waawe ogwo. Noobaasa kubabuuza oku omuntu waawe arikutwaza. Nk’eky’okureeberaho, naamanywa nk’omucureezi, omunyambabazi, kandi ow’emiteekateekyere eringaniire? Sarah, munyaanyazi-itwe owa French Guiana owaataahire omu bushwere n’ow’eishe-emwe orikwetwa Daniel naagira ati: “Nkatunga ebirikukwata ahari Danieli ndikubuuza ow’eishe-emwe ou yaabaire naatuura nawe kandi barikukora hamwe nka baapayoniya, omureeberezi omu kibiina kye, abanywani abarikutumanya gye, na banyaanyazi-itwe ab’omu kibiina kye.” Noobaasa n’okubuuza omuntu ou orikuriima omu muringo gw’obwengye yaaba haine ebyamubaireho nari ebi yaakozire enyima ebi waakwenzire kumanya. Ahabw’okuba bwanyima y’obwire, ebintu ebyo nibibaasa kureetaho oburemeezi omu bushwere.

⁹ Otakaayehuzya okubangaanisa oku oine aha ou orikuriima nari ebi abanywani abakuzire omu by’omwoyo barikukugambira. Waakora ekyo, noija kubaasa kucwamu yaaba kiri eky’obwengye kugumizamu nooriima omuntu ogwo nari kurekyera aho.a Hati, ka tugambe aha baaherize kutaaha omu bushwere omu bucweka oburikukurataho.

MUMARE HAMWE OBWIRE KUBAASA KWOMBEKA OMUKAGO GWANYU

10. Ahabw’enki kiri kirungi omushaija n’omukazi we kumara hamwe obwire?

¹⁰ Omushaija n’omukazi we nibabaasa kuguma bari abanywani kandi bahamye obushwere bwabo barikumara obwire hamwe n’obu baakuba baine bingi by’okukora. Ekyo nikibaha omugisha gw’okugaaniira aha birikubaho buri-izooba, eki barikuteekateeka aha nshonga ezitari zimwe, oku barikwehurira, okworekana rukundo n’okukora hamwe ebirikubareetera okushemererwa.

11. Niki ekirikubaasa kureeta akabi aha mukago gw’omushaija n’omukazi we?

¹¹ Omushaija n’omukazi we abaine enkoragana nungi nibakunda kuba hamwe omu mwanya gw’okwetaanisa aha ndiijo. N’ekyabuzima obumwe tibarikubaasa kuba hamwe buri kaire. Kwonka okutaba hamwe kumara obwire bwingi nikibaasa kuba eky’akabi. Nk’eky’okureeberaho, abamwe nibaikiriza kukora emirimo ey’omu mahanga agandi reero batsigaho amaka gaabo kumara obwire buraingwa. N’obu ekyo kiraabe nikibaasa kuhwera eka omu by’entaatsya, okumara obwire buraingwa mutari hamwe nikibaasa kureetaho oburemeezi omu bushwere bwanyu.

12-13. (a) Abakristaayo abamwe abari omu bushwere nibakora ki kubaasa kumara hamwe obwire? (Reeba n’ekishushani.) (b) Omukago gwawe n’ou orinawe omu bushwere gwine kugira bukuru ki ahariiwe? (Reeba akabokusi “Omwanya ogu Omukundwa Waawe Aine omu Magara Gaawe.”)

¹² Yetegyereze eki bamwe aha bari omu bushwere bakozire kubaasa kumara hamwe obwire buri izooba. Leah, ow’omuri Guam, naagira ati: “Nyowe n’omushaija wangye nitukunda kukora ebintu bingi hamwe. Titurikukira kuza omu by’okweshemeza nari kuza aha mikoro tutari hamwe.” Roxanne, ow’omuri United States naayongyeraho ati: “N’obu turaabe twine bingi by’okukora, tureebire ngu ni kikuru kutaho obwire bw’okuba hamwe nk’oku turikutaho obwire bw’ebintu ebikuru.” (Gyeragyeranisa Amosi 3:3.) Damien, ow’omuri France, naagira ati: “Twetegyereize ngu ni kikuru kumanya ebi ou ori nawe omu bushwere arikukunda, kandi nitushemererwa twaba nitubikora hamwe.” (Mat. 7:12) Kandi Katie, nawe orikuruga United States, naagira ati: “Obumwe nitweihaho amasimu gaitu kugira ngu gatakatuhuzya twaba turi hamwe.”

¹³ Ekirikukira obukuru, mumare hamwe obwire omu by’omwoyo. Myriam, ow’omuri France, naagira ati: “Nitutandika izooba turikushoma Baibuli reero tugaaniira aha bi twayega n’oku turikubaasa kubigyenderaho. Obwire obwo obu turikumara hamwe nimbukunda munonga.” Naayongyeraho ati: “Kandi ninkunda munonga obwire obu turikushaba hamwe reero nkahurira oku ibanyi ainiire Yehova rukundo mpango.” Katie, owaaba yaagambirweho naagira ati: “Obwire oburikukirayo kutushemeza n’okuba hamwe omu kubuurira. Nikishemeza kuhurira buri omwe arikugamba ahari Yehova, kandi buri omwe naayega ebintu bisya ahari mutaahi we.”—Enf. 27:17.

MUGUME HAMWE HAABAHO OBUREMEEZI

14-15. Ahabw’enki omushaija n’omukazi we baine kukora kyona eki barikubaasa kusingura oburemeezi oburikubaho omu bushwere? Shoboorora.

¹⁴ Ahabw’okugira ngu omushaija n’omukazi tibahikiriire, nibaija kutunga oburemeezi omu bushwere bwabo. Baibuli neegira ngu abari omu bushwere ‘nibaija kugira obusaasi omu mubiri.’ (1 Kor. 7:28) Ebigambo ebyo nibimanyisa oburemeezi n’okugyezibwa okurikukira kubaho omu bushwere. Habaho buremeezi nk’obwo, baine kukora kyona eki barikubaasa kuguma hamwe, kandi bakabusingura. Ahabw’enki?

¹⁵ Teekateeka aha ky’okureeberaho eki. Ekyombeko nari ekishushani ky’omuhendo kyasiisikara, bakama baakyo nibabaasa kuteeraho kukihunduuza. Nikibaasa kubeetengyesa kukoresa esente nyingi n’emyaka mingi kubaasa kukihunduuza. Ahabw’enki? Ahabw’okugira ngu ekyombeko ekyo nari ekishushani n’eky’omuhendo aharibo. Nikyo kimwe, obushwere n’ekintu eky’omuhendo. Kwonka obumwe obushwere nibubamu oburemeezi. Kwonka, nk’oku ekyombeko nari ekishushani ekisiisikaire kirikubaasa kuhunduuzibwa, n’oburemeezi oburi omu bushwere nibubaasa kugonjoorwa. Nikibaasa kutwara obwire n’okuteeraho, kwonka Yehova naija kushemererwa omushaija n’omukazi we baakora n’amaani kuhamya obushwere bwabo kandi bakaguma hamwe. (Mal. 2:16) Twakora ekyo nikyoreka ngu nitukundana, kandi nituha Yehova ekitiinisa Owaatandikireho obushwere.

16. Kurugiirira aha 1 Abakorinso 13:​4-8a, niki ekirikubaasa kuhwera omushaija n’omukazi we abaine oburemeezi bw’amaani omu bushwere bwabo? (Reeba ekishushani n’akabokusi “Ekiraabahwere Kuhamya Omukago Gwanyu.”)

¹⁶ Mwagira oburemeezi omu bushwere bwanyu, mutarahuka kutaana. (1 Kor. 7:​10, 11) Omu mwanya gw’ekyo, yebuuze oti: ‘Nimbaasa kugira eki naakora kwongyera kuhamya omukago gwaitu?’ Shwijuma eki Baibuli erikugamba aha bikwatiraine n’okworekana rukundo, kandi oyebuuze yaaba noobaasa kwongyera amaani omu kworeka emitwarize emwe erikugambwaho omu 1 Abakorinso 13:​4-8a. (Kishome.) Omu mwanya gw’okuronda oku oraarugye omu bushwere bwawe, teeraho nk’oku orikubaasa kugaruka kukunda omukundwa waawe n’okumuguma haihi. Ta omutima aha ki orikubaasa kukora kugaruraho omukago gwanyu. Shaba Yehova obuhwezi. Tunga obuhwezi oburikwetengyesa omu bitabo byaitu na vidiyo, abareeberezi n’Abakristaayo abakuzire omu by’omwoyo. Waayesiga Yehova omu bushwere bwawe nimuba ‘omurunga gw’enyabushatu [kandi] tigurikwija kucweka juba.’—Mub. 4:12.

17. Abari omu kuriima n’abari omu bushwere nibabaasa kutunga bata okushemererwa?

¹⁷ Yehova naayenda ngu abaheereza be boona bagire okushemererwa otwariiremu abarikuriima n’abagiire omu bushwere. N’ahabw’ekyo waaba nooyenda kuza omu bushwere, toorana n’obwegyendesereza oraabe munywani waawe ow’aha mara ebiro byona. Kandi waaba ori omu bushwere, gumizamu noohamya omukago gwawe n’omukundwa waawe. Kora n’amaani kusingura oburemeezi oburikubaasa kubaho omu bushwere bwanyu, kandi oyesigye obuhwezi bwa Yehova. Waakora ebintu ebyo, noija ‘kwesiima’ n’omukundwa waawe ou orinawe omu bushwere!—Mub. 9:9.