Yongyera Kuba Omwegyesa Murungi omu Kubuurira

1. Niki eki twine kuteeraho kukora kandi ahabw’enki? (2 Timoseo 4:2) (Reeba n’ekishushani.)

YESU akagambira abakuratsi be ati: “Muhindure abantu abeegi . . . , nimubeegyesa kworobera byona ebi naabaragiire.” (Mat. 28:​19, 20) Ebigambo ebyo nibyoreka ngu Abakristaayo boona baine kuba abeegyesa. N’amazima Yehova niwe arikweyiriza haihi ab’emitima eshemeire, kandi na baamaraika nibahwera omu kusherura abantu abo. (Byak. 13:48; Yoh. 6:44; Kush. 14:6) Kwonka nabwo twine kwega oku twine kwegyesa abantu kukunda Yehova. Teekateeka aha ky’okureeberaho ky’entumwa Paulo na Barunaba. Baibuli neegira ngu obu baabuurira omuri sinagogi ya Ikonio ‘bakagamba [omu muringo] ogwareeteire omutwe gw’Abayudaaya n’Abagriika baingi kwikiriza.’ (Byak. 14:1) Buzima, Paulo na Barunaba bakaba beegire kwegyesa gye. (Shoma 2 Timoseo 4:2.) N’ahabw’ekyo naitwe twine kuteeraho kuba abeegyesa barungi.

2. Ahabw’enki Abakristaayo abamwe barikuteekateeka ngu tibarikubaasa kuba abeegyesa barungi?

² Abamwe nibateekateeka ngu tibarikubaasa kuba abeegyesa barungi ahabw’okugira ngu tibarashomire nari tibarikubaasa kushoboororera gye abandi. Nangwa n’abamwe abarikugambwaho omu Baibuli bakeehurira batyo. (Kur. 4:10; Yer. 1:6) Abandi nibabaasa kuteekateeka ngu tibarikumanya kwegyesa gye ahabw’okugira ngu tibarikutunga ebirungi nk’eby’abandi barikutunga omu kubuurira. N’amazima, tiburi omwe ou turikubuurira ngu naija kwikiriza amakuru marungi. Kandi ebirungi ebi turikutunga tibirikurugiirira aha kuteeraho kwaitu kyonka. Yehova na baamaraika nibatuhwera kutunga abarikwenda kwega amazima. Kwonka nabwo, nitwenda kuteeraho kugambira abandi ebi turikwikiriza omu muringo ogurikushemeza. Omu kicweka eki nituza kugamba aha nshonga ishatu ezirikubaasa kutuhwera kuba abeegyesa barungi omu kubuurira.

YOREKA ABU ORIKWEGYESA NGU NOOBAFAHO

3. Ahabw’enki Yesu yaabaire naabaasa kuhika abantu aha mutima?

³ Baibuli neegira ngu Yesu “akaba naamanya ebiri omu muntu.” (Yoh. 2:25) Ebigambo ebyo nibimanyisa ngu Yesu akaba naamanya ebi abantu baabaire nibateekateeka n’ebigyendererwa byabo. N’ahabw’ekyo Yesu akaba naabaasa kuhika abantu aha mutima ahakuba akaba naamanya ebyetengo byabo. Akaba naabaasa kureeba ngu abantu banyangaraire omu by’omwoyo, kandi ngu nibatuuntuzibwa emigyenzo n’ebiragiro by’abantu. (Mat. 9:36; 23:4) Ezo nizo nshonga ezi yaagambireho omu Rubazo rwe orw’Aha Rushozi. Abantu baingi bakaba nibakunda kuba haihi nawe ahabw’okugira ngu akaba naagamba aha nshonga ezirikubakwataho.

4. Nitubaasa kworeka tuta ngu nitufayo aha bantu? (Reeba n’ebishushani.)

⁴ Nitworeka ngu nitufayo aha bantu abu turikubuurira twateeraho kwetegyereza oku barikwehurira. Buri muntu ou turikubuurira naakwatwaho embeera mbi z’ensi egi. Okumanya ekyo nikituhwera kugirira abantu abo esaasi. Nk’eky’okureeberaho, haine ekiherize kubaho omu kicweka kyanyu ekireetaire abantu kwerarikirira? Abazaire nibeerarikirira aha mbeera mbi ezirikubaasa kuhika aha baana baabo aha ishomero? Hariho eibura ry’emirimo? Teeraho kuteekateeka aha ku abantu barikugumirwa kuraba omu biro ebi “eby’akabi kaingi” haza bataine matsiko agu Baibuli erikuha.—2 Tim. 3:1; Isa. 65:​13, 14.

5. Yesu akaba naataana ata n’Abafarisaayo? (Matayo 11:​28-30)

⁵ Yesu akaba naafayo aha bantu, kandi ekyo bakaba nibabaasa kukireeba butunu omu muringo ogu yaabaire naabatwarizamu. Akaba naataanira kimwe aha Bafarisaayo abaabaire nibareeba abantu baabutoosha nk’ab’ahansi, kandi abataine mugasho. (Mat. 23:13; Yoh. 7:49) Kwonka Yesu we akaba naatwariza abantu omu muringo gw’ekitiinisa, kandi ogw’embabazi. Akaba ‘naatwaza gye, ari omucureezi omu mutima,’ kandi ekyo kikamuhwera kuba omwegyesa murungi. (Shoma Matayo 11:​28-30.) Naitwe twine kutwariza abantu abu turikubuurira omu muringo gw’ekitiinisa, kandi ogw’embabazi.

6. Abarikwanga obutumwa bwaitu n’abarikutuhakanisa nitubaasa kubatwariza tuta omu muringo gw’ekitiinisa kandi ogw’embabazi?

⁶ Abantu abamwe nibanga obutumwa bwaitu nari batuhakanisa. Ekyo kyabaho tushemereire kutwaza tuta? Yesu akatwegyesa ngu twine kukora ekirikukira aha kugumisiririza okuhakanisibwa. Akagira ati: “Mukunde abazigu baanyu, mukorere gye abarikubanga, mushabire omugisha abarikubakyeena, mushabire abarikubaitsa omwaga.” (Luk. 6:​27, 28) Ekyo nikiija kutworobera kukikora twaguma twine emiteekateekyere mirungi aha bantu abarikwanga obutumwa bwaitu. N’ekyabuzima abamwe nibenda ngu turekyere aho kubuurira. Kwonka abandi nibabaasa kuba baine amaganya, kandi beerarikiriire ahabw’embeera eri omu maka gaabo etaine kakwate naitwe. Obundi nitubaasa kuba twija kubabuurira omu bwire bubi. N’ahabw’ekyo twine kugyendera aha buhabuzi oburikutwehanangiriza ngu ‘ebigambo [byaitu] bigume biri eby’embabazi, nk’ebirimu omwonyo, [tubone] kumanya oku tushemereire kugarukamu omuntu weena.’ (Kol. 4:6) Twagirira abantu esaasi, kandi tukateeraho kwetegyereza ebyetengo byabo, tituraarahukye kuguubwa kubi baatutwariza kubi, kandi nitwija kuba abeegyesa barungi.

KORESA BAIBULI WAABA NOOYEGYESA ABANDI

7. Yesu akakoresa ki kwegyesa abantu? (Yohaana 7:​14-16)

⁷ Yesu akaba atagarukamu abantu arikwihirira aha bi arikumanya kyonka. Ebi yaabaire naayegyesa akaba abyegamiza aha Kigambo kya Ruhanga, kandi akaba abishoboorora omu muringo gworobi, ogurikubahwera kubyetegyereza n’okubiijuka. Baibuli neetugira ngu Yesu akaba ayegyesa “nk’oine obushoboorozi [atari] nk’abahandiiki.” Ekyo kikareetera abantu ‘kutangaara.’ (Mak. 1:22) Ahabw’okuba abahandiiki ab’omu bwire bwa Yesu bakaba nibajuriza munonga ebigambo bya baarabi kushagika enyegyesa zaabo. Okutaana nabo, Yesu akaba ajuriza Ekigambo kya Ruhanga. Ahabw’okugira ngu akaba ari Omwana wa Ruhanga owaabaire naatuura omu iguru, akaba naabaasa kukoresa obwengye bwe kwegyesa abantu ebi baabaire batarikubaasa kwetegyereza kugira ngu batangaare. Kwonka, ebi yaayegyeise akabyegamiza aha Byahandiikirwe n’ebi Ruhanga arikukunda. (Shoma Yohaana 7:​14-16.) Buzima, Yesu akateeraho abakuratsi be eky’okureeberaho kirungi.

8. Entumwa Petero akatooreza ata Yesu?

⁸ Abeegi ba Yesu nabo bakaba nibajuriza Ekigambo kya Ruhanga omu kwegyesa. Nk’eky’okureeberaho, teekateeka aha rubazo oru rw’entumwa Petero yaahaire aha izooba rya Pentekoote 33 Y.A.K. Petero akaba atari mushaija owaabaire ashomire. Kwonka nabwo akabaasa kuhika aha mitima y’abantu abaabaire bamuhurikiize obu yaashoboorora ebyahandiikirwe ebirikukwata aha bunabi obu Yesu yaahikiriize. (Byak. 2:​14-37) N’ekyarugiremu, ‘abaikiriize ekigambo kye bakabatizibwa, eryo izooba haayongyerwaho abantu nk’enkumi ishatu.’—Byak. 2:41.

9. Ahabw’enki tushemereire kujuriza Ekigambo kya Ruhanga twaba nitwegyesa?

⁹ Tihariho kikoreso ekirikubaasa kutuhwera kuhika abantu aha mutima kukira Baibuli. (Heb. 4:12) N’ahabw’ekyo, twine kugijuriza twaba nitwegyesa. Nitwenda ‘kubuurira Ekigambo kya Ruhanga,’ bitari biteekateeko byaitu. (2 Tim. 4:2) Enfumu 2:6 nihagira hati: “[Yehova] niwe aha obwengye, kandi omu kanwa ke nimwo haruga okumanya n’okwetegyereza.” N’ahabw’ekyo twakoresa Ebyahandiikirwe kwegyesa abantu, nituba turi nk’abarikwikiriza Yehova kugamba. (Mal. 2:7) Nitwenda kuhwera abantu kumanya ngu ebi Baibuli erikwegyesa nibikira obwengye bw’abantu. Ekahandiikisibwa Ruhanga, neetuha obwengye obu turikwetenga kubaasa kushemeza Omuhangi waitu, okugira okushemererwa n’okumarwa.—2 Tim. 3:​16, 17.

10. Nitubaasa kuhwera tuta omwegi kuta omutima aha Kigambo kya Ruhanga?

¹⁰ Waaba nootebeekanisa kwegyesa omwegi, sherura emiringo erikubaasa kumuhwera kuta omutima aha ki Baibuli erikwegyesa. Omwegi ashemereire kwetegyereza ngu n’obu ebishushani na vidiyo biraamugasire omu kwega, Baibuli nikyo kitabo ekikuru. N’ahabw’ekyo, mushome hamwe Ebyahandiikirwe ebirimu enshonga enkuru, kandi omuhwere kubiteekateekaho. Waaba noohikaanisa nawe ebiteekateeko aha bishushani na vidiyo, muhwere kwetegyereza amazima g’omu Baibuli agu birikwegyesa. Ekyo tikirikukwetengyesa kugamba bingi nari kushoma Ebyahandiikirwe bingi. Kureka, ha omwegi obwire abaase kuteekateeka aha ki ebi yaashoma birikumanyisa n’obu kyakwetengyesa kushoma ekyahandiikirwe emirundi erikurenga ahari gumwe. Twakora ekyo, nitwija kuba nitwegyesa abantu Baibuli kitari kitabo, ebishushani nari vidiyo kyonka.—1 Kor. 2:13.

11-12. (a) Nitubaasa kukora ki kugumisiririza abeegi ba Baibuli? (Ebyakozirwe 17:​1-4) (Reeba n’ekishushani.) (b) Nitubaasa kuhwera tuta abantu abataine eki barikumanya ahari Baibuli?

¹¹ Omwegi yaagumirwa kwikiriza enshonga ei orikumwegyesa, ijuka ngu oine ‘kubuurira Ekigambo kya Ruhanga . . . n’okugumisiriza.’ Abeegi tibarikutunguukira aha rurengo rumwe. Abamwe nibabaasa kwetenga obwire kubaasa kwetegyereza amazima agu turikureeba nk’agoorobi. Paulo akaba aine kwegyesa Abayudaaya ab’omuri Tesalonika emirundi mingi arikuhikaanisa nabo ebiteekateeko aha Byahandiikirwe, kwonka abamwe kikabatwarira obwire kwetegyereza ebi yaabaire naabeegyesa.—Shoma Ebyakozirwe 17:​1-4.

¹² Omuringo ogundi oku turikubaasa kugumisiririza abeegi baitu n’okubabuuza ebibuuzo reero tukabarinda kugarukamu. Teeraho kubahurikiza n’obwegyendesereza, kandi oyetegyereze eki barikuteekateeka. Reero obashomere ekyahandiikirwe ekiraabahwere kwetegyereza emiteekateekyere ya Yehova aha nshonga, kandi mukihikaaniseho ebiteekateeko. Teekateeka n’ahari eki: Abantu abamwe tihaine eki barikumanya ahari Baibuli n’ebi erikwegyesa. N’ahabw’ekyo nibabaasa kugasirwa waabooreka Baibuli eteirwe. Noobaasa kugaaniira nabo aha kicweka “An Introduction to God’s Word,” ekiri omu Baibuli eya New World Translation, kubahwera kumanya obwengye bwingi oburikushangwa omu Byahandiikirwe. Bwanyima noobaasa kubashoboororera oku Baibuli erikubaasa kubahwera kugira okushemererwa orikukoresa kimwe aha byahandiikirwe ebiri omu kibuuzo kya 15. Omu bugufu, waayoreka omwegi amaani g’Ekigambo kya Ruhanga, noija kwongyera kuba omwegyesa murungi.

BAHWERE KUMANYA YEHOVA

13. Twaba nitwegyesa omwegi, n’oha ou twine kugambaho munonga? Ha eky’okureeberaho.

¹³ Ekigyendererwa kyaitu n’okuhwera abu turikwegyesa kumanya Yehova n’okumwirira haihi. (Yak. 4:8) N’ahabw’ekyo okwegyesa nitubaasa kukugyeragyeranisa n’okukoresa tooki kumurikira omuntu kugira ngu areebe ekintu ekiri omu mwirima. Waaba nookora ekyo, torikwemurika kureka tooki noogireebesa ahu ekintu ekyo kiri, kugira ngu ou orikumurikira abaase kukireeba. Nikyo kimwe, twaba nitwegyesa omuntu titurikwenda kwetaho omutima kureka nitwenda kumworeka ngu ebi turikumwegyesa nibiruga ahari Yehova.

14. Nitubaasa kuhwera tuta abeegi baitu kugira ekyetengo ky’okushemeza Yehova?

¹⁴ Waaba nooyegyesa omwegi wa Baibuli, muhwere kugira ekyetengo ky’okushemeza Yehova. (Enf. 27:11) Nooba otarikwegyesa omwegi kukora ekihikire kugira ngu abe Omujurizi wa Yehova kyonka. Kureka nooba nooyenda ngu akore empinduka abaase kushemeza Yehova. Nk’eky’okureeberaho, omwegi yaaba naagumirwa kusingura omuze mubi, mubuuze ebibuuzo nk’ebi: “Ahabw’enki Yehova naayanga omuze ogu? Ahabw’enki Yehova naakushaba ngu orekyere aho omuze ogu orikukunda? Ebi Yehova arikukushaba kukora nibyoreka bita ngu naakukunda?” Ahu orikukoma kuhiga omwegi kuteekateeka ahari Yehova, niho arikukoma kumureeba nka Ishe ow’omutaano. N’ekirikurugamu, nikiija kumuhwera kwenda kushemeza Yehova.

GUMIZAMU KUBA OMWEGYESA MURUNGI OMU KUBUURIRA

15. Noobaasa kukora ki kuba omwegyesa murungi?

¹⁵ Noobaasa kushaba Yehova kukuhwera kumanya oku orikubaasa kuba omwegyesa murungi. (1 Yoh. 5:14) Kubaasa kukora ebirikuhikaana n’okushaba kwawe, ta omutima aha kutendekwa oku Yehova arikutuha omu nteerane z’ekibiina. Noobaasa kweta ab’eishe-emwe na banyaanyazi-itwe abarikwegyesa gye kugyenda naiwe aha mwegi waawe reero obabuuze ahu orikubaasa kwongyeramu amaani. Kandi oijukye ngu n’obu oraabe noomanya gye ebiri omu ishomo, omwegi tarikubimanya. N’ahabw’ekyo teeraho kubireeba nk’oku arikubireeba, reero omuhwere kwetegyereza ngu obutumwa bwaitu buzima n’amakuru marungi. Nikibaasa kumuhwera kugira omukago murungi na Yehova, kandi kimureetere kugira okushemererwa okwabuzima.—Zab. 1:​1-3.

16. Nitwija kugasirwa tuta twayongyera kuba abeegyesa barungi?

¹⁶ Okwegyesa abantu ahari Yehova ni kimwe aha bintu ebirikukirayo kutureetera okushemererwa obunaku obu. Kandi omurimo ogw’okwegyesa ogu nigwija kugumizamu n’omu nsi ensya. N’ahabw’ekyo, twaba nitubuurira amakuru marungi, ka tugumizemu kufayo aha bu turikubuurira, tubahwere kumanya Yehova, kandi tukorese Baibuli twaba nitubeegyesa. Twakora ekyo, nitwija kwongyera kuba abeegyesa barungi.